रत्ननगर, पुस ७ । रत्ननगर वडा नं २ टाँडी स्थित अविरल बहुउद्देश्यीय सहकारी संस्थाले एक बर्षमा करिब २६ लाख मुनाफा गर्न सफल भएको छ । शनिबार सम्पन्न सो सहकारीको तेस्रो बार्षिक साधारण सभामा प्रस्तुत गरिएको आर्थिक प्रतिवेदनमा आर्थिक बर्ष २०७९/८० मा २५ लाख ७७ हजार मुनाफा भएको उल्लेख छ ।

एक बर्षमा १ करोड २८ लाख १४ हजार आम्दानी गरेको सो सहकारीले १ करोड २ लाख ३६ हजार खर्च कटाएर २५ लाख ७७ हजार मुनाफा भएको सहकारीका व्यवस्थापक भरत दाहालले जानकारी दिए ।

२०७७ साल फागुन १० गते स्थापना भएको सो सहकारीको कुद शेयर पूँजी ५ करोड २६ लाख ९६ हजार, ऋण लगानी ६ करोड ९४ लाख ८६ हजार रहेको छ ।

सो सहकारीले उद्योग, व्यापार,व्यासाय सञ्चालन, कृषि, शैक्षिक, बैदेशिक रोजगार,व्यक्तिगत, आकस्मिक, हायरपर्चेज, आवास निर्माण, घरजग्गा खरिद लगायतका शिर्षकमा ऋण लगानी गर्दै आएको छ ।

रत्ननगर उद्योग बाणिज्य संघका अध्यक्ष शंकर गिरी प्रमुख अतिथि रहेको सो कार्यक्रममा सहकारीका अध्यक्ष ज्ञानबहादुर विसुरालले भावि कार्ययोजना तथा आयव्याय विवरण तथा कोषाध्यक्ष विरञ्जना सापकोटाले आर्थिक प्रतिवेदन प्रस्तुत गरेकी थिइन् । कार्यक्रमका संघका अध्यक्ष गिरीले व्यवसायको विकास र कृषि प्रर्वधनको क्षेत्रमा लगानी बढाउन सहकारीलाई आग्रह गरे ।

संघका अध्यक्ष विसुरालले बचत तथा ऋणको अलवा सहकारीले कृषि एग्रोभेट समेत सञ्चालन गरिरहेको बताए । शेयर सदस्यको आवश्यकतालाई मध्यनजर गरी लगानी गरिरहेको भन्दै उनले कृषि क्षेत्रको विकासमा जोड दिएको बताए ।

कार्यक्रममा तीन जना असल ऋणि, तीन जना बचत कर्ता सहित उत्कृष्ट कर्मचारीको रुपमा सन्तोष रेग्मीलाई सम्मान गरिएको थियो ।

संस्थाका अध्यक्ष विसुरालको अध्यक्षतामा भएको कार्यक्रममा जिल्ला बहुउद्देश्यीय सहकारी संघका सचिव भीष्मप्रसाद खनाल, जिल्ला दुग्ध उत्पादक सहकारी संघका सल्लाहकार एकनारायण पौडेल, रत्ननगर रेडक्रस उपसभापति अनु गौतम, संरक्षण कृषि सहकारी संस्थाका अध्यक्ष रामप्रसाद सापकोटा लगायतले मन्तव्य राखेका थिए ।

संस्थाका सचिव रघुनाथ भट्टले सञ्चालन गरेको सो कार्यक्रममा उपाध्यक्ष गोपालराज कर्मचार्यले स्वागत मन्तव्य राखेका थिए । साधारण सभाको बन्दसत्रले अध्यक्षले प्रस्तुत गरेका दुई प्रतिबेदन र कोषाध्यक्षले प्रस्तुत गरेको आर्थिक प्रतिवेदन सर्वसम्मत पारित भएको छ । सो सहकारीको ८८७ जना शेयर सदस्य रहेका छन् ।

उज्यालो नेपाल, पुस ७ – रत्ननगरको वडा नं. १५ मा रहेको विन्देश्वरी आधारभूत विद्यालयका विद्यार्थीहरुलाई न्यानो कपडा वितरण गरिएको छ।

विन्देश्वरी टोल विकास संस्थाले देउसीभैलो खेलेर संकलन गरेको रकम बाट विद्यालयमा आवासीय रुपमा अध्ययनरत १२० जना विद्यार्थीलाई न्यानो कपडा वितरण गरिएको हो। विद्यालयमा कालिका, ईच्छाकामना र राप्तीका विपन्न चेपाङ समुदायका बालबालिका आवासीय रुपमा अध्ययनरत छन्।

टोल विकास संस्थाले दशैंमा टोल स्तरीय प्रतियोगितामा दोश्रो भई जितेको खसी विक्री गरी प्राप्त रकम र देउसीभैलो बाट संकलित रकम बाट विद्यार्थीलाई न्यानो कपडा, खेलाडी सम्मान, टोलका मुख्य चोकहरुमा भ्यापर लाईट जडान लगायतको कार्य गरिएको संस्थाका अध्यक्ष ज्ञान बहादुर थिङले जानकारी दिए।

विद्यालयमा शनिवार आयोजित एक कार्यक्रममा विद्यार्थीलाई न्यानो कपडा वितरण र विभिन्न प्रतियोगिताहरूमा टोलबाट प्रतिनिधित्व गर्दै खेल प्रदर्शन गर्न खेलाडीहरुलाई सम्मान गरिएको हो।

कार्यक्रममा वडाध्यक्ष आशिक तामाङ, वडा सदस्यहरु, विभिन्न संघसंस्थाका प्रतिनिधि र सरोकारवालाहरुको उपस्थिति रहेको थियो।

संस्थाका कार्यसमिति सदस्य दीपक भट्टराईले सञ्चालन गरेको कार्यक्रममा उपाध्यक्ष भोजराज रेग्मीले स्वागत मन्तव्य राखेका थिए।

भरतपुर । होटल व्यवसायी संघ चितवनले क्याम्पा चौरमा आयोजना गर्न लागेको रैथाने फुड फेस्टिबल तथा वृहत सांस्कृतिक कार्यक्रमको तयारी तीव्र पारिएको छ । अङ्ग्रेजी नयाँ वर्ष २०२४ तथा तमु ल्होसारको अवसरमा पुस १४ गतेदेखि १८ गतेसम्म फुड फेस्टिबल हुन लागेको हो । फुड फेस्टिबलमा साना ठुला गरी ३९ वटा स्टल रहनेछन् । जसमा ३४ साधारण र ५ वटा विशेष स्टल रहनेछन् ।

फुड फेस्टिबलका लागि स्टल बुकिङ खुला गरिएको होटल व्यवसायी संघ चितवनका अध्यक्ष लोकनाथ भट्ट (कृष्ण)ले जानकारी दिनुभयो । साधारण स्टललाई २० हजार र विशेष स्टललाई ४० हजार रुपैयाँ शुल्क राखिएको उहाँले बताउनुभयो । फुड फेस्टिबलमा रैथाने खानेकुरालाई प्राथमिकता दिइएको छ भने विविध सांस्कृतिक कार्यक्रमहरु पनि हुनेछन् ।

फुड फेस्टिबलमा पशुपती शर्मा, प्रिति आले, अनु चौधरी, हास्य कलाकार सुवोध गौतम, सुप्रिम मल्ल ठकुरी, कर्णराज गिरी, प्रजापती पराजुली, स्वप्न सुमन, ढाकाराम पौडेल, राष्ट्रिय लोक तथा दोहोरी प्रतिष्ठान चितवनका कलाकारहरु लगायत अन्य राष्ट्रिय तथा स्थानीय कलाकारहरुको प्रस्तुती रहने होटल व्यवसायी संघ चितवनका सचिव कृष्णकुमार महतोले जानकारी दिनुभयो । साथै स्याडोज व्याण्डको प्रस्तुती पनि हेर्न सकिने महतोले बताउनुभयो ।

फुड फेस्टिबलको मुख्य प्रायोजक गोर्खा बु्रअरी प्रालि र सहप्रायोजकमा नेपाल लिक्वर्स प्रालि रहेको छ भने हस्पिटालिटी पार्टनरमा होटल ह्यापी होम र ग्यालेक्सी गार्डेन रिर्सोट रहेका छन्् । वल्र्डलिंक कम्युनिकेशनले फुड फेस्टिबलमा निःशुल्क इन्टरनेट उपलब्ध गराउने भएको छ ।

कालिका, ६ पौष । स्थापना भएको ५३ औं वर्ष पुगेको अवसरमा भीमोदय नमुना माध्यमिक विद्यालयले आजदेखि सप्ताहाव्यापी कार्यक्रमगर्दै स्वर्णमहोत्सव मनाउँदैछ । २०२७ सालमा पुरानो पदमपुर (निकुञ्जभित्र)मा स्थापना विद्यालयले स्थापना भएको ५३ वर्ष पुगेको अवसरमा सप्ताहाव्यापी रुपमा विभिन्न कार्यक्रम आयोजनागर्दै स्वर्णमहोत्सव मनाउन लागेको हो ।

पौष ६ गतेदेखि १३ गते सम्म आयोजनाहुने स्वर्ण महोत्सवको कालिका नगरपालिकाका मेयर विनोद रेग्मीले शुक्रवार (आज ) एक समारोहका बीच उद्घाटन गर्नुभयो ।

उद्घाटन कार्यक्रममा बोल्दै मेयर रेग्मीले शैक्षिक क्षेत्रको विकास नभए सम्म सम्बृद्ध नगर बनाउने योजना पुरा नहुने बताउनुभयो । कालिकाले शैक्षिक क्षेत्रमागर्नुपर्ने काममध्ये पूर्वाधार निर्माणलाई प्राथमिकता दिएर कामगर्दै आएको समेत उहाँले जानकारी दिनुभयो ।

शैक्षिक क्षेत्रमा पूर्वाधार निर्माणले मात्रै नपुग्ने भन्दै मेयर रेग्मीले शैक्षिक गुणस्तर सुधारमा समेत ध्यानदिनुपर्ने बेला भएको उहाँको भनाई छ । कार्यक्रमका प्रमुख अतिथि समेत रहनुभएका मेयर रेग्मीले शिक्षालाई आयआर्जनसँग जोड्न सके कालिका सम्बृद्ध नगरपालिकाको रुपमा विकासहुन धेरै समय नलाग्ने स्पष्टपार्नुभयो ।

कार्यक्रममा वडा अध्यक्षहरुको तर्फवाट सामाजिक विकास समिति संयोजक समेत रहनुभएका वडा नं. ४ का वडा अध्यक्ष मकरमान श्रेष्ठ, मैयादेवी ट्रष्ट एवम् मैयादेवी कन्या कलेजका टंकनाथ पौडेलले बोल्नुभएको थियो ।

विद्यालय व्यवस्थापन समिति सदस्य गोपालजी गुप्ताले स्वागत मन्तव्य राख्नुभएको कार्यक्रम विद्यालय व्यवस्थापन समितका अध्यक्ष अमृत श्रेष्ठको अध्यक्षतामा आयोजना गरिएको हो ।

उद्घाटन कार्यक्रममा मैयादेवी ट्रष्ट एवम् मैयादेवी कन्या कलेजका टंकथान पौडेल मैदादेवी कन्या कलेज र भीमोदय बीच सुमधुर सम्बन्ध कायम राख्नका लागि मैयादेवी ट्रष्टवाट छात्रा प्रतिभा पुरस्कारका लागि १ लाख १ हजार १ सय ११ रुपैयाँको अक्षय कोष स्थापनागर्ने घोषणागर्नुभयो । उद्घाटन समारोहमै नगर प्रमुख र विद्यालय व्यवस्थापन समितिका अध्यक्षलाई घोषण गरिए बराबरको रकम (चेक) पौडेलले हस्तान्तरण समेत गर्नुभयो ।

उद्घाटनपछि नगर प्रमुख लगायत आमन्त्रीत पाहुनाहरुले विद्यालय परिसरमा राखिएको विज्ञान तथा प्रविधि प्रदर्शनीमा सहभागी भएका थिए । यस्तै आजै विभिन्न विद्यालयहरु बीच आयोजना गरिएको मेत्रीपूर्ण भलिवल प्रतियोगीताको समेत मेयर रेग्मीले उद्घाटनगर्नुभयो ।

स्वर्ण महोत्सव सफल बनाउन विद्यालयले विभिन्न २९ वटा उप–समिति गठन गरेको छ । विद्यालय परिसरमा स्वर्ण स्तम्भ, स्वर्णगेट निर्माण लगायतका पूर्वाधार निर्माणको काम गरिरहेको छ । स्वर्ण महोत्सवको अवसरमा विज्ञान प्रविधि सामग्री प्रदर्शन, जिल्ला स्तरिय निबन्ध लेखन प्रतियोगीता, भाषणकला प्रतियोगीता, जिल्ला स्तरिय क्वीज प्रतियोगीता, रक्तदान, निशुल्क स्वास्थ्य परीक्षण, लोकसंस्कृति प्रदर्शनी, पूर्व विद्यार्थीहरुको मिलनभेला, शैक्षिक बहस लगायतका कार्यक्र हुने विद्यालयका प्रधानाध्यापक इन्द्रनाथ पौडेलले जानकारी दिनुभयो ।

चितवनको रत्ननगर नगरपालिकाका प्रमुख प्रशासकीय अधिकृत छविलाल सुवेदीको बिदाई गरिएको छ ।

बन मन्त्रालयमा सरुवा भएका सुवेदीलाई शुक्रबार नगरपालिकाका जनप्रतिनिधी, कर्मचारी र विभिन्न संघ संस्थाले बिदाई गरेका हुन् ।

१७ महिना अघिदेखि रत्ननगर नगरपालिकाको प्रमुख प्रशासकीय अधिकृतको रुपमा कार्यरत सुवेदीको बन मन्त्रालयमा सरुवा भएको हो ।

सुवेदीलाई नगर प्रमुख प्रलाद सापकोटा, उपप्रमुख यादव प्रसाद पाठक लगायतले फुलमाला सहीत मायाको चिनो प्रदान गर्दै बिदाई गरेका हुन् ।

सुवेदीको सरुवा भएसँगै रत्ननगर नगरपालिकाको प्रमुख प्रशासकीय अधिकृतमा सुकदेव लम्साल आउने भएका छन् ।

ठुलीभेरी नगरपालिका डोल्पामा कार्यरत लम्सालको रत्ननगरमा सरुवा भएको हो।

राप्ती । नेकपा एकीकृत समाजबादी राप्ती नगर कमिटीको अध्यक्षमा रामकुमार पण्डित चयन भएका छन् । विहीबार सम्पन्न सो पार्टीको प्रथम नगर अधिवेशनले पण्डितको अध्यक्षतामा नयाँ कमिटी गठन गरेको हो ।

कमिटीको उपाध्यक्षमा राजकुमार रुम्बा, सचिवमा राजकुमार विक, उपसचिवमा दीपक गोेले, ललीता चौधरी, योगेश तामाङ चयन भएका छन् । नगर कमिटी सदस्यमा माधव घिमिरे, कल्पना राई, रिता ओली, कृष्ण बहादुर डिमडङ, श्रीधर चौलागाई, अनिता उप्रेती, बृद्धिमाया श्रेष्ठ, गायत्री रुवाली, हर्क लोप्चन, नर्व लामा, कमला पौडेल, अन्जन रेग्मी, मिरा अम्गाई, सम्झना थापा, विकास विक, संजिव सुनार, शुष्मा प्रजा, लालीमाया थिङ, हरिबहादुर तामाङ, आशमान प्रजा, सन्तराम प्रजा र अमृता प्रजा चयन भएका छन् ।

खसआर्य तथा अन्य कोटाबाट डम्बर बहादुर रिमाल, एकराज पाण्डे, प्रविण खनाल, बालकृष्ण श्रेष्ठ, भवानी पाठक, शान्तिराम सापकोटा, दलीत कोटाबाट चुडामणि दर्जी, सन्त परियार, भिम बहादुर विसुन्के, जनजाती कोटाबाट वाबुराम चौधरी, सुरेन्द्र चौधरी, लक्ष्मण श्रेष्ठ, कृष्ण गुरुङ, युवाकोटाबाट सुदिप गिरी, हिरा बहादुर श्रेष्ठ, अनिल अधिकारी, विना दर्जी, अप्सरा थापा महिला कोटाबाट भरती थापा, तिलकुमारी राई, रिता चेपाङ, कृष्णमाया मानन्धर र अमृता पुलामी मगर नगर कमिटी सदस्यमा चयन भएका छन् ।

राप्ती नगर अधिवेशन नेकपा एसका अध्यक्ष माधव कुमार नेपालले उद्घाटन गरेका थिए । सो अबसरमा नेता नेपालले भ्रष्टाचारीका विरुद्धमा पार्टी एकजुट भएर लाग्नुपर्ने बेला आएको बताए । भष्टाचारकै कारण मुलुक संकटमा फसेको भन्दै उनले स्वच्छ राजनीति अहिलेको अपरिहार्य आवश्यकता रहेको बताए । भ्रष्टाचारीका विरुद्धमा पार्टी एकजुट भएर लाग्नुपर्ने बेला आएको छ उनले भने भ्रष्टाचारीले उन्मुक्ति पाउनु हुँदैन । देशमा सुशासन जरुरी रहेको बताउदै उनले भ्रष्टाचार र अनियमिततामा संलग्न जोकोहीलाई पनि कारबाही गर्नुपर्ने बताए । अध्यक्ष नेपालले आर्थिक विकासको आधार कृषि उद्योग, जलश्रोत रहेको बताउदै यसको समायोजित विकास गर्न सके देशले कोल्टो फेर्ने धारणा राखे ।

कार्यक्रममा सो पार्टीका उपमहासचिव गंगाराज मानन्धर, राप्ती नगरपालिकाका मेयर तथा सो पार्टीका जिल्ला कमिटी सचिवालय सदस्य शमशेर लामा, जिल्ला कमिटी अध्यक्ष अरुणपीडित भण्डारी, वडा नं ७ की वडा सदस्य तथा प्रदेश कमिटी सदस्य सुमिता डल्लाकोटी लगायतले मन्तव्य राखेका थिए । अधिवेशन राम सेढाईको अध्यक्षतामा भएको थियो ।