सामुन्द्रिक तटको झल्को दिनेगरी रेणु दाहालको अगुवाईमा नारायणी किनारमा ‘रिभर साइड बिच’ निर्माण सुरु
चितवन । भरतपुर महानगरपालिका र उद्योग बाणिज्य संघ चितवनको साझेदारीमा नारायणी नदी किनारमा ‘रिभर साइड बिच’ निर्माणको काम सुरु भएको छ । महानगरको ८० प्रतिशत र संघको २० प्रतिशत लगानी साझेदारीमा रिभर साइड बिच निर्माण सुरु गरिएको उद्योग वाणिज्य संघ चितवनका अध्यक्ष राजु श्रेष्ठले जानकारी दिए ।
चितवन महोत्सव लाग्ने स्थलको करिब एक किलोमिटरको लम्बाइमा ‘बिच’ निर्माण हुने उनले बताए । यसका लागि करिब २५ करोड रुपैयाँ लाग्ने अनुमान गरिएको छ । ‘सकभर मेरै कार्यकाल भित्र सक्ने लक्ष्य हो’, उनले भने, ‘नसकिए आउने अध्यक्षको कार्यकालमा हुन्छ । बिचमा १० वटाजति क्याफे, रेष्टुरेन्टहरु पनि रहन्छ ।’
भेज खाजा पाइने क्याफे, मेसिनबाट बनाइने पानीपुरी, आइसक्रिम लगायतका पसलहरु रहने उनको भनाइ छ । बिचमा बोटिङका क्रियाकलापहरु पनि रहने उनले बताए । ‘रिभर साइड बिच’ निर्माण भइसकेपछि सोहि स्थानमा महोत्सव सञ्चालन हुने र त्यसबाट आएको आम्दानी नदी किनारको बृहत्तर विकास र क्याम्पा चौरमा निर्माण हुने मिनि स्टेडियममा खर्च गरिने श्रेष्ठले वताए ।
‘बिच’मा महिनामा एकपटक सांगितिक कार्यक्रमको आयोजना गर्न सकिने उनी बताउँछन् । त्यहाँ पुग्ने सर्वसाधारणसँग कुनै पनि प्रवेश शुल्क नलिइने उनले स्पष्ट पारे । त्यस ठाउँमा पैदल ट्राक पनि बनाइने उनले बताए ।
