चितवन । त्रिशुलीमा हामफालेर आत्महत्या प्रयास गरेकी एक महिलाको उद्धार गरिएको छ । आज बिहान .८ बजेर ३५ बजेको समयमा जिल्ला चितवन इच्छाकामना गाउंँपालिका वडा नम्बर ५ मुग्लिङ त्रिशुली नदी किनार स्थित बाट परिचय नखुलेकी अन्दाजी २५ वर्षकी महिलाले हामफाली आत्महत्या गर्न प्रयास गरेकी जिल्ला प्रहरी कार्यालय चितवनले जनाएको छ ।

आत्महत्याको प्रयास गरेको खबर प्राप्त हुनसाथ ईलाका प्रहरी कार्यालय मुग्लिङबाट खटेर गएको प्र.ब.ना.नि टोलीले सकुशल उद्दार गरि ईलाका प्रहरी कार्यालय मुग्लिङमा ल्याइएको छ । उ

नको बिषयमा घर ठेगाना लगायत अन्य अनुसन्धान भईरहेको प्रहरीले जनाएको छ ।

रत्ननगर । लघुवित्त संस्था विरुद्ध संघर्ष समिति नेपालको गैंडाकोटमा सम्पन्न प्रथम राष्ट्रिय सम्मेलनले गरेको निर्णयको १० वटा जिल्ला संघर्ष समितिले असहमती जनाएका छन् ।

माघ १५ र १६ गते सम्पन्न प्रथम अधिवेशनले केन्द्रीय समिति विघटन गरी केन्द्रीय अध्यक्ष मणिराम ज्ञावलीलाई कार्यकारी अधिकारी प्रदान गर्दै ३५ सदस्यीय सचिवालय गठन गरिएको थियो । १० वटा जिल्ला समितिले चितवनको राप्तीमा सोमबार पत्रकार सम्मेलनको आयोजना गरी ६ महिना भित्र फेरी प्रथम राष्ट्रिय सम्मेलन गर्न माग गरेका छन् ।

चितवन सहित बाँके, बर्दिया, गोरखा, नवलपुर, मोरङ, सुनसरी, मकवानपुर, काभ्रेपलान्चोक, सप्तरी जिल्ला संघर्ष समितिले सयुक्त पत्रकार सम्मेलनको आयोजना गरी लघु वित्त संस्थाको ज्यादती विरुद्ध लडिरहेको संघर्ष समितिलाई कमजोर बनाउने नियतले सम्मेलनमा एकतर्फी निर्णय गराउन खोजिएको आरोप लगाइएको छ । १० जिल्लाका संघर्ष समितिले ६ वटा बुँदामा असहमती प्रकट गरेका छन् ।

सम्मेलनमा आर्थिक, संगठनिक तथा प्रगति प्रतिवेदन प्रस्तुत नगरिएको, निर्बाचन समितिले केन्द्रीय समिति गठन नगरी ३५ सदस्यीय सचिवालय गठन गरेको, अध्यक्ष ज्ञावलीले प्रस्तुत गरेको मागपत्रका राजनीति झलक देखिएको, निर्बाचन समितिले उम्मेदवारी दिने बाताबरण सृजना नगरेको, आन्दोलन परिचालन निर्देशिकामा माथी छलफल र बहस हुन नदिएको, अध्यक्षलाई कार्यकारी अधिकार प्रदान गरेको भन्दै त्यसको विरोध गरिएको हो ।

जिल्ला संघर्ष समितिहरुले अध्यक्षतालाई कार्यकारी अधिकार नदिई केन्द्रीय समितिलाई कार्यकारी अधिकार दिनुपर्ने माग गरेका छन् । पत्रकार सम्मेलनमा जिल्ला अध्यक्ष सहित केन्द्रीय सदस्यहरुले समेत सम्मेलनले गरेका निर्णयहरुको विरोध गरेका छन् । केन्द्रीय सदस्य दाता थारुले केन्द्रीय कमिटी विघटन गरी अध्यक्षलाई पूर्ण अधिकार दिएर सचिवालय गठन गर्नु अबैधानिक भएको बताए । हामीले व्यक्तिको विरोध गर्न खोजेका होइनौं उनले भने संघर्ष समिति विधिमा चल्नुपर्छ भन्ने खोजेका हौं । उनले ६ महिना भित्र फेरी प्रथम राष्ट्रिय सम्मेलन आयोजना गर्न माग गरे ।

केन्द्रीय समिति विघटन गरेर सचिवालय बनाउदा राम्रो सन्देश गएको छैन उनले भने ६ महिना भित्र फेरी सम्मेलन गरी केन्द्रीय समिति गठन गर्नुपर्छ । चितवन जिल्ला अध्यक्ष सुधा पाठकले फागुन १ गतेबाट सुरु हुने काठमाडौं केन्द्रीत आन्दोलनपछि प्रथम राष्ट्रिय सम्मेलन बोलाउन माग गरिन । फागुन १ गतेबाट सुरु हुने निर्णायक आन्दोलनलाई असर गर्ने कुनैपनि गतिविधि सञ्चालन नगर्ने भन्दै उनले आम्दोलनमा सशक्त उपस्थिति जनाउने बताइन् । हामीले आन्दोलनलाई कमजोर बनाउन सम्मेलनको निर्णयको विरोध गरेका होइनौं उनले भनिन् संघर्ष समितिलाई विधि र विधान बमोजिक चलाउन खोजेका हौं ।

पत्रकार सम्मेलनमा संघर्ष समितिका केन्द्रीय सल्लहाकार डिसी सुनार, नवलपुर जिल्ला अध्यक्ष टेकबहादुर भूजेल, लुम्विनी प्रदेश समिति सदस्य तथा बाँके जिल्ला सचिव प्रदिप दलामी लगायतले धारण राखेका थिए । पत्रकार सम्मेलन जिल्ला संघर्ष समिति चितवनकी अध्यक्ष सुधा पाठकको अध्यक्षतामा भएको थियो । विगत दुई बर्ष देखि लघुवित्त संस्थाहरुले आफ्ना ऋणि सदस्यहरु माथि गरेको ज्यादती विरुद्ध संर्घष समिति आन्दोलनमा छ ।

१‍. चुरोट छोड्ने बेलामा ‘एउटा मात्रै’ भन्ने विचार मनमा आउन दिनु हुँदैन । ‘एउटा मात्रै’ बाट शुरु गरेर फेरि पहिला जस्तै लत लाग्न सक्छ ।

२. आफूलाई काममा व्यस्त राख्नुहोस्, जसले गर्दा ध्यान चुरोटको सेवनतिर नजाओस् । चुरोटको सेवन गर्न इच्छा लागेमा ‘केहीबेर पर्खिन्छु’ भन्दै ध्यान अन्यत्र लग्नुहोस् ।

३. तपाईंले जुन ठाउँहरुमा पहिला चुरोटको सेवन गर्नुहुन्थ्यो, त्यहाँ नजानुहोस्। चुरोटको सेवन गर्ने व्यक्तिहरुको संगत केही दिनको लागि छोड्नुहोस् ।

४. यस अवधीभरिमा आफ्ना मित्रहरु र परिवारका सदस्यहरुलाई तपाईंको समक्षमा धुम्रपान नगर्दिन आग्रह गर्नुहोस् ।

५. राती चाँडै सुत्नुहोस्, आराम गर्नुहोस् र मानसिक तनाव कम गर्नुहोस् ।

६. चुरोटको सेवन छोडेपछि हुने फाइदाको बारेमा सोचेर आफ्नो मनोबल बढाउनुहोस् । शुरुको केही हप्तामा मात्रै अलिअलि अप्ठायारो भए पनि पछि चुरोट नखाने बानी बस्छ ।

७. चुरोट छोड्ने प्रयास गरेर असफल भए पनि निराश हुनु हुँदैन, किनभने चुरोट सफलता पुर्वक छाडिसकेको धेरै व्यक्तिहरु शुरुमा असफल भएका हुन सक्छन् । त्यसैले फेरी कोशिश गर्नुहोस् । एकदिन तपाईं चुरोटको लतबाट मुक्त हुनुहुन्छ ।

८. चुरोटको सेवन बन्द गरेको कुरा सबैलाई भन्नुहोस् । यसले तपाईंलाई पुनः सेवन गर्नबाट रोक्न मद्दत पुग्छ ।

काठमाडौं,२३ माघ । रुद्राक्ष आफ्नो दैवी शक्तिका कारण प्राचीन कालदेखि नै अत्यन्त शुभ मानिन्छ । भगवान महादेवको कृपा भएकाले मात्रै धारण गर्ने मौका पाउँछन् भनिन्छ । ’रुद्राक्ष’ को अर्थ – रुद्रको अक्ष अर्थात् शिवको आँसु।
यस अध्यात्मिक मोतीको उत्पत्ति कथाले यसलाई शिव स्वयंको वरदान किन मानिन्छ भनेर बताउँछ । त्यसोभए जानौं यससँग सम्बन्धित केही रहस्यमय कुराहरू, जुन यस प्रकार छन् ।

रुद्राक्षको उत्पत्ति कसरी भयो ?
रुद्राक्षको बारेमा धेरै प्रचलित कथाहरू छन् । पौराणिक कथा अनुसार त्रिपुरासुर नामक दैत्य थियो जसमा विभिन्न प्रकारको दिव्य शक्ति भएको थियो, जसका कारण उनी अति अहंकारी भए र देवता र ऋषिहरुलाई त्रास दिन थाले । तिनीबाट दिक्क भएर देवताहरूले शिवलाई मार्नको लागि प्रार्थना गरे।

देवताहरूको पीडा सुनेर भगवान शिव ध्यानमा लागे । यसपछि उनले आँखा खोल्दा उनको आँखाबाट आँसु आयो । उनको आँसु पृथ्वीमा जता झर्यो, त्यहाँ रुद्राक्षको रुख बढ्यो । साथै, त्रिपुरासुरलाई मारेर भगवान शिवले पुनः सम्पूर्ण विश्वमा शान्ति स्थापना गर्नुभयो।

मुखी रुद्राक्ष कति वटा पाइन्छ ?
रुद्राक्ष रुद्राक्षको रूखमा फल्ने प्राकृतिक रूपमा हुने सुख्खा फल हो । जप मालामा सामान्यतया १०८ रुद्राक्षहरू हुन्छन्। यी विभिन्न रूपहरूमा पाइन्छ, अर्थात् १ मुखीदेखि २७ मुखीसम्म। जसलाई धारण गर्ने भक्तहरूले ब्रह्मा, विष्णु र महेशको आशीर्वाद प्राप्त गर्छन्।

रुद्राक्ष धारण गर्ने नियम र समय
धार्मिक मान्यता अनुसार पूर्णिमा, अमावस्या, एकादशी आदि शुक्ल पक्षको तिथीमा रुद्राक्ष धारण गर्नुपर्छ । साथै, पवित्र धागो लगाउँदा विशेष ध्यान दिनुपर्छ। भोलेनाथको ध्यान गर्दा र ओम नमः शिवाय मन्त्र जप गर्दा रुद्राक्ष धारण गर्नुपर्छ।

काठमाडौ २३ माघ । पोखराको सूर्यदर्शन सहकारीका वचतकर्ताले राष्ट्रिय स्वतन्त्र पार्टीका सभापति रवि लामिछाने र माओवादी केन्द्रका विद्यार्थी नेता दीपेश पुनसहित व्यक्ति र संस्था गरी १८ जनाविरुद्ध जिल्ला प्रहरी कार्यालय कास्कीमा उजुरी दिएका छन् ।

सहकारी पीडितहरुले रास्वपा सभापति लामिछाने, पूर्वउपराष्ट्रपति नन्दबहादुर पुनका छोरासमेत रहेका अखिल क्रान्तिकारीका महासचिव दिपेश पुन, पूर्वअध्यक्ष ज्ञानबहादुर बमजन, नेचर हब प्रालि, गोर्खा मिडिया प्रालि, वारिसान इन्फर्मेसन टेक्नोलोजी, स्प्रिङ उड रियल स्टेट, गोर्खा ग्रुप इन्भेस्टेन्ट, गोर्खा आयुर्वेद प्रालिलगायतलाई विपक्षी बनाएका छन् । जिल्ला प्रहरी कार्यालय कास्कीले ‘पूरक’ जाहेरी दिएको पुष्टि गर्दै यो विषयमा पहिल्यै उजुरी दर्ता भएर अनुसन्धान जारी रहेकाले अहिले नयाँ जाहेरी दर्ता गर्नु नपर्ने जनाएको छ ।

सहकारीका बचतकर्ताले जम्मा गरेको रकम हिनामिना गरेको आरोपमा कोषाध्यक्ष कुमार रम्तेल उपाध्यक्ष कैलाशकुमार दर्लामी, सदस्य शिवबहादुर गुरुङ र भगिश्वर अर्याल पक्राउ परेर पुर्पक्षका लागि थुनामा रहेको
प्रहरीले जनाएको छ । सूर्यदर्शन सहकारी ठगी प्रकरणमा प्रहरीले जीबी राईसहित पक्राउ पुर्जी जारी गरेको १९ मध्ये १५ जना फरार छन् । सूर्यदर्शनका पदाधिकारीले बचतकर्ताको १ अर्ब ११ करोड बढी हिनामिना गरेको जाहेरीमा उल्लेख छ ।

उनीहरुलाई सहकारी ऐन अनुसार बिगो बराबरको जरिवाना र ८ देखि १० वर्ष कैद सजायको माग गरिएको छ ।

काठमाडौं । भारतीय टेलिभिजन गायन रियालिटी शो इन्डियन आइडलमा स्वरकलाको जादु छरेर सबैको मन जितेकी गायिका मेनुका पौडेललाई नेपालमा भव्य स्वागत गरिएको छ।

इन्डियन आइडलमा सहभागी भई सोमबार नेपाल फर्केकी उनलाई झापाको काकडभित्तामा भव्य स्वागत गरिएको हो। उनलाई गृहनगर झापामा सर्वसाधारणदेखि संघ संस्थाले फूलमालाले स्वागत गर्दै झाँकी र र्‍यालीसहित काँकडभिट्टा नगर परिक्रमा गराइएको थियो।

अभिनेता विल्सनविक्रम राई तक्मे बुढाले नेपाली कलाकारको प्रतिनिधित्व गर्दै मेनुकालाई सम्मान र स्वागत गरेका थिए। स्वागत समारोहमा मेनुकाले आफूले इन्डियन आइडलमा नसोचेको सफलता प्राप्त गरेको भन्दै सबैलाई धन्यवाद दिएकी थिइन् भने अबको एक वर्षसम्म आफू फिल्म, रेकर्डिङ र कन्सर्ट गायनमा व्यस्त हुने बताइन्।

इन्डियन आइडलको १४औं सिजनमा सहभागी गायिका मेनुका पौडेल प्रतिस्पिर्धाबाट बाहिरिएकी छन्। अन्तिम १० मा प्रतिस्पर्धा गरिरहेकी उनी आइतबार प्रसारित एपिसोडबाट बाहिरिएकी हुन्।

शोबाट बाहिरिएपछि उनले सामाजिक सञ्जालमार्फत् सो कुराको जानकारी गराएकी थिइन्।

‘मेरो इन्डियन आइडलको यात्रा यहीँ सकिएको छ। तर, मेरो जीवनको सांगीतिक यात्रा भर्खर शुरु भएको छ। म सबैजनालाई आश्वस्त तुल्याउन चाहन्छु कि मैले पहिलेभन्दा अझै सक्रियरूपमा गायन र प्रस्तुतिमार्फत् सबैलाई मनोरञ्जन दिन सक्नेछु। यो मेरो सुरुवात हो, समाप्ति होइन’ मेनुकाले सामाजिक सञ्जालमा लेखेकी छन्।

इन्डियन आइडलमा गायनको माध्यमबाट दर्शक तथा निर्णायकको मन जित्दै आएकी मेनुकाले शोमार्फत भारतीय फिल्म सालारबाट गायनमा डेब्यु गरेकी थिइन्।

रत्ननगर । चितवनमा फागुन १९ गते महिला, पुरुप सहभागी रोटरी मिनी म्याराथुन प्रतियोगिता हुने भएको छ । रोटरी क्लव अफ रत्ननगरले आयोजना गरेको सो प्रतियोगितामा महिला र पुरुषको छुट्टाछुट्टै प्रतियोगिता हुने छ ।

म्याराथुनमा ४०० बढी धावकहरुले प्रतिस्पर्धा गर्ने छन् । रोटरी क्लवले सोमबार रत्ननगरमा पत्रकार सम्मेलनको आयोजना गरी मिनी म्याराथुन गर्नुको उद्देश्य र तयारीको बारेमा जानकारी दिएको हो ।

यस अघि रोटरीले सन २०१९ मा पहिलो संस्करणको मिनी म्याराथुन प्रतियोगिता गरेको थियो । फागुन १९ गते हुने मिनी म्याराथुन दोस्रो संस्करण हो ।

भरतपुर भ्रमण बर्ष र समग्र जिल्लाको पर्यटन विकासको लागि म्याराथुन प्रतियोगिता आयोजना गरिएको रोटरी क्लव अफ रत्ननगरका पूर्व अध्यक्ष तथा रोटरी मिनी म्याराथुन प्रतियोगिताका संयोजक विपिन पोखरेलले बताए ।

पुरुष धावकहरुलाई नारायणगढ देखि रत्ननगरको निपनी सम्म साढे १५ किलोमिटर र महिला धावकहरुलाई भरतपुरको सिमानादेखि रत्ननगरको निपनी सम्म पाँच किलोमिटर दुरी कायम गरिएको पोखरेलले बताए ।

कार्यक्रम नारायणी नदीको किनारमा उद्घाटन भएर रत्ननगरको निपनी स्थित होटर स्टार चितवनमा समापन गर्ने तयारी गरिएको प्रतियोगिताका संयोजक पोखरेलले जानकारी दिए ।

पुरुष तर्फ प्रथम हुनेलाई एकलाख नगद सहित प्रमाणपत्र र चाँदीको मेडल, द्धितीय हुनेलाई ५० हजार नगद सहित प्रमाणपत्र र चाँदीको मेडल, तृतीय हुनेलाई २५ हजार नगद सहित प्रमाणपत्र र चाँदीको मेडल, चौथो हुनेलाई १० हजार नगद सहित प्रमाणपत्र, पाँचौं हुनेलाई पाँच हजार नगद सहित प्रमाणपत्र, छैठौं देखि दसौं सम्म हुनेलाई तीन हजार नगद सहित प्रमाणपत्र र दुरी पुरा गर्ने चेपाङ समुदायका धावकहरुलाई जनही २ हजार नगद सहित प्रमाणपत्र प्रदान गरिने रोटरी क्लव अफ रत्ननगरका अध्यक्ष हरिकुमार श्रेष्ठले जानकारी दिए ।

महिला तर्फ प्रथम हुनेलाई २० हजार नगद सहित प्रमाणपत्र र चाँदीको मेडल, द्धितीय हुनेलाई १० हजार नगद सहित प्रमाणपत्र र चाँदीको मेडल, तृतीय हुनेलाई ५ हजार नगद सहित प्रमाणपत्र र चाँदीको मेडल, चौथो हुनेलाई ३ हजार नगद सहित प्रमाणपत्र, पाँचौ हुनेलाई २ हजार ५०० नगद सहित प्रमाणपत्र, छैठौं देखि दसौं सम्म हुनेलाई २ हजार नगद सहित प्रमाणपत्र र दुरी पुरा गर्ने चेपाङ महिलालाई एक हजार नगद सहित प्रमाणपत्र प्रदान गरिने अध्यक्ष श्रेष्ठले जानकारी दिए ।

१५ किलोमिटरको दुरीमा हुने खुल्ला म्याराथुनमा राष्ट्रिय स्तरका धावकहरु, नेपाली सेना, नेपाल प्रहरी, सशस्त्र प्रहरीले सहभागिता जनाउने र सीमान्तकृत चेपाङ समुदायको प्रोत्सहानका लागि चेपाङ समुदायबाट प्रतिस्पर्धामा सहभागी गराउने योजना बनाइएको छ ।

रोटरी मिनी म्याराथुन प्रतियोगिता मार्फत समग्र जिल्लाको पर्यटन प्रर्वद्धन र जिल्लाको पहिचान गराउने उद्देश्य रहेको प्रतियोगिताका संयोजक पोखरेलले बताए ।

पत्रकार सम्मेलनमा रोटरीका असिस्टेन गर्भनर सुरेन्द्रनाथ रेग्मीले समाज रुपान्तरणको लागि रोटरीले अहिले सम्म गरेका कामहरुको बारेमा जानकारी गराएका थिए ।

उज्यालो नेपाल –  चितवनको कालिकामा  ब्युटीपार्लर तालिम सुरु गरिएको छ। कालिका नगरपालिकाको आयोजनामा ‘ गरिवी निवारणको लागि लघु उद्यम विकास कार्यक्रम ‘ अन्तर्गत तालिम सुरु गरिएको हो।

तालिमको आज एक कार्यक्रमका बीच मेयर विनोद रेग्मीले उद्घाटन गरे। उद्घाटन कार्यक्रममा बोल्दै मेयर रेग्मीले तालिमको सहि सदुपयोग गर्न आग्रह गरे।

‘तालिम लिएपछि आफू मात्र राम्री बन्ने हैन, व्यावसायिक बन्न आग्रह ‘ गर्दै, रेग्मीले तालिम लिएकाहरुले उद्यम सुरुगरे मात्र नगरपालिकाको लगानी सदुपयोग हुने विचार व्यक्त गरे। आधारभूत तालिम लिए पश्चात व्यवसाय सुरु गर्ने महिलाहरूलाई अर्को वर्ष एडभान्स तालिमको आयोजना गर्ने उनले प्रतिबद्धता व्यक्त गरे।

उद्घाटन कार्यक्रममै बोल्दै प्रमुख प्रशासकीय अधिकृत चुडामणि शर्मा गौतमले नगरपालिकाले ल्याएको कार्यक्रमले बाट सिप सिकेर त्यो सीप प्रयोग गरी जीविकोपार्जन सहज बनाउन प्रशिक्षार्थीहरूलाई आग्रह गरे।

कार्यक्रममा सहभागीहरूलाई स्वागत गर्दै सामाजिक सुरक्षा तथा पञ्जीकरण शाखा प्रमुख प्रकाश चन्द्र पौडेलले सीप सिकेका व्यक्ति कहिले पनि भोकै मर्नु नपर्ने कुरा बताए।

कालिका वडा नम्बर ६ का वडा अध्यक्ष टिकाराम रेग्मीको सभापतित्वमा भएको कार्यक्रम लघु उद्यम सहजकर्ता सन्तोषी कुमालले सञ्चालन गरेकी थिइन्।

२५ जना महिला प्रशिक्षार्थीहरू रहेको तालिम ४५ दिनसम्म सञ्चालन हुनेछ।

वीरगन्ज । पूर्वराजा ज्ञानेन्द्रले वीरगन्ज पुगी गएको १३ माघमा दल र नेताको कामबारे  कटाक्ष गरेलगत्तै वीरगन्जमा भीआईपीको ताँती नै लाग्न थालेको छ ।

पूर्वराजा ज्ञानेन्द्र फर्केको दुई दिन बित्न नपाउँदै गएको १५ माघमा प्रधानमन्त्री पुष्पकमल दाहाल ‘प्रचण्ड’ वीरगन्जमा आइपुगेका थिए । उनी फर्कने क्रममा बाराको सिमरा पुगेर राजदरवार हत्याकाण्ड बारे पुन छानविन गर्नेसम्मको प्रतिक्रिया दिएका थिए । प्रधानमन्त्रीले यो प्रतिक्रिया दिनुको कारण पूर्वराजा ज्ञानेन्द्रले २०५८ सालको राजदरबार हत्याकाण्डमा आफूहरुलाई बेतुकको लाग्छना लगाइएको तर्क गर्दै जनतामा भ्रम छरिएको बताएको काउन्टर थियो । प्रधानमन्त्री प्रचण्डले यही कुरालाई संकेत गर्दैै बाराको सिमरामा सञ्चारकर्मीसँग छोटो प्रतिक्रिया दिंदै राजदरबार हत्याकाण्ड पुनः छानबिन हुनेभनी पूर्वराजाको भनाइप्रति कटाक्ष गरेका थिए ।

पूर्वराजा ज्ञानेन्द्र राजावादी समर्थकले उनैलाई गर्ने नागरिक अभिनन्दनका लागि भनी वीरगन्ज आएका थिए । प्रधानमन्त्री प्रचण्ड भने आफ्नै पार्टी माओवादी केन्द्र निकटका पत्रकारहरुको संगठन प्रेस सेन्टरको स्थापना दिवस र राष्ट्रिय बैठकको समापनलाई सम्बोधन गर्न भनी यहाँ आइपुगेका थिए ।

यी दुई भीआईपी मात्र नभई एक साताभित्र मोफसलको जिल्ला पर्सा वीरगन्जमा अर्का भीआईपीमध्ये नेपाली कांग्रेजका महामन्त्री गगनकुमार थापा पनि आइपुगेका छन् । स्थानीय अंकुश दैनिक पत्रिकाको रजत महोत्सव समारोहमा सरिक हुन भनी उनी पनि यहाँ आएर डेमोक्रेसीभन्दा अर्को विकल्प नभएको भनी फर्केका छन् । राजाका समर्थकले राजा आउ देश बचाऊ भनी वीरगन्जमा लगाएको नारा र पूर्वराजा ज्ञानेन्द्रको कडा सम्बोधन पछि उल्टो बाटोमा राजनीति फर्किने संकेत गरेको विरोधकै शैलीमा डेमोक्रेसीको विकल्प नभएको महामन्त्री थापाले जिकिर गरे ।

उनले यो व्यवस्थाभित्र भएका नराम्रा पक्ष सुधार गर्दै गएर यो व्यवस्थामा नै राम्रा काम गर्नुपर्नेमा जोड दिए । ‘यहाँका नराम्रा पक्ष हटाउन हामी सक्छौं’, हामीले अग्रसरता गर्नैपर्छ, त्यसका लागि पहिले आफैंबाट सुधारको सुरुवात गर्नुपर्छ, स्टेटको मेकानिज्म जुन राम्रो गर्नेभन्दा पनि नराम्रोमा लागेको छ । अब यसलाई सुधार गरेर टुंगोमा पुग्ने–पु¥याउने गर्नुपर्छ, प्रत्येक कुराको सुधारको जिम्मा हाम्रो हो । सदनमा सबैभन्दा ठूलो दल नेपाली कांग्रेस पार्टी छ । देशभरि अधिकांश प्रदेशमा पनि काँग्रेसकै सरकार छ । अनि ३ सय ३२ पालिकाको प्रमुख पनि नेपाली कांग्रेसकै व्यक्ति छ । अनि यहाँका कमजोरी अरू कसले हटाउँछ ? हामीले नै हटाउनुपर्छ ।’

वीरगन्ज महानगरका प्रमुख राजेशमान सिंह र यो मुद्दामा बढी चासो देखाइरहेका स्थानीय कांग्रेसकै केही नेता कार्यकर्तातर्फ संकेत गर्दै उनले नागरिकतामा गल्ती गर्नेले वा दोहोरो नागरिकता बनाउने कसैले छुट पाउन नहुने जिकिर गरे । ‘नागरिकतामा किर्ते गर्ने कसैले पनि छुटकारा पाउन हुँदैन,’ उनले थपे । एमालेले पूर्व–पश्चिम राष्ट्रिय अभियान सम्पन्न गरेको केही दिनमा नै महामन्त्री थापाकै अग्रसरतामा झापाबाट काँग्रेसका स्थानीय नेता कार्यकर्ता भेट्दै उनी तल्लो तहका नेता कार्यकर्ताका कुरा बुझ्दै धनुषा हँुदै पर्सासम्म आइपुगेका पनि हुन् । शनिबार पर्साको ठोरी हुँदै चितवन जाने कुरा पनि उनले यहाँ खुलासा गरे ।

अंकुश दैनिक पत्रिकाका प्रधान सम्पादक दीपेन्द्र चौहानको अध्यक्षतामा भएको पत्रिकाको रजत महोत्सव कार्यक्रममा प्रतिनिधिसभा सदस्य तथा जसपाका नेता प्रदिप यादव, वरिष्ठ पत्रकार हरिहर विरही, कविर राणा नेपाली कांग्रेसका पूर्वमन्त्री अजय चौरसिया, कांग्रेसका केन्द्रीय सदस्य अजयबाबु शिवाकोटीलगायतले सञ्चारमाध्यम र खास गरी छापा माध्यमको वर्तमान अवस्था र सुधार गर्नुपर्ने पक्षबारे आआफ्ना विचार व्यक्त गरेका थिए ।

काठमाडौँ, माघ २१ गते । एकै पटकमा तिम्ल्याहा सन्तान जन्मिएको समाचार नौलो होइन तर पूर्वप्राथमिकदेखि स्नातक तहसम्म एउटै विषय अध्ययन गरेको समाचार सबैका लागि रोचक हुन सक्छ ।

तिम्ल्याहा दिदीबहिनी लबिबा खातुन, अतिका खातुन र सबिका खातुन अहिले नर्सिङको स्नातक तहमा अध्ययनरत छन्  । लबिबा महाराजगन्जस्थित इन्स्टिच्युट अफ मेडिसिन (आइओएम), सबिका धरानस्थित बिपी कोइराला स्वास्थ्य विज्ञान प्रतिष्ठान र अतिका पोखरा नर्सिङ क्याम्पसमा भर्नाभएका हुन्  । उनीहरुले गत वर्ष चिकित्सा शिक्षा आयोगद्वारा सञ्चालन गरेको एकीकृत प्रवेश परीक्षामा सहभागी भई छात्रवृत्तिमा नाम निकाल्न सफल भएका थिए ।

२०६२ चैत १६ गते वीरगन्जमा जन्मिनुभएका उनीहरु बिच पढाइमा सानैदेखि प्रतिस्पर्धा नै चल्थ्यो । प्राथमिक तहसम्म त उनीहरु संग प्रथम, द्वितीय र तृतीय स्थानका लागि अन्य विद्यार्थीले प्रतिस्पर्धा गर्न सक्दैनथे । उनीहरुले  माध्यमिक तहसम्म फरक स्थानका विद्यालयमा अध्ययन ग्रे । “बाबु सरुवा भएर जता जानुहुन्थ्यो हामीलाई पनि त्यतै लैजानुहुन्थ्यो । त्यही भएर स्कुल पनि परिवर्तन भइरहन्थ्यो,” तिम्ल्याहामध्येकी अतिकाले भनिन् ।

समिन अहमद र सबिला खातुनका तिम्ल्याहा सन्तान कक्षा १ देखि ५ सम्म काठमाडौँको सिनामङ्गलस्थित गुह्येश्वरी माध्यमिक विद्यालयमा पढेका थिए । पढाइमा अब्बल भएकै कारण उनीहरु  कक्षा ६ नपढी इटहरीको कञ्चनजङ्घा बोर्डिङ स्कुलमा भर्ना भए । पर्साको विन्ध्यवासिनी गाउँपालिका–५, निवासी समिन अहमद मस्जिदमा नमाज पढाउने शिक्षक हुन्  । यसैले गर्दा उनको बेलाबेलामा सरुवा भइरहन्थ्यो ।

उनीहरुले कञ्चनजङ्घामा कक्षा ७ र ८ पढेपछि काठमाडौँको शिवपुरी माध्यमिक विद्यालयमा कक्षा ९ र १० पूरा गरे  ।  तिनै जनाले माध्यमिक शिक्षा परीक्षा (एसइई) मा समान ग्रेड अर्थात् ३.९ जिपिए प्राप्त गरेका थिए  । उनीहरुले कक्षा ११ र १२ त्रिपुरेश्वरस्थित विश्वनिकेतन माध्यमिक विद्यालयबाट पूरा गरेका हुन्  ।

तीन जनाका एक जना भाइ छन् । विविध कारणले कक्षा १२ सम्म अध्ययन गर्न पाएकी आमा सबिला खातुनलाई पनि नर्सिङ अध्ययन गर्ने इच्छा भए पनि सो पूरा गर्न पाईनन्! तर आफ्नो सपना छोरीहरूले पूरा गर्न लागेकामा खुसी छिन्  ।

आमा सबिलाले साबिकको एसएलसी परीक्षा दिँदै गर्दा तेस्रो दिन तिम्ल्याहा छोरीलाई जन्म दिएकी थिइन्  । छोरीहरूको जन्म पछि उनि  थप विषयको परीक्षा दिन वञ्चित भईन् र बल्ल अर्को वर्ष एसएलसी परीक्षा उत्तीर्ण गरिन्  ।

उनले भनिन् , “मेरो पनि चाहना त चिकित्सा क्षेत्रमै जाने थियो । विविध कारणले मेरो इच्छा पूरा भएन । मेरो इच्छा छोरीहरूले पूरा गर्दै छन्, खुसी लागेको छ ।” गोरखापत्र दैनिकमा खबर छ !!