चितवन, ६ चैत । चितवनको राप्ती नगरपालिका–२ गड्यौलीस्थित पूर्व–पश्चिम राजमार्गमा बोलेरो र मोटरसाइकल एकापसमा ठोक्किँदा एक जनाको मृत्यु भएको छ।
विहिवार साँझ करिब ७:२० बजे लोथरतर्फबाट भण्डारातर्फ आउँदै गरेको बा.प्र ०३–००३ प ७९७९ नम्बरको मोटरसाइकल र भित्री सडकबाट राजमार्गमा प्रवेश गर्दै गरेको प्र.२–०३–००१ च ७१२ नम्बरको बोलेरो एकापसमा ठोक्किएको थियो।
दुर्घटनामा मोटरसाइकल चालक राप्ती नगरपालिका–२ गड्यौलीका करिब २७ वर्षीय दिपेश उप्रेती गम्भीर घाइते भएका थिए। उनको टाउकोमा गम्भीर चोट लागेको थियो।
घाईतेलाई उपचारका लागि नयाँ मेडिकल कलेज भरतपुर लगिएकोमा राति ८:१२ बजे चिकित्सकले मृत घोषणा गरेका हुन्। दुर्घटनामा संलग्न दुवै सवारी साधनलाई प्रहरीले नियन्त्रणमा लिएको छ भने बोलेरो चालक बारा कलैया नगरपालिका–१२ का करिब ३७ वर्षीय शैलेश कुमार यादव पनि प्रहरी नियन्त्रणमा रहेका छन्।
घटनाबारे थप अनुसन्धान भइरहेको प्रहरीले जनाएको छ।
