काठमाडौं । काठमाडौँ महानगरपालिका-५ कालोपुलस्थित लामा गल्लीमा एक व्यक्तिको डेरा कोठा फोरेर लाखौँ मूल्य बराबरको सुनचाँदी र नगद चोरी गर्ने दुई जनालाई प्रहरीले पक्राउ गरेको छ। जिल्ला प्रहरी परिसर काठमाडौंको टोलीले चोरीमा संलग्न उनीहरूलाई चोरी गरिएका गहना, नगद र प्रयोग गरिएका धारिलो हतियारसहित नियन्त्रणमा लिएको हो।
गत चैत ६ गते काठको दराजभित्र राखिएको करिब २६ तोला ८ आना बराबरको सुनका गरगहना, ३३ हजार मूल्य बराबरको चाँदी र करिब ६१ हजार नगद (नेपाली र भारतीयसहित) चोरी भएको उजुरी प्रहरीमा परेको थियो। सूचना प्राप्त हुनासाथ सक्रिय भएको प्रहरी टोलीले अनुसन्धानका क्रममा चैत ७ गते राति करिब पौने १० बजे दुई युवकलाई पक्राउ गर्न सफल भयो। पक्राउ पर्नेहरूमा काठमाडौं बुढानीलकण्ठका २३ वर्षीय उपेन्द्र खत्री र कैलाली गौरीगंगाका २६ वर्षीय निरज सापकोटा रहेका छन्।
प्रहरीले उनीहरूको साथबाट तीन थान तिलहरी, एक थान सिक्री, एक थान नेक्लेस, तीन थान बाला र नौगेडीमा प्रयोग हुने ८ थान गोटी लगायतका सुन जस्ता देखिने पहेँलो धातुका गरगहना बरामद गरेको छ। यसैगरी चाँदीका पाउजु, थाली र औँठीहरू पनि बरामद भएका छन्। पक्राउ परेकाहरूको साथबाट २ लाख ४९ हजार नेपाली रुपैयाँ नगद र चोरी गर्दा प्रयोग गरिएको होण्डा कम्पनीको स्कुटर समेत नियन्त्रणमा लिइएको छ।
बरामद सामानहरूको सूचीमा चोरी गर्दा वा प्रतिवाद गर्दा प्रयोग हुन सक्ने घातक हतियारहरू समेत फेला परेका छन्। प्रहरीले उनीहरूको साथबाट २.८ फिट लामो तरबार, एक थान खुकुरी र दुई थान फलामको रड बरामद गरेको जिल्ला प्रहरी परिसर काठमाडौंका प्रवक्ता एवं प्रहरी उपरीक्षक पवन कुमार भट्टराईले जानकारी दिए।
पक्राउ परेका दुवै जनालाई हिरासतमा राखेर चोरी मुद्दामा थप कानुनी प्रक्रिया र अनुसन्धान अगाडि बढाइएको प्रहरीले जनाएको छ।
