रत्ननगर । पूर्वी चितवनको रत्ननगरमा आइतबार आयोजना गरिएको रक्तदान कार्यक्रममा ३८ युनिट रगत संकलन भएको छ ।

अर्पण बचत तथा ऋण सहकारी संस्था लि को कारोबार सुरु गरेको १५ बर्ष पुगेको अबसरमा अर्पण बचत र रेडियो अर्पणको सयुक्त आयोजनामा भएको रक्तदान कार्यक्रममा ९ जना महिला सहित ३८ जनाले रक्तदान गरेको कार्यक्रम संयोजक ध्रुबराज लामिछानेले जानकारी दिए ।

कार्यक्रमको उद्घाटन गर्दै कार्यक्रमका प्रमुख अतिथि रत्ननगर नगरपालिकाका मेयर प्रलाद सापकोटाले विरामीलाई रगतको सहज उपलब्धताको लागि नगरपालिकाले रक्तसंकलन युनिट सञ्चालनमा ल्याएको बताए ।

नगरबासीको स्वास्थ्य सुरक्षाका लागि ५० प्रतिशत अनुदानमा स्वास्थ्य बिमा, रत्ननगर अस्पतालमा उपचारकोष, क्यान्सर पीडितलाई थप २५ हजार तथा बृद्धबृद्धाको घरघरमै उपचार जारी रहेको बताए ।

कार्यक्रममा अर्पण बचतका अध्यक्ष सुरज पौडेलले चितवनमा देखिएको रगतको अभावलाई मध्यनजर गरी सहकारीले आर्थिक कारोबार सुरु गरेको १५ बर्ष पुगेको अबसरमा रक्तदान कार्यक्रम आयोजना गरेको बताए । उनले सहकारीले आर्थिक कारोबारसंगै सामाजिक उत्तरदायित्व बहन गरी सामाजिक रुमान्तरणको काम गर्दै आएको बताए ।

कार्यक्रममा रत्ननगर नगरपालिका वडा नं १ का वडाध्यक्ष कुलप्रसाद सापकोटाले रक्तदान जीवनदानसंगै आवश्यकताको विषय बनेको बताए । उनले नागरिकले गरेको रक्तदानबाट संकलित रगत विरामीलाई सहज रुपमा उपलब्ध हुनुपर्ने विचार व्यक्त गरे ।

सहकारीका पूर्व अध्यक्ष तथा रेडियो अर्पणका उपाध्यक्ष यमन भूषालले कार्यक्रमको उद्देश्यमाथि प्रकास पार्नुभएको थियो । सहकारीका अध्यक्ष पौडेलको अध्यक्षतामा भएको कार्यक्रममा उपाध्यक्ष रामकुमार बजगाईँले स्वागत मन्तव्य राखेका थिए ।

कालिका । कालिका नगरपालिका वडा नं ६ स्थित पूर्वी चितवन निर्माण सेवा संघकाे १५औ बार्षिक साधारण सभा तथा आठाैं अधिवेशन गरिएकाे छ । कालिकाका मेयर विनाेद रेग्मीले उद्घाटन गरेकाे साधारण सभामा आवास निर्माणमा लामाे सयम देखि याेगदान गर्दै आएका निर्माण व्यवसायीहरुलाई सम्मान गरिएकाे छ ।

संघका पूर्वअध्यक्ष उत्तम घिमिरे सहित संस्थापक अध्यक्ष जगत माेक्तान, पूर्वअध्यक्ष ज्ञानबहादुर लामिछाने, बलराम दंगाल, ज्येष्ठ सदस्य इन्द्रमाया मगर, संघका ज्येष्ठ सदस्य कृष्णप्रसाद खनाललाई सम्मान गरिएकाे हाे । कार्यक्रमका प्रमुख अतिथि मेयर रेग्मी र संघका अध्यक्ष हेमप्रसाद पन्तले उनीहरुलाई सम्मानपत्र र दाेसल्ला ओढाएर सम्मान गरेका थिए ।

साे अबसरमा मेयर रेग्मीले स्थानीय सरकारले लागू गरकाे भवन निर्माण आचारसंहिताकाे कार्यान्यनकाे लागि निर्माण व्यवासयीले नगरपालिकालाई सहयाेग गर्नु पर्ने बताए । कार्यक्रममा अध्यक्ष पन्तले भावी कार्ययाेजना, सचिव राजाराम नेपालले प्रगति प्रतिबेदन तथा लेखा संयाेजक सराेज चाैधरीले आर्थिक प्रतिबेदन प्रस्तुत गरेका थिए ।

कार्यक्रममा वडाध्यक्षहरु टीकाराम रेग्मी, लक्ष्मण पाैडेल, स्वराेजगार निर्माण सेवा संघ भरतपुरका अध्यक्ष कृष्णप्रसाद पाैडेल, पूर्वअध्यक्ष उत्तम घिमिरे लगायतले मन्तव्य राखेका थिए ।

संघका प्रथम उपाध्यक्ष कृष्णप्रसाद दुलालले स्वागत मन्तव्य राखेकाे कार्यक्रम सचिव नेपालले सञ्चालन गरेका थिए । अधिवेशनले १३ सदस्यीय नयाँ कार्यसमिति र तीन सदस्यीय लेखा समिति चयन गर्ने छ ।

१६ भदौ, काठमाडौं । चितवनको मुग्लिन–नारायणगढ सडकखण्डको सिमलतालमा बस र ट्रक ठोक्किएका छन् ।

आज बिहान भारतीय नम्बरको बस र नेपाली नम्बरको ट्रक आपसमा ठोक्किएका मुग्लिन प्रहरी प्रमुख इन्सपेक्टर निरला भण्डारीले जानकारी दिइन् । उनका अनुसार दुर्घटनामा ट्रक चालकसहित केही यात्रुहरु सामान्य घाइते भएका छन् ।

दुर्घटनाको विस्तृत विवरण आउन बाँकी छ ।

१५ भदौ, काठमाडौं । नेपाल आयल निगमले पेट्रोलियम पदार्थको मूल्य घटाएको छ । शनिबार मध्यरातबाट लागू हुने गरी पेट्रोलमा प्रतिलिटर २ रुपैयाँ र मट्टीतेल र डिजलमा प्रतिलिटर एक रुपैयाँ घटाइएको निगमले जनाएको छ ।

आन्तरिक हवाई इन्धनतर्फ प्रतिलिटर ५ रुपैयाँ तथा अन्तर्राष्ट्रिय हवाई इन्धनतर्फ प्रति किलोमिटर ३७ डलर मूल्य घटाइएको छ । खाना पकाउने एलपी ग्याँसको मूल्य भने यथावत् नै छ ।

नयाँ मूल्यअनुसार पेट्रोलको मूल्य अब काठमाडौं, पोखरा र दिपायल क्षेत्रमा लिटरको १६३ रुपैयाँ पर्छ । सुर्खेत र दाङ क्षेत्रमा १६२ र अरु क्षेत्रमा १६० रुपैयाँ ५० पैसा पर्नेछ ।

यस्तै पेट्रोल र मट्टीतेलको मूल्य काठमाडौं र दिपायल क्षेत्रमा लिटरको १५४ रुपैयाँ पर्नेछ । सुर्खेत र दाङ क्षेत्रमा १५३ रुपैयाँ र अरु क्षेत्रमा १५१ रुपैयाँ ५० पैसा पर्नेछ ।

मोरङको सुन्दरहरैँचा नगरपालिका–७ को केराघारीभित्र शनिबार एकै घरका २ जना नाबालिकाको शव फेला परेको छ।

नारायण न्यौपानेको केराघारीभित्र शनिबार दिउँसो साढे ४ बजेतिर दुई जना नाबालिकाको शव फेला परेको मोरङ प्रहरीका प्रवक्ता डिएसपी ज्ञानेन्द्रबहादुर बस्नेतले जानकारी दिए।

उनका अनुसार धनकुटाको पाख्रिबास नगरपालिका–४ डिकुरेका घर भएका ३१ वर्षीय अर्जुन कार्कीका छोरीहरु १ वर्षीया अर्पणा र ३ वर्षीया आयिका कार्की केराघारीभित्र मृत अवस्थामा फेला परेका हुन्।

उनीहरु धनकुटा घर भई सुन्दरहरैँचा–७ मालती टोलस्थित दिदी सीता रेग्मीको घरमा बस्दै आएका थिए। त्यहाँ अर्जनु उनकी श्रीमती २९ वर्षीया अस्मिता न्यौपाने र दुई छोरीसँगै बस्दै आएका थिए। उनीहरु बसेकै नजिक नयाँ घर बनाउँदै थिए।

केराघारीभित्र २ नाबालिकाको शव देखेपछि स्थानीयले प्रहरीलाई खबर गरे। शुक्रबार साँझ पती–पत्नीबीच विवाद भएको प्रारम्भिक अनुसन्धानबाट खुलेको बताउँदै, डिएसपी बस्नेतले भने, ‘विवाद भएपछि नाबालिका छोरीहरुलाई लिएर राति साढे ८ बजेतिर घरबाट उनी हिँडेकी थिइन्। शनिबार दिउँसो नाबालिकाको शव एकअर्काकालाई अँगालो मारेको अवस्थामा भेटियो। दिदी आयिकाले बाहिनी अर्पणालाई अँगालो मारेको अवस्थामा शव थियो।’

नाबालिकाको शव फेला परेपछि आमा अस्मिता सम्पर्कविहीन भएकी छन्। उनको खोजी तीव्र पारिएको छ। ‘घटनाको प्रकृति हेर्दा दुवै बालिकालाई विष खुवाएर मारे जस्तो देखिन्छ’ डिएसपी बस्नेतले भने।

बालिकाको शव फेला परेको स्थान नजिकै कीटनाशक औषधि ‘मेटासिट’ को बट्टा फेला परेको बताउँदै, डिएसपी बस्नेतले भने, ‘नाबालिकाको शरीरमा बाहिरी चोट देखिँदैन। घटना प्रकृति हेर्दा विष खुवाएर हत्या गरे जस्तो देखिन्छ। आमा सम्पर्कविहीन हुनुले पनि थप शंका उब्जाएको छ। बच्चाका बुवा हाम्रो सम्पर्कमा छन्।’

निर्माणाधीन घरमा पानी लगाउने विषयलाई लिएर पति–पत्नीबीच विवाद भएको र विवाद भएपछि २ जना छोरीलाई लिएर पत्नी हिँडेको अर्जुनलाई उद्धृत गर्दै प्रहरीले भन्यो।

मोरङ प्रहरी प्रमुख एसपी नवराज कार्की आफैं घटनास्थल पुगेर घटनाको थप अनुसन्धान अघि बढाएका छन्। शवलाई पोस्टमार्टमका लागि धरानस्थित बिपी कोइराला स्वास्थ्य विज्ञान प्रतिष्ठान पठाएर अनुसन्धान थालेको प्रहरीले जनाएको छ।

उज्यालो दर्पण- भरतपुरको अर्किड माध्यमिक विद्यालयले आयोजना गरेको जिल्ला स्तरीय अन्तरविद्यालय तीजगीत प्रतियोगितामा रत्ननगरको स्काईराईडर आवाशीय माध्यमिक विद्यालय प्रथम भएको छ ।

‘लोकसंस्कृतिको संरक्षण, श्रष्ट्राको सम्मान र नवप्रतिभालाई प्रोत्साहन’ भन्ने नारालाई आत्मसाथ गर्दै विद्यालयले जिल्ला स्तरीय तीजगीत प्रतियोगिता आयोजना गरेको हो ।

विद्यालय अतिरिक्त क्रियाकलाप विभाग प्रमुख तथा कार्यक्रम संयोजक प्रतीक्षा श्रेष्ठका अनुसार प्रतियोगितामा चितवनका सामुदायिक एवम संस्थागत गरि ३० भन्दा बढी विद्यालयहरुको सहभागीता रहेको थियो।

प्रतियोगितामा ओम शान्ति मावी भरतपुर दोश्रो र सनराइज स्कुल तेस्रो भएका थिए। कार्यक्रममा नेपाल प्रहरी स्कुलको विशेष प्रस्तुति रहेको थियो।

कालिका, १५ भदौ । कालिका नगरपालिकामा एकजना बृद्व मृत अवस्थामा फेला परेका छन् ।

स्थानीय साेमवहादुर मुड्भरी कालिका वडा नं ८ स्थित कालिका मन्दिर भन्दामाथी गङटे स्थित कयर खाेलामा डुबेकाे अवस्थामा फेला परेको हाे ।

९० वर्षका बृद्व हिजाेबेलुकी देखि सम्पर्क विहीन भएका थिए । राती अबेर सम्म परिवार र स्थानीयले सम्भावित ठाउँमा खाेजीगरेका थिए ।
खबर पाए लगत्तै कालिका नगरपालिकाका उप–प्रमुख विमला तामाङ, कालिका ६ का वडा अध्यक्ष टिकाराम रेग्मी, वडा नं ८ का अध्यक्ष चित्रवहादुर मगर, नगरप्रहरी सहितकाे टिम घटना स्थल पुगेका थिए ।

विहान स्थानीयले खाेलामा डुबिरहेकाे अवस्थामा देखेपछि जुटपानी प्रहरीलाई खबर गरेका थिए । ईलाका प्रहरी कार्यालय टांडीवाट आएकाे टिमले मुचुल्का उठाएर पाेष्टमार्टमका लागि भरतपुर पठाएकाे छ ।

काभ्रेपलाञ्चोकको पनौती घर भएकी ममता काफ्ले अमेरिकामा बेपत्ता भएको घटनामा दाइजो मुख्य कारण भएको खुलासा भएको छ ।

ममताका बुवा कमल काफ्ले र मावली हजुरबुवा यज्ञप्रसाद तिमिल्सिनाले यस घटनामा ममताका पति नरेशदत्त भट्ट र उनको परिवारको संलग्नता रहेको दाबी गरेका छन् ।

ममताले कञ्चनपुरका नरेशदत्त भट्टसँग प्रेम विवाह गरेकी थिइन् । विवाहको समयमा नै नरेशको परिवारले दाइजो कम भएको भन्दै विवाद गरेको थियो ।

ममताका बुवा कमलका अनुसार दाइजोको विषयलाई लिएर ६–७ महिनाअघि उनकी सम्धिनी पार्वती भट्टसँग खटपट भएको थियो ।

विवाहको समयमा दाइजोको कुरा नगर्न भने पनि भट्ट परिवारले त्यसलाई स्वीकार नगरेको बुवा कमलले बताए । ममता बेपत्ता हुनुमा दाइजो नै मुख्य कारण भएको बताउँदै हजुरबुवा यज्ञप्रसादले पनि भट्ट परिवारको संलग्नता रहेको दाबी गरेका छन् ।

ममता जुलाई ३१ अर्थात् साउन १६ गतेदेखि बेपत्ता छिन् । प्रहरीले ममताका पति नरेशलाई अमेरिकाको भर्जिनियास्थित मनासस पार्कबाट भदौ ६ गते पक्राउ गरेको छ । भदौ ७ गते उनलाई अदालतमा पेश गरिएको थियो । अदालतले उनलाई थुनामा राख्ने आदेश दिएको छ ।

अदालतमा पेश गरिएको कागजातमा ममताको हत्या नरेशकै घरको बेडरूममा भएको प्रमाण फेला परेको अमेरिकी प्रहरी अधिकारीले दाबी गरेका छन् । बेडरूम र बाथरूममा रगत देखिएकाले प्रहरीले कार्पेटलगायत सामान फरेन्सिक जाँचका लागि बरामद गरेको छ ।

ममताका परिवारका सदस्यहरूले अमेरिकामा न्यायको खोजी गरिरहेका छन् । ममताका बुवा कमल काफ्लेले छोरीसँग अन्तिमपटक साउन ११ गते कुराकानी हुँदा उनको अनुहार मलिनो रहेको दाबी गरे ।

यतिबेला ममताकी आमा र दाइ अमेरिकामा पुगेका छन् । परिवारका सदस्यहरूले ममताको न्यायका लागि अमेरिकी राजदूतावास र नेपाल सरकारले अझै ठोस कदम नचालेको गुनासो गरेका छन् । यस घटनाले पनौतीबासीलाई बढी नै स्तब्ध बनाएको पाइएको छ ।

काठमाडौं । हेर्ने कथाले ‘हराएका वर्षहरू’मा देखाएका प्रकाश तामाङका साहुका छोरा छेतेन दोण्डुपले प्रकाश आफ्नै परिवारको सदस्य भएको बताएका छन् । प्रकाशलाई आफूले बुबा सरह मान्ने गरेको उनले भनेका छन् । हेर्ने कथाले आफ्नो फेसबुक पेजमा शुक्रबार छेतेनसँग गरिएको कुराकानी सार्वजनिक गरेको छ ।

छेतेन भन्छन्, “हाम्रो घरमा जे पाक्छ त्यही खाएर एउटै परिवार जसरी हुर्केको हो । सामाजिक सञ्जालमा आएजस्तो अन्याय गरेको छैन ।”

आफूहरूलाई प्रकाशले नै हुर्काएको सम्झिए । भने, “प्रकाशले कहिले पनि पैसाको कुरा गरेनन् । हामीले पनि गरेनौँ । तर, बेला बेलामा बाबुआमा खोज्न जान पाए हुन्थ्यो भन्थ्यो । बुबाआमाले पनि बाहिरी संसार खासै देखेको थिएन । कहाँ जाने !”

गाउँमा हुने घोडे जात्रामा प्रकाश आफ्नो परिवारको प्रतिनिधि भएर जाने गरेको पनि छेतेनले सुनाए । प्रकाशलाई गोठालो बनाएको भन्ने विषयमा पनि उनले स्पष्टीकरण दिएका छन् । उनी भन्छन्, “गोठालाको सिजन हुन्छ । गाउँभरिको चौँरीको जिम्मा लिनुपर्छ । जिम्मा लिसकेपछि त्यो सिजन छाड्न मिल्दैन । वचन दिइसकेको हुन्छ ।”

हेर्ने कथा टिमले प्रकाशलाई भेट्दा उनी त्यसरी नै गोठालो गएको छेतेनले भनेका छन् । यही कारणले गर्दा प्रकाशलाई आफ्ना बाबुआमाले पठाउन आनाकानी गरेको कुरा प्रष्ट्याएका छन् । हेर्ने कथाको टिमसँग आफ्ना बाबाआमा अपरिचित भएको हुँदा प्रकाशलाई पठाउन असहज मानेको पनि उनले सुनाए ।

हेर्ने कथा टिमलाई सम्बोधन गर्दै उनले भनेका छन्, “तपाईंहरू पनि अन्जान मान्छे हुनुभयो । नचिनेको मान्छेलाई कसरी आफ्नो घरको मान्छे जिम्मा लगाउनु । त्यही भएर त्यस्तो भनेको हो । साहु भएर त्यस्तो भनेको हैन ।”

प्रकाश घरकै सदस्य जस्तो भएको हुँदा तलबको कुरा अहिलेसम्म नउठेको पनि उनले प्रष्ट्याएका छन् । उनको भनाइ उद्धृत गर्दै हेर्ने कथाले लेखेको छ, “अनि तलबको कुरामा चाहिँ अब घर परिवार जस्तै भएपछि तलब कसरी दिनु ! के कुरा गर्नु !”

प्रकाशले यार्सागुम्बा टिपेर कमाएको पैसा पनि आफ्नै परिवारका लागि खर्च गर्ने गरेको कुरा छेतेनले सुनाएका छन् । आफूहरूले नागरिकता बनाउन खोज्दा प्रक्रिया नमिलेको कुरा सुनाए । आफ्ना दाई पाल्जोरले आफ्नो अंश पनि प्रकाशलाई दिन खोजेको कुरा छेतेनले बताए । तर, नागरिकता नहुँदा अंश दिन नमिलेको उनको भनाइ छ ।

नागरिकता नभएकै कराण विवाह पनि हुन नसकेको उनले हेर्ने कथा टिमलाई भनेका छन् । उनले भनेका छन्, “नागरिकता नभएर अंश दिन पनि मिलेन । प्रकाशको बिहे पनि गरिदिन खोजेको गाउँमै । तर, आफ्नो नागरिकता नभए पछि बच्चाहरूको पनि नागरिकता हुँदैन भनेर प्रकाशले बिहे गर्न मान्नुभएन ।”

छेतेनका अनुसार केरुङमा बस्ने उनका काकाले प्रकाशलाई १० लाख रुपैयाँ दिन्छु भनेका छन् । त्यसैगरी फ्रान्समा बस्ने छेतेनका दाईले दुई लाख रुपैयाँ ।

छेतेनले प्रकाशलाई आफ्नो बुबा जस्तै मान्छे भन्दै भनेका छन्, “उहाँ मेरो बुबा जस्तो मान्छे हो । उसलाई भविष्यमा मैले गर्न सक्ने सबै सहयोग गर्न तयार छु ।”

उज्यालो दर्पण। चितवनको कालिकामा उत्पादित बजार खोज्दै मेयर विनोद रेग्मी कृषि मन्त्रालय पगेका छन् । स्थानीय स्तरमा उत्पादित महको बजारीकरणमा देखिएका समस्या, महको व्यवस्थापन, मह निर्यात लगाएतका विषयमा छलफल गर्न मेयर रेग्मीले कृषि मन्त्री संग छलफल गरेका हुन् ।

सो अवसरमा मेयर रेग्मीले कृषि मन्त्री रामनाथ अधिकारी समक्ष कालिकामा रहेका मौरीपालक किसानद्धारा उत्पादित महको बजारीकरणमा रहेको समस्या बारे अवगत गराएका थिए ।

आफ्ना किसानले उत्पादन गरेको मह वर्षौ सम्म भण्डारण गरेर राख्नुपर्ने अवस्था रहेको उल्लेख गर्दै मेयर रेग्मीले देशमै खपत हुने वा निर्यातको वातावरण निर्माण गर्न मन्त्री अधिकारी समक्ष अनुरोध गरेकाछन् ।

“किसानले मेहनत र लगानी गरेर उत्पादन गरेको महले बजार पाउन नसक्दा  सोचेभन्दा उत्पादन बढाउन सकेका छैनन् । बजार सुनिश्चित हुने हो भने उत्पादन अझै बढाउन सकिन्छ”, मेयर रेग्मीले भने, “उत्पादित महले बजार नपाउँदा किसान निराश हुनुपर्ने अवस्था सिर्जना हुँदै गएको छ ।”

नेपालमा उत्पादित महको बजार बढाउनका लागि भारतबाट आउने मह रोक्नुपर्नेमा उनले जोड दिए । चितवनको कालिका नगपालिका सहित जिल्लामा मह उत्पादन निकै राम्रो भइरहेकाले अब उत्पादन भन्दा पनि बजारीकरणको चिन्ता बढ्दै गएको बताए । उनले महको बजारीकरणका लागि योजना बनाउन कृषि मन्त्री अधिकारीलाई सुझाव दिए ।

कार्यक्रममा नेपाल मौरीपालक महासंघका अध्यक्ष सुवास घिमिरे, निवर्तमान अध्यक्ष शिव पौडेल, वरिष्ठ उपाध्यक्ष पदम प्रसाद अम्गाई, नेपाल मौरीपालक महासंघका महासचिव सालकिराम बानिया, मौरीपालक संघ कालिकाका अध्यक्ष नारायण पौडेल, मौरीपालक संघ भण्डाराका निवर्तमान कार्यालय प्रमुख तथा मौरीपालक किसान बाबुराम पन्त, नेपाल मौरीपालक महासंघका केन्द्रिय अध्यक्ष जानुका थापा, केन्द्रिय कोषाध्यक्ष श्याम कृष्ण श्रेष्ठ, सदस्य रवि वहादुर अधिकारी, भण्डारा मौरी विकास केन्द्र कार्यक्रमका प्रमुख सुरज अम्गाई, किट विकास निर्देशनालयका प्रमुख सावित्रि वराल, राष्ट्रिय क्वारेन्टाईन कार्यालयका प्रमुख भोजराज सापकोटा, नेपाल मौरीपालक महासंघका जिल्ला उपाध्यक्ष कमल सापकोटा, कृषि विभागका विभागिय प्रमुख, मन्त्रालयका सह सचिव, डाबर नेपालका प्रतिनिधि, मौरीपालक किसान लगाएतले महको बजारीकरणमा देखिएका समस्याका विषयमा घनिभुत छलफल गरेका छन् ।