काठमाडौं : साउदी अरबले कोरोना भाइरसविरुद्धको जोन्सन एण्ड जोन्सन खोप लगाएका नेपाली कामदारलाई प्रवेश अनुमति दिने भएको छ । साउदीस्थित नेपाली दूतावासले एक सूचना जारी गर्दै साउदी अरब आउने नेपाली कामदारले जोनसनको खोप लगाएर आउन पाउने जनाएको हो । छुट्टीमा नेपाल आएर साउदी फर्किने तथा नयाँ कामदार जोन्सनखोप लगाएर साउदी गए त्यहाँ गएर संस्थागत क्वारेन्टिन बस्नु नपर्ने दूतावासले जानकारी दिएको छ । तर खोप लगाएको १४ दिन कटेको हुनुपर्ने दूतावसले बताएको छ ।
दूतावसद्वारा जारी विज्ञप्तिमा भनिएको छ, ‘छुट्टीमा नेपाल गएर साउदी फर्किन लागेका र साउदी अरब आउने नयाँ कामदारले जोनसन एण्ड जोनसनको खोप लिन सक्नेछन् । उक्त खोप लगाएको १४ दिनपछि साउदी अरबमा आउँदा यहाँ आएपछि संस्थागत क्वारेन्टिनमा बस्नुपर्दैन ।’ दूतावासले खोप लगाउन जाँदा आफ्नो राहदानी र भिसा अनिवार्यरुपमा साथमा लिएर जानसमेत अनुरोध गरेको छ । साउदीले फाइजर, अस्ट्राजिनेका, मोडेर्ना र जोन्सन एण्ड जोन्सनको खोपलाई मान्यता दिएको छ । साउदी जानेले टिकट काट्दा एयरलाइन्स र ट्राभल एजेन्सीलाई यो कुराको जानकारी गराउन दूतावासले अनुरोध गरेको छ ।
साउदीमा त्यहाँको सरकारले मान्यता दिएको खोप मध्ये फाइजर, अस्ट्राजिनेका, मोडेर्ना खोपको २ वटै डोज लगाइसेका वा जोन्सनको खोप एक डोज लगाएकाले १४ दिन कटेको छ भने संस्थागत क्वरेन्टिन बस्नु नपर्ने व्यवस्था गरिएको छ । साथै कोरोना संक्रमण भएर निको भएको ६ महिना कटेको भए पनि संस्थागत क्वारेन्टिन बस्नु नपर्ने दूतावासले सूचनामार्फत जानकारी गराएको छ ।
साउदी सरकारको यो निर्णयसँगै अब विभिन्न कारण बिदामा नेपाल आएका नेपाली कामदारहरु जोनसन एण्ड जोनसनको खोप लगाएर सहजरुपमा साउदी जान पाउने भएका छन् । यसअघि नेपालमा जोनसनको खोप उपलब्ध नहुँदा साउदी गएर नेपाली कामदार क्वारेन्टिनमा बस्दा लाखौं खर्च गर्न बाध्य भएका थिए ।
यसैबीच साउदी सरकारले कोरोनाविरुद्धको खोप नलगाएकाहरुलाई सार्वजनि स्थलमा जान प्रतिबन्ध लगाएको छ । अगस्ट १ देखि खोप नलगाएका व्यक्तिलाई सपिङ मल, बजार, रिटेल पसललगायतका क्षेत्रमा जान प्रतिबन्ध लगाइएको साउदी अरबको नगरपालिका तथा ग्रामीण मामिला मन्त्रालयले जनाएको छ । मन्त्रालयका अनुसार ब्युटि पार्लर, वैवाहिक समारोह तथा पार्टी हल, रेस्टुरेन्ट, पुरुष सैलुनमा जानका लागि खोप लगाएको प्रमाण देखाउनुपर्ने व्यवस्था गरिएको छ । मध्यान्ह
https://ujyaalonepalnews.com/archives/15146
