ललितपुर महानगरपालिकाले आफ्नो नगरभित्रका ५ ‘ए’ डिभिजन क्लबसहित ११ क्लबलाई आथिक सहयोग गरेको छ।
ललितपुर महानगरका मेयर चिरिबाबु महर्जनले आइतबार एक कार्यक्रमकाबीच क्लबहरुलाई आर्थिक सहयोग हस्तान्तरण गरेका हुन्। ए डिभिजनका थ्री स्टार क्लब, च्यासल युथ क्लब, जावलाखेल युथ क्लब, फ्रेन्ड्स क्लब र ब्रिगेड ब्वाईज क्लबलाई आर्थिक सहयोग गरेको हो।
महानगरले थ्री स्टारलाई १६ लाख प्रदान गरेको छ। ललितपुरले थ्री स्टारलाई वार्षिक उपलब्ध गराउने सहयोग ४ लाख र ३ प्रतियोगिताको उपाधि जितेवापत थप १२ उपलब्ध गराएको हो।
यस्तै च्यासललाई वार्षिक ४ र दुई उपाधि जितेवापत कुल १२ लाख, जावलाखेललाई एक उपाधिसहित ८ लाख रुपैयाँ उपलब्ध गराएको छ। फ्रेन्ड्स र ब्रिगेडलाई भने समान ४ लाख रुपैयाँ दिएको छ।
महानगरले ‘बी’ डिभिजन क्लब सातदोबाटो युथ क्लब, पुल्चोक युथ क्लब, खुमलटार युथ क्लब र झम्सिखेल युथ क्लबलाई समान ३ लाख रुपैयाँ दिएको छ। यस्तै ‘सी’ डिभिजनका सानेपा र खालीबारी युथ क्लबलाई २–२ लाख उपलब्ध गराएको छ।
