उज्यालो नेपाल- चितवन क्षेत्र नं. २ मा प्रमुख दलका उम्मेदवारहरूले सरकारको निर्णयको अवज्ञा गर्दै छत खुला ‘रुफटप भेहिकल’ प्रयोगलाई निरन्तरता दिएका छन्। राष्ट्रिय स्वतन्त्र पार्टीका उम्मेदवार रवि लामिछाने, नेपाली कांग्रेसकी उम्मेदवार मिना खरेल र नेकपा (एमाले) का उम्मेदवार अस्मिन घिमिरेले प्रचारप्रसारका क्रममा अझै पनि त्यस्ता सवारी साधन प्रयोग गरिरहेको देखिएको हो।
सरकारले निर्वाचन प्रचारप्रसारका क्रममा उम्मेदवारहरूले छत खोलेर हिँड्न मिल्ने सवारी साधन प्रयोगमा रोक लगाउने निर्णय यसअघि नै गरिसकेको छ। गत बिहीबार बसेको केन्द्रीय सुरक्षा समितिको बैठकले उम्मेदवारहरूको सुरक्षालाई ध्यानमा राख्दै यस्तो निर्णय गरेको हो। भीडभाडयुक्त स्थानमा खुला छत भएका सवारी साधन प्रयोग गर्दा अप्रिय घटना हुन सक्ने जोखिम बढ्ने निष्कर्षसहित उक्त व्यवस्था लागू गरिएको जनाइएको छ।
गृह मन्त्रालयकी सहप्रवक्ता रमा आचार्यका अनुसार उम्मेदवार तथा सर्वसाधारण दुवैको सुरक्षालाई प्राथमिकता दिँदै निर्णय कार्यान्वयनमा ल्याइएको हो। सुरक्षा निकायले निर्णयको पालना गराउन आवश्यक समन्वय र अनुगमन भइरहेको जनाएको छ।
तर चितवन–२ मा भने प्रमुख दलका उम्मेदवारहरूबाटै निर्णयको उल्लंघन भइरहँदा आचारसंहिता कार्यान्वयनको प्रभावकारितामाथि प्रश्न उठेको छ। निर्वाचन नजिकिँदै गर्दा सुरक्षा प्रबन्धलाई थप कडाइका साथ लागू गरिने गृह मन्त्रालयको भनाइ छ।
