विराटनगर । प्रदेश नं. १ का आन्तरिक मामिला तथा कानुन मन्त्रालयको विशेष पहलमा केशलीया कोरिडोर निर्माण हुने भएको छ ।
सङ्घीय सरकारले केसलीया कोरिडोर निर्माणका लागि आगामी आर्थिक वर्ष २०७९÷०८०) को बजेटमा सहरी नदी कोरिडोर कार्यक्रम अन्तर्गत बजेट विनियोजन गरेको छ ।
केशलिया खोला मोरङको विराटनगर महानगरपालिका, बुढीगंगा गाउँपालिका तथा सुनसरीको दुहबी नगरपालिका, बर्जु गाउँपालिका सीमा क्षेत्र भएर बहने नदी हो । नदीको दुवै किनारमा कोरिडोर निर्माण गरी र बस्ती संरक्षण गर्न सङ्घीय सरकारबाट बजेट विनियोजन भएको हो ।
कोरिडोर निर्माण अन्तरगत प्रदेश १ को आन्तरिक मामिला तथा कानुन मन्त्रालयले डिपिआर तयार गर्नका लागि मुख्यमन्त्री तथा मन्त्रिपरिषद्को कार्यालयसँग आग्रह गरिसकेको छ ।
विराटनगर महानगरले पनि केशलीयामा तटबन्ध निर्माण गरी तटबन्ध गर्ने बताउँदै आएको थियो । बजेट विनियोजनसँगै कोरिडोर निर्माणको काम अघि बढ्ने आन्तरिक मामिला तथा कानुन मन्त्री केदार कार्कीले बताउनुभयो ।
“विपद्बाट नागरिकलाई सुरक्षित बनाउनका लागि व्युटिफिकेसन सहितको कोरिडोर निर्माणको काम अघि बढ्दै छ ।”, मन्त्री कार्कीले भन्नुभयो, “त्यसको लागि डिपिआरको काम अघि बढेकाले केशलिया कोरिडोरका लागी चाडै काम सुरु गर्छौँ ।”
प्रदेश सरकारले पनि यस योजनालाई प्राथमिकताका साथ नीति तथा कार्यक्रममा समेटेर लैजाने भएको छ । कोरिडोर निर्माणपछि नदीले निम्त्याउने विपद्बाट मुक्त हुनका साथै व्युटिफिकेसनले सो ठाउँको पर्यापर्यटनको विकासमा टेवा पुग्ने छ ।
मन्त्री कार्कीले कोरिडोर निर्माणका लागि भारतको विहार सरकारका उपमुख्यमन्त्री तारकेश्वर प्रसाद नेपाल भ्रमणमा रहँदा छलफल गर्नुभएको थियो ।
यस्तै, योजना आयोगका उपाध्यक्ष विश्व पौडेल, प्रदेश १ आर्थिक मामिला तथा योजना मन्त्री इन्द्रबहादुर आङ्बो लगायतसँग पनि अवलोकनसहित कोरिडोर निर्माण गर्नका गहन छलफल भएको थियो । वर्षेनी केशलिया र सिंगिया खोलामा आउने बाढीका कारण महानगरपालिका क्षेत्र प्रभावित हुने गरेको छ । महानगरपालिकाका टोल बस्ती जोगाउन यी दुवै खोलामा दिगो तटबन्ध आवश्यक छ ।
https://ujyaalonepalnews.com/archives/21237
