अर्जुनधारामा महाभारतकालीन सभ्यताको प्रतिमा

0
47

झापा / कृष्णले अर्जुनलाई रथमा राखेर रथ हाँकेको प्रतिमा शनिश्चरे बजारमा राखिएसँगै अर्जुनधारा नगरपालिकाभित्र आउने पर्यटकका लागि यो प्रतिमा आर्कषकको केन्द्र बनेको छ ।

नगरपालिकाले रु २५ लाख खर्च गर्दै महाभारतकालीन सम्झना झल्कने चारवटा घोडाको रथ हाँकेको प्रतिमा शनिश्चरे बजारमा राखेसँगै आन्तरिक तथा बाह्य पर्यटकका लागि यो आर्कषकको केन्द्रविन्दु बनेको हो । नगरपालिकाले जिल्लाकै पुरानो बजार शनिश्चरेलाई पर्यटकीय नगरीका रुपमा विकास गर्न भौतिक संरचना निर्माणको काम शुरु गरेको छ । शनिश्चरे बजारको चोकमा अहिले आर्कषक पार्क बनाउन शुरु गरिएको नगरपालिकाका प्रमुख हरिकुमार रानाले बताउनुभयो ।

सरकारी स्वामित्वको यो जमिनमा यसअघि निर्माण गरिएका संरचना भत्काएर नगरपालिकाले आधुनिक पार्क बनाउन थालिएको नगरपालिकाका प्रमुख रानाले बताउनुभयो । शनिबार लाग्ने हाटलाई वडा नम्बर ८ मा दुई बिगाहा जमिन किनेर स्थानान्तरण गरिएको उहाँले बताउनुभयो । मुख्य सडकभन्दा अन्यत्र हाट लाग्न थालेपछि नगरपालिकाले चोकमा पार्क बनाउन शुरु गरेको हो ।

शनिश्चरे बजार नजिकै अर्जुनधारा जलेश्वर धाम रहेको छ । सोही धामको नामबाट नगरपालिकाको नाम पनि अर्जुनधारा रहन गएको बताइन्छ । धाममा वर्षेनी हजारौँ धार्मिक पर्यटक दर्शन तथा अवलोकन र अध्ययनका लागि आउने गरेका छन् । नगरपालिकाले अर्जुनधारा धाममा आउने पर्यटकलाई लक्षित गरेर महाभारतकालीन सभ्यता झल्किने मूर्ति सहितको पार्क निर्माण गरेसँगै नगरकै मुहार फेरिएको हो ।

द्वापर युगमा १२ वर्षको वनवासपछि एक वर्षका लागि गुप्तवास बसेका पाण्डवमध्ये अर्जुनले विराट राजाको गाई चराउँदै सो स्थानमा आएको धार्मिक किंवदन्ती छ । चराउँदै गरेका गाई तिर्खाएपछि अर्जुनले बाँण हानेर पानी निकालेको तथा आफूले चराएका गाईलाई त्यहाँ पानी खुवाएको भन्ने महाभारतकालीन मान्यताअनुसार त्यसस्थानको नाम अर्जुनधारा रहन गएको बताइन्छ ।

ठेकी बजारका रुपमा जिल्लामै ख्याति कमाएको शनिश्चरे बजारले विस्तारै फड्को मार्दै अहिले पर्यटकीय नगरीका रुपमा विकसित हुँदै गएको छ । अहिले काठका ठेकी विस्थापन हुने अवस्थामा छन् । नगरपालिकाले ठेकीको प्रतिमा, केही वर्ष अघिसम्म सामान ढुवानीमा प्रयोग गरिने बयलगाडा (गोरुगाडा), सहितको आकर्षक स्वागतद्वार निर्माण गर्ने योजना अघि सारेको छ ।

The post अर्जुनधारामा महाभारतकालीन सभ्यताको प्रतिमा appeared first on Purbeli News.

ओलीलाई भीम रावलको चेतावनी : पाखा लगाउन खोजे परिणाम राम्रो हुँदैन

Previous articleओली–प्रचण्ड तनावबीच जनार्दन शर्माले मुख खोले, यस्तो गरे खुलासा
Next articleदुई जनालाई इँटा भट्टामा हालेका आलम पुगे जेल, खुलेआम पाँच हजार जना मारेको बताउने प्रचण्डलाई के ?