चितवन, असार ८ – कालिका नगरपालिकाको नवनिर्मित प्रशासकीय भवन सोमबार भव्य समारोहका बीच उद्घाटन गरिएको छ। नगरप्रमुख विनोद रेग्मीले भवनको उद्घाटन गर्दै यसलाई कालिकाबासीलाई समर्पण गरेका हुन्।

उद्घाटन कार्यक्रमअघि नगर क्षेत्रमा भव्य शोभायात्रा निकालिएको थियो। विभिन्न वडाबाट सहभागी भएका हजारौं नगरवासी, जनप्रतिनिधि, कर्मचारी, विभिन्न संघसंस्था तथा स्थानीय समुदायको सहभागिताले नगर क्षेत्र उत्सवमय बनेको थियो। शोभायात्रामा मगर, गुरुङ, तामाङ, थारू लगायत विभिन्न जातजातिका मौलिक भेषभूषासहित झाँकी प्रदर्शन गरिएको थियो भने स्थानीय कला, संस्कृति र पहिचान झल्काउने सांस्कृतिक प्रस्तुति समेत गरिएको थियो।

कार्यक्रममा उपप्रमुख विमला तामाङले स्वागत मन्तव्य व्यक्त गर्दै नगरपालिकाले आफ्नै सुविधा सम्पन्न प्रशासकीय भवन प्राप्त गर्नु गौरवको विषय भएको बताइन्। उनले नयाँ भवनले सेवा प्रवाहलाई थप व्यवस्थित, प्रभावकारी र नागरिकमैत्री बनाउन महत्वपूर्ण भूमिका खेल्ने विश्वास व्यक्त गरिन्।

उद्घाटन समारोहलाई सम्बोधन गर्दै नगरप्रमुख विनोद रेग्मीले नयाँ प्रशासकीय भवन केवल भौतिक संरचना मात्र नभई कालिका नगरपालिकाको विकास, सुशासन र समृद्धिको आधार भएको बताए। उनले नगरवासीलाई सहज, छिटो र गुणस्तरीय सेवा प्रदान गर्ने लक्ष्यका साथ भवन निर्माण गरिएको उल्लेख गर्दै नगरको समग्र विकासका लागि सबैको साथ र सहयोग आवश्यक रहेको धारणा राखे।

रेग्मीले भवन निर्माणको यात्रा सहज नभएको स्मरण गर्दै निर्माण सम्पन्न हुन करिब ६ वर्ष लागेको बताए। उनका अनुसार २०७६ फागुन १५ गते दुई वर्षभित्र सम्पन्न गर्ने गरी ठेक्का सम्झौता गरिएको भवन विभिन्न कारणले तोकिएको समयमा सम्पन्न हुन सकेन। निर्माण कम्पनीलाई चार पटकसम्म म्याद थप गर्दा पनि काम सम्पन्न नभएपछि नगरपालिकाले थप म्याद नदिई निर्माण कम्पनीलाई १ करोड १६ लाख रुपैयाँ जरिवाना गरेको थियो। अन्ततः लामो प्रतीक्षापछि भवन निर्माण सम्पन्न भई आज औपचारिक रूपमा उद्घाटन गरिएको हो।

कार्यक्रममा कालिका नगरपालिकाका संस्थापक नगरप्रमुख खुमनारायण श्रेष्ठ लगायतले मन्तव्य राख्दै प्रशासकीय भवन निर्माणलाई नगरको संस्थागत विकास र सुशासनतर्फको महत्वपूर्ण उपलब्धिका रूपमा व्याख्या गरे। उनीहरूले नगरपालिकाले आफ्नै भवनबाट सेवा प्रवाह सुरु गर्नु स्थानीय सरकारको सुदृढीकरणका लागि ऐतिहासिक कदम भएको बताए।

शाखा प्रमुख दीपक भण्डारीले सञ्चालन गरेको कार्यक्रममा पूर्व जनप्रतिनिधि, राजनीतिक दलका प्रतिनिधि, कर्मचारी, सामाजिक संघसंस्था तथा सर्वसाधारणको उल्लेख्य सहभागिता रहेको थियो।

झण्डै एक दशकसम्म भाडाका तथा अस्थायी संरचनाबाट सेवा प्रवाह गर्दै आएको कालिका नगरपालिकाले अब आफ्नै सुविधा सम्पन्न प्रशासकीय भवनबाट सेवा सञ्चालन गर्नेछ। नगरवासीको भव्य उपस्थितिमा सम्पन्न उद्घाटन समारोहलाई कालिका नगरपालिकाको विकास यात्रामा नयाँ अध्यायका रूपमा हेरिएको छ।

सुर्खेत । नेकपा एमालेका उपाध्यक्ष एवं पूर्वअर्थमन्त्री विष्णु पौडेल पक्राउ परेका छन् । उनलाई सम्पत्ति शुद्धीकरणसम्बन्धी मुद्दाको अनुसन्धानको सिलसिलामा उनलाई पक्राउ गरिएको बताइएको छ ।

पार्टीको चुनावी समीक्षा एवं पुनर्गठन कार्यदलको सुझाव संकलनअन्तर्त प्रदेशस्तरीय कार्यक्रममा पौडेल सुर्खेत पुगेका थिए ।

उनी हाल बसिरहेको काठमाडौं भैसेपाटीस्थित निवासमा पनि सम्पत्ति शुद्धीकरण विभागको टोलीले छापा मारेको छ ।

चितवन- प्रदेश खेलकुद विकास परिषद्ले आयोजना गरेको तेस्रो प्रदेशस्तरीय खेलकुद प्रतियोगिता अन्तर्गत असार ३ गतेदेखि ९ गतेसम्म सञ्चालन भएको बुद्धिचाल (चेस) प्रतियोगितामा चितवन जिल्लाले उत्कृष्ट प्रदर्शन गर्दै समग्रतर्फ दोस्रो स्थान हासिल गरेको छ।

महिलातर्फ तीन विधामा सम्पन्न प्रतियोगितामा चितवनकी प्रतिभाशाली खेलाडी लक्ष्मी कडेलले उत्कृष्ट खेल प्रदर्शन गर्दै दुई विधामा स्वर्ण पदक जित्न सफल भएकी छन्। उत्कृष्ट प्रदर्शनकै आधारमा उनी प्रतियोगिताको ‘बेस्ट प्लेयर’ घोषित हुने भएकी छन्।

पुरुषतर्फको प्रतिस्पर्धामा चितवनका राजु त्रिपाठीले क्लासिक विधामा उत्कृष्ट खेल प्रस्तुत गर्दै पाँचौँ स्थान हासिल गरेका छन्। उक्त उपलब्धिसँगै उनले सान्त्वना पुरस्कार समेत प्राप्त गरेका छन्।

चितवन टोलीको नेतृत्व चितवन जिल्ला बुद्धिचाल संघका अध्यक्ष मोहन श्रेष्ठले टिम म्यानेजरका रूपमा गरेका थिए। टोलीको प्रभावकारी व्यवस्थापन, रणनीतिक तयारी तथा खेलाडीहरूको अथक मेहनतका कारण चितवनले समग्र बुद्धिचाल प्रतियोगितामा दोस्रो स्थान सुरक्षित गर्न सफल भएको हो।

यस सफलताबारे प्रतिक्रिया दिँदै अध्यक्ष मोहन श्रेष्ठले खेलाडीहरूको निरन्तर अभ्यास, अनुशासन र समर्पणकै परिणामस्वरूप यो उपलब्धि हासिल भएको बताए। उनले आगामी दिनमा चितवनको बुद्धिचाल खेललाई राष्ट्रिय स्तरमा अझ सशक्त र प्रतिस्पर्धी बनाउने लक्ष्य रहेको समेत उल्लेख गरे।

निराजन घिमिरे- खैरहनी नगरपालिकाका कर्मचारीहरुको गम्भीर लापरबाही सार्वजनिक भएको छ । महालेखाको प्रतिवेदन २०८३ ( आ.व २०८१/८२) ले यस्तो लापरबाही सार्वजनिक गरेको हो। नगरपालिका तथा तथा मातहतका कार्यालयहरूले विद्युत् महसुल समयमै भुक्तानी नगरी लापरबाही गरेका हुन् ।

यस्तो लापरबाहीले आर्थिक वर्ष २०८१/८२ मा नगरपालिकाले ५८ हजार ६०९ रुपैयाँ जरिवाना तिर्नुपरेको पाइएको छ। महालेखा परीक्षकको प्रतिवेदन अनुसार सार्वजनिक खर्चलाई मितव्ययी तथा प्रभावकारी बनाउने सम्बन्धी मापदण्ड, २०७८ ले पानी, बिजुली, टेलिफोन लगायतका उपयोगिता सेवाको बिल समयमै भुक्तानी गर्नुपर्ने व्यवस्था गरेको छ। तर नगरपालिकाले विभिन्न कार्यालयमार्फत प्रयोग गरिएको विद्युत् महसुल ढिलो गरी तिर्दा जरिवाना समेत व्यहोर्नुपरेको उल्लेख गरिएको छ।

प्रतिवेदनमा उल्लेख भएअनुसार नगरपालिकाका विभिन्न कार्यालय तथा वडा कार्यालयहरूले विद्युत् बिल जरिवाना सहित भुक्तानी गरेका छन्। परीक्षणका क्रममा नगरपालिकाले विद्युत् प्राधिकरणलाई ५८ हजार ६०९ रुपैयाँ जरिवाना तिरेको देखिएको हो।

सबैभन्दा बढी जरिवाना नगरपालिकाको एक विद्युत् बिलमा २६ हजार ९६१ रुपैयाँ परेको छ। त्यसैगरी अर्को बिलमा १७ हजार १६० रुपैयाँ, वडा कार्यालयका बिलमा ६ हजार २९३ रुपैयाँ र ९८४ रुपैयाँ तथा स्वास्थ्य चौकी र आधारभूत स्वास्थ्य चौकीको बिलमा ४ हजार ८ सय १०  रुपैयाँ जरिवाना तिरेको प्रतिवेदनमा उल्लेख छ।

महालेखा परीक्षकको कार्यालयले यस्ता उपयोगिता खर्चको बिल समयमै भुक्तानी गरी अनावश्यक जरिवाना तिर्नुपर्ने अवस्था अन्त्य गर्न तथा आर्थिक अनुशासन कायम गर्न नगरपालिकालाई सुझाव दिएको छ।

काठमाडौँ । बजारमा बिक्री भइरहेको डाबर ब्राण्डको मह गुणस्तरहीन भेटिएपछि सरकारले तत्काल बजारबाट फिर्ता गर्न आदेश दिएको छ ।

खाद्य प्रविधि तथा गुण नियन्त्रण विभागले जारी गरेको सूचनाअनुसार बजार अनुगमन तथा नमुना परीक्षणका क्रममा डाबर ब्राण्डको ५ सय ग्राम प्याकेटको मह गुणस्तर मापदण्डअनुसार नभएकाे भेटिएको हो ।

विभागले ब्याच नम्बर ‘NB00477’ रहेको उक्त मह प्रयोगशाला परीक्षणमा प्रतिकूल देखिएपछि बजारबाट तत्काल फिर्ता गर्न निर्देशन दिएको विभागले जनाएको छ ।

विभागबाट जारी सूचनाअनुसार उक्त उत्पादनको उत्पादन मिति २०२५/१२ उल्लेख गरिएको छ भने उपभोग अवधि १८ महिना रहेको छ ।

विभागले खाद्य स्वच्छता तथा गुणस्तर ऐन, २०८१ को व्यवस्थाअनुसार सम्बन्धित ब्याचका सबै उत्पादन बिक्री वितरण नगर्न तथा नगराउनसमेत निर्देशन दिएको छ ।

उक्त महको उत्पादक कम्पनी डाबर नेपाल प्रा. लि. जितपुर सिमरा बारा रहेको विभागले जनाएको छ ।

चितवन । कालिका नगरपालिकाले दूध उत्पादक किसानलाई प्रतिलिटर २ रुपैयाँ ६१ पैसाका दरले अनुदान वितरण गरेको छ। दूध उत्पादनमा प्रोत्साहन स्वरुप नगरपालिकाले कृषकहरुलाई प्रतिलिटर दूधमा एक रुपैयाँ  र बागमती प्रदेश सरकारबाट प्राप्त एक रुपैयाँ ६१ पैसा गरी रु २ रुपैँया ६१ पैंसाका दरले अनुदान वितरण गरेको हो । नगरपालिकाले ७ वटा दुग्ध उत्पादक सहकारी संस्थामार्फत किसानलाई कुल १ करोड ५ लाख १२ हजार ८ सय १३ रुपैयाँ ६ पैसा वितरण गरेको छ ।

नगरपालिकाको तथ्यांकअनुसार पदमपुर दुग्ध उत्पादक सहकारी संस्था लि., कालिका–२ ले सबैभन्दा धेरै ११ लाख ३७ हजार ४ सय ७०  लिटर दूध संकलन गरेको छ। उक्त सहकारीमार्फत करिब २९ लाख ६८ हजार ७ सय ९६ रुपैयाँ अनुदान वितरण भएको छ।

त्यस्तै  मनकामना दुग्ध उत्पादक सहकारी संस्था लि., कालिका–६ ले १० लाख ४० हजार ४ सय ३३ लिटर दूध संकलन गरी करिब २७ लाख १५ हजार ५ सय ३० रुपैयाँ अनुदान पाएको छ।

यसै गरि उत्थान दुग्ध उत्पादक सहकारी संस्था लि., कालिका–८ ले ८ लाख १६ हजार ८ सय ५९ लिटर दूध संकलन गरेको छ। उक्त सहकारीमार्फत करिब २१ लाख ३२ हजार रुपैयाँ अनुदान वितरण गरिएको छ।

त्यस्तै, कञ्चन दुग्ध उत्पादक सहकारी संस्था लि., कालिका–६ ले १ लाख ५२ हजार ९ सय ३७  लिटर दूध संकलन गरी करिब ३ लाख ९९ हजार १ सय ६६ रुपैयाँ अनुदान पाएको छ।

यसैगरी नवमिलिजुली दुग्ध उत्पादक सहकारी संस्था लि., कालिका–६ ले ५ लाख ३० हजार ५ सय १३ लिटर दूध संकलन गरेको छ। यस सहकारीमार्फत करिब १३ लाख ८४ हजार ६ सय ३८ रुपैयाँ अनुदान वितरण भएको छ।

यस्तै,  भटेनी दुग्ध उत्पादक सहकारी संस्था लि., कालिका–६ ले १ लाख ९५ हजार ९ सय लिटर दूध संकलन गरी करिब ५ लाख ११ हजार २ सय ९९ रुपैयाँ अनुदान प्राप्त गरेको छ भने  सामुदायिक दुग्ध उत्पादक सहकारी संस्था लि., कालिका–१ ले १ लाख ५३ हजार ८ सय ८५  लिटर दूध संकलन गरी करिब ४ लाख १ हजार ३ सय ७९ रुपैयाँ अनुदान पाएको छ।

अनुदान वितरण कार्यक्रममा बोल्दै कालिका नगरपालिकाका प्रमुख विनोद रेग्मीले कृषि तथा पशुपालन क्षेत्रलाई नगरपालिकाले उच्च प्राथमिकतामा राखेको बताए। उनले दूध उत्पादन बढाएर किसानको आयआर्जन वृद्धि गर्न नगरपालिकाले विभिन्न कार्यक्रम सञ्चालन गरिरहेको उल्लेख गरे।

मेयर रेग्मीले स्थानीय उत्पादनको बजारीकरण, व्यवसायिक पशुपालन र किसान प्रोत्साहनका लागि आगामी दिनमा समेत यस्ता कार्यक्रमलाई निरन्तरता दिइने बताए। नगरपालिकाका अनुसार कालिका क्षेत्रमा वार्षिक रूपमा ४० लाख लिटरभन्दा बढी दूध उत्पादन तथा बिक्री हुँदै आएको छ। अनुदान वितरण कार्यक्रममा उपप्रमुख विमला तामाङ, प्रमुख प्रशासकीय अधिकृत देवराज चौलागाई, वडाध्यक्षहरु, लगायतको उपस्थिति रहेको थियो ।

चितवन । कालिका नगरपालिकामा रहेको पदमपुर दुग्ध उत्पादक सहकारी संस्थाले कालिका नगरपालिका–२ को लाहुरेचोकमा दुग्धजन्य पदार्थ बिक्री केन्द्र सञ्चालनमा ल्याएको छ। सहकारीले उत्पादन गरेका दुग्धजन्य पदार्थहरुको खुद्रा विक्रीको लागी केन्द्र संचालनमा ल्यईएको हो ।

विक्री केन्द्रको सोमबार मेयर विनोद रेग्मीले उद्घाटन गरेका हुन्। उद्घाटन कार्यक्रमलाई सम्बोधन गर्दै मेयर रेग्मीले स्थानीय स्तरमै उत्पादित दुग्धजन्य पदार्थको उत्पादन र खपत बढाउन कालिकावासीलाई आग्रह गरे। उनले कालिका नगरपालिकाले कृषि तथा पशुपालन क्षेत्रलाई प्राथमिकतामा राखेर लगानी गरिरहेको उल्लेख गर्दै आगामी दिनमा अझै बजेट तथा कार्यक्रम विस्तार गरिने बताए।

नयाँ बिक्री केन्द्रमार्फत दूध, दही, मही, घ्यू, नौनी, पनिर लगायतका दुग्धजन्य पदार्थ बिक्री वितरण गरिने संस्थाले जनाएको छ। आर्थिक वर्ष २०८१/८२ मा कालिका नगरपालिकाको ५ लाख रुपैयाँ अनुदान र संस्थाको ५ लाख रुपैयाँ लगानीमा दुग्ध विविधीकरण कार्यक्रम सुरु गरिएको संस्थाका अध्यक्ष भैरव प्रसाद रिजालले बताए  ।

यस अघि संस्थाले कालिका–५ पदमपुर र नारायणगढको प्रगतिपथमा गरी दुईवटा बिक्री केन्द्र सञ्चालन गरिरहेको छ। सहकारीले नगरपालिकाका वडा नं. २, ३ र ५ मा रहेका पाँच वटा दूध संकलन केन्द्रमार्फत दैनिक करिब ३ हजार ८ सय लिटर दूध संकलन गर्दै आएको छ। संस्थामा हाल ८७१ जना किसान आबद्ध रहेका व्यवस्थापक राम प्रसाद चालिसेले जानकारी दिए।

कार्यक्रममा उपमेयर विमला तामाङ, वडाध्यक्षहरू, टिकाराम रेग्मी, लक्ष्मण पौडेल लगायतको उपस्थिति रहेको थियो।

काठमाडौं । खाद्य प्रविधि तथा गुण नियन्त्रण विभागले यशोधा फुड्स प्रालिद्वारा उत्पादित २ ब्रान्डलाई तत्काल बजारबाट फिर्ता गर्न आदेश दिएको छ ।

१०० ग्रामवाला करेन्ट नुडल्स र ५० ग्रामको लाली चाउचाउलाई बजारबाट फिर्ता गर्न आदेश गरिएको हो ।

यी दुवै खाद्य पदार्थमा सरकारले तोकेको अनिवार्य गुणस्तर मापदण्ड अनुरुप एक्सट्राक्टेड फ्याटको एसिड भ्यालु नपाइएको विभागले जनाएको छ ।

त्यस्तै एसियन बिस्कुट एण्ड कन्फेक्सनरी प्रालि दुहबी सुनसरीद्वारा उत्पादित ज्याकन्याक क्रेकर्स बिस्कुट पनि गुणस्तरहीन पाइएपछि बजारबाट फिर्ता गर्न आदेश गरिएको छ ।

चितवन — २०६७ जेठमा विषालु च्याउ खाएर परिवारका सबै सदस्य गुमाएका चितवनको पहाडी गाउँ कान्दामा सन्सरबहादुर चेपाङले माध्यमिक शिक्षा परीक्षा (एसईई) उत्तीर्ण गरेका छन् । च्याउ खाँदा बिरामी परेका परिवारका आठ सदस्यको मृत्युपछि भरतपुरस्थित एसओएस बालग्रामको आश्रयमा पढिरहेका सन्सरबहादुर २ दशमलब ६९ जीपीए ल्याएर पास भएका हुन् ।

चितवनको उत्तरी भेग पहाडी गाउँ लोथरको कान्दामा २०६७ को जेठ १४ मा जंगली च्याउ खाएका एकै घरका आठ जनाको निधन भएको थियो । सानो भएका कारण च्याउ नखाएका बालक सन्सरबहादुर मात्रै जोगिएका थिए । उनै सन्सरबहादुर यो पटक एसईई उत्तीर्ण भएका हुन् ।

हाल राप्ती नगरपालिका–१३ मा पर्ने कान्दा गाउँ पुग्न अहिले पनि दिनभर हिँड्नुपर्छ । गाउँ पुग्ने मोटरबाटो छैन । अति सिमान्तकृत वर्गमा पर्ने आदिवासी चेपाङ बहुल कान्दामा १६ वर्षअघि यो घटना हुँदा बिरामी भएकालाई भरतपुरको अस्पताल ल्याउनै झण्डै दुई दिन लागेको थियो ।

२०६७ जेठ १४ को साँझ कान्दाका बाबुराम चेपाङले जंगलबाट ल्याएको च्याउ पकाए । बाबुराम सन्सरबहादुरका हजुरबुवा हुन् । गाउँमा च्याउ खाएका सबै आठ जना बिरामी परेको हल्ला भएपछि भोलिपल्ट स्थानीय कान्देश्वरी विद्यालयका प्रधानाध्यापक (प्रअ) बालकृष्ण थपलिया बाबुरामको घर गए । छिमेकीहरु उनीहरुलाई जनावरको दिसा खुवाएर वान्ता गराउन खोज्दै थिए । प्रअ थपलियाले यस्तो नगर्न र ‘जति सक्दो चाँडो अस्पताल लौजाऔं’ भने । गाउँलेहरु जुट्दाजुट्दै बाबुरामको प्राण गयो । लगत्तै बाबुरामकी श्रीमती अर्थात् सन्सरबहादुरकी हजुरआमाको पनि निधन भयो । ‘बिरामी भएकामध्ये बाबुराम, उनकी श्रीमती र बाबुरामकी एक नातिनी (सन्सरबहादुरकी दिदी)को गाउँमै प्राण गयो,’ प्रअ थपलियाले घटना सम्झे । बाँकी पाँच जनालाई थपलियाले गाउँलेको सहयोगमा भरतपुर अस्पताल ल्याए ।

सन्सरबहादुरका बुवा पूर्णबहादुर, आमा चन्द्रमाया, सन्सरबहादुरकी एक दिदी, काका जीतबहादुर र जीतबहादुरकी श्रीमतीको भरतपुर अस्पतालकै शय्यामा मृत्यु भयो । उपचारको प्रयासमा काठमाडौं लगिएका जीतबहादुरको पनि जेठ २० मा मृत्यु भएपछि सन्सरबहादुरको परिवारमा कोही बचेनन् ।

परिवारका सबै बिते बच्चालाई के गर्ने ? प्रअ थपलिया साँछी बस्ने भएपछि भरतपुरको एसओएस बालग्रामले सन्सरबहादुरलाई राख्ने जिम्मा लियो । यो घटनाले सन्सरबहादुरलाई अर्कै संसारमा पुर्‍यायो ।
बालग्रामकी आमा ‘कान्ति’को काखमा सन्सरबहादुर हुर्किन थाले । सन्सरबहादुरको स्कुले जीवन सुरु भयो । ‘फुटबलमा उनको सानैदेखि धेरै रुचि छ । स्कुलबाट फुटबल खेल्न ठाउँठाउँ गएका छन्,’ एसओएस बालग्रामका निर्देशक राजेन्द्र लम्सालले भने ।

तीन वर्षअघि अन्डर–१६ समूहको छनौट खेल्न काठमाडौंसम्म गए पनि छनोट हुन सकेनन् । बालग्राममा बस्न आएकाहरु २३ वर्षको हुँदासम्म एसओएसले जिम्मेवारी लिन्छ । ‘त्यो बेलासम्म पढाइदेखि सबै कुरामा सहयोग गर्छाैं । हाम्रोमा कक्षा ११ मा विज्ञान विषय छ । त्योबाहेकको विषय पढ्न बाहिर गए पनि सहयोग हुन्छ,’ निर्देशक लम्सालले भने ।

फुटबलसँगै बास्केटबल, भलिबलमा पनि आफ्नो रुचि भएको उनले बताए । उनलाई नाँच्न पनि रहर लाग्छ । ‘कहिलेकाँही त गीत पनि गाउँछु,’ सन्सरबहादुरले भने । पढाइमा राम्रो अक्षर लेख्न नसकेका कारण प्रगति गर्न नसकिएको उनी बताउँछन् । गाउँमा आफ्ना हजुरबाआमा पट्टिका सबैको निधन भए पनि अन्य आफन्त छन् । उनी बीचमा दुई पटक गाउँ पनि पुगे । ‘गाउँ त धेरै टाढा रहेछ । काठमाडौंभन्दा पनि टाढा । दिनभरी हिँड्न पर्ने,’ उनले भने ।

२८ वैशाख, काठमाडौं । माध्यमिक शिक्षा परीक्षा (एसईई)मा सहभागी मध्ये १ लाख ४६ हजार ५०७ विद्यार्थी नन ग्रेडेड (अवर्गीकृत) भएका छन् ।

राष्ट्रिय परीक्षा बोर्डले सोमबार २०८१ को एसईईको नतिजा सार्वजनिक गरेको हो ।

नन् ग्रेडेड विद्यार्थी संख्या अघिल्लो वर्षको तुलनामा २१ हजारले घटेको हो । त्यतिबेलजा १ लाख ६७ हजार भन्दा बढी नन् ग्रेडेड थिए ।

२०८१ मा ४ लाख ३० हजार ६६७ विद्यार्थी सहभागी थिए । एसईईमा सहभागी मध्ये १ लाख ४६ हजार ५०७ विद्यार्थी नन ग्रेडेड (अवर्गीकृत) भएका छन् । राष्ट्रिय परीक्षा बोर्डले सोमबार २०८१ को एसईईको नतिजा सार्वजनिक गरेको हो ।

नन् ग्रेडेड विद्यार्थी संख्या अघिल्लो वर्षको तुलनामा २१ हजारले घटेको हो । त्यतिबेलजा १ लाख ६७ हजार भन्दा बढी नन् ग्रेडेड थिए ।

२०८१ मा ४ लाख ३० हजार ६६७ विद्यार्थी सहभागी थिए ।