निराजन घिमिरे, वैशाख २८, चितवन- वैशाख ३० गते हुने स्थानिय निर्वाचनको लागि हिजाे मङ्गलवार मध्यराति देखि मौन अवधि चलिरहेको छ । यो समयमा दल तथा उम्मेदवारले मत माग्ने विषयसँग सम्बन्धित कुनै पनि क्रियाकलाप गर्नु हुँदैन । निर्वाचन आयोगले मौन अवधीमा पालना गर्नुपर्ने नियम बारे पटक पटक सचेत गराउँदा पनि दलहरुले यसलाई टेरेका छैनन् ।
चितवनमा मौन अवधीमा घरदैलो, नाराजुलुस, सभासम्मेलन जस्ता कार्यक्रम रोकिए पनि सामाजिक संजालमा गरिने प्रचार भने रोकिएको छैन। फेसबुक, ट्विटर, टिकटक जस्ता सामाजिक संजालमा उम्मेदवारको प्रचार प्रसार गर्दै गरिने पोष्टहरु रोकिएका छैनन् । निर्वाचन आयोगले मौन अवधीमा यस्ता सामग्रीमा लाइक, कमेन्ट र शेयर गर्न पनि नपाइने बताएको छ तर अहिले प्रचार सामग्रीमा लाइक, कमेन्ट र शेयर गर्नेहरू छ्यापछ्याप्ती भेटिएका छन् ।
त्यतिमात्र नभई फेसबुकलाई डलर तिरेर बुष्ट गरिएका प्रचार सामाग्रीले सामाजिक संजाल भरिएको छ । आयोगले हिजो राती देखि नै बुष्ट गरिएका प्रचार सामाग्री तत्काल रोक्न निर्देशन दिए पनि सामाजिक सञ्जालका भित्ता दल र उम्मेदवारका प्रचार सामग्रीले भरिएका छन् ।
निर्वाचन आयोगका सहप्रवक्ता सूर्यप्रसाद अर्यालले प्रचार सामग्री राख्ने र त्यसमा लाइक, कमेन्ट र शेयर गर्नेहरूलाई पनि कारबाही हुने बताएका छन् । ‘हामीले त्यस्ता सामग्री हटाउन भनेका छौँ । त्यस्ता सामग्रीमा लाइक, शेयर र कमेन्ट नगर्न भनेको छौँ, कसैले अटेरी गर्छ भने आयोगमा नेपाल प्रहरीको साइबर ब्युरो सहितको टास्क फोर्स छ, त्यसले कारबाही गर्छ, उनले भने ।
आयोगले कारबाहीको चेतावनी दिए पनि विभिन्न पार्टीका नाममा खोलिएका पेज र उम्मेदवार विशेष जिताऔँ अभियान नाम राखेर खोलिएका पेजहरु बाट निरन्तर निर्वाचन आचारसंहिताको उल्लङ्घन गर्दै फेसबुकलाई डलर तिरेर प्रचार गर्ने क्रम रोकिएका छैनन् ।
https://ujyaalonepalnews.com/archives/19988
