२८ फागुन, काठमाडौं । अमेरिकामा बस्दै आएका नेपालीहरुले कर्णबहादुर बाँठामगरको उपचारका लागि एक लाख २६ हजार सहयोग गरेका छन् ।
विभिन्न रोगले थलिएका कर्णबहादुरको उपचारमा गर्ने उद्देश्यले अमेरिकाको टेक्सासमा बस्दै आएका रोल्पा निवासी याशिका बाँठामगर र जीवराज बुढामगरको पहलमा संकलन गरिएको एक लाख २६ हजार ९८५ रुपैयाँ बुधबार हस्तान्तरण गरिएको छ ।
माडी गाउँपालिका-६ रोल्पा (साविक कोर्चावाङ) निवासी ४७ वर्षीय कर्णबहादुर बाँठामगर विगत ५ महिनादेखि टिचिङ हस्पिटल महाराजगञ्जमा मिर्गौला, पत्थरी, जण्डिस रोगको उपचार गराइरहेका छन् ।
पछिल्लो समय कलेजोमा पनि समस्या देखिएको कर्णबहादुरका छोरा महेन्द्र बाँठामगरले जानकारी दिए । साथै कर्णबहादुरको परिवारले घरको आर्थिक स्थिति कमजोर भएका कारण उपचारमा सहयोग गर्नसमेत आग्रह गरेका छन् ।
अमेरिकामा संकलन भएको रकम पत्रकार देविका घर्ती मगरमार्फत काठमाडौंमा हस्तान्तरण गरिएको हो ।
