नवलपुर- बाह्र बर्ष अघि निर्माण भएको हावाबाट बिजुली बाल्ने देशकै पहिलो प्रबिधि अहिले बन्द हुँदा स्थानीयमा मात्रै होईन त्यहाँ पुग्ने जो कसैलाई पनि चिन्तित बनाएको छ ।
पुर्वी नवलपरासीको हुप्सेकोट गाउँपालिकाको रुद्रपुरमा हावाबाट निकालिएको बिजुलीको उत्पादन एक बर्षदेखि मर्मत सम्भार हुन नसक्दा विद्युत् उत्पादन बन्द भएपछि स्थानीय अध्याँरोमा बस्न बाध्य भएको हुप्सेकोट गाउँपालिका वडा नं ५ का वडाध्यक्ष पदमबहादुर राना मगरले बताउनुभएको छ ।
बाह्र बर्ष अघि सुरु भएको यो नमुना परियोजनाबाट उत्पादित बिजुली २४ सै घण्टा प्रयोग गर्न पाउँदा उत्साहित भएका स्थानीय अहिले एक बर्ष देखि उचित मर्मत र सम्भार नहुँदा निराश भएका छन् । पटक पटक मर्मत गराउने गरे पनि प्रयास सफल नभएको वडाध्यक्ष रानामगरले बताउनुभयो ।
यो परियोजना नेपालकै नमुनाका रुपमा रहे पनि एक बर्ष देखि मर्मत र सम्भार नहुँदा बन्द भए पनि गाउँपालिकाले समेत कुनै चासो नदिएको स्थानीय समाजसेवी अमर सिहं बिकको भनाइ छ ।
दुई करोड रुपैयाँभन्दा बढीको लागतमा संचालित परियोजनाको हावाबाट १० किलोवाट र सोलरबाट दुई किलोबाट गरी १२ किलोवाट विद्युत उत्पादनको क्षमता रहे पनि बर्ष देखि मर्मत र सम्भार नहुँदा एक बर्ष देखि पुरै बन्द भएको छ । उत्पादन नै बन्द हुँदा गाउँपालिकाले चासो दिनुपर्ने स्थानीय समाजसेबी गोपाल बस्ताकोटीले बताउनुभयो ।
यस परियोजनाको मर्मतका लागि सहयोगीको मुख ताकेर यहाँका स्थानीय बसेका भए पनि अझैसम्म सहयोग नपाउँदा स्थानीयले अध्याँरोमा बस्न बाध्य भएका छन् ।
https://ujyaalonepalnews.com/archives/28333
