तमोर र कमला नदीमा जलसतह खतरा तह आसपास, उच्च सतर्कता अपनाउन अपिल

काठमाडौं- तमोर नदीको जलसतहले खतरा तह पार गरको छ । बढ्दो क्रममा समेत रहेकाले धनकुटाको तटीय क्षेत्रमा सतर्कता अपनाउन भनिएको छ ।

यसैगरी कमला नदीमा पनि जलसतह खतरा तह आसपास पुगेकाले धनुषा र सिराहाको तटीय क्षेत्रमा बेलुका सम्मै सतर्कता अपनाउन बाढी पूर्वानुमान महाशाखाले अपिल गरेको छ । पर्सा, चितवन, सिन्धुपाल्चोक, मकवानपुर, बारा र आसपासका क्षेत्रमा आज बिहान भारी बर्षा मापन भएको छ ।

यसैबीच कोशी र मधेश प्रदेशका एक दुई स्थानमा आज पनि भारी वर्षाको सम्भावना रहेको छ । हाल मनसुनको न्यूनचापीय रेखा सरदर स्थान भन्दा उत्तरमा अवस्थित छ ।

साथै नेपालमा भारतको उत्तर प्रदेशको उत्तरपूर्वी भू-भागमा रहेको न्यून चापीय क्षेत्र र बंगलादेशको उत्तरी भुभागमा रहेको न्यून चापीय क्षेत्रको समेत प्रभाव रहेको मौसम पूर्वानुमान महाशाखाले जनाएको छ ।