काठमाडौं : छिट्टै धनी बन्ने लालसाले रोजगारीका लागि मलेसिया गएका नेपाली कामदार लोट्टो र क्यासिनोको कुलतमा लहसिने प्रवृत्ति बढेको पाइएको छ । मलेसियाको राजधानी क्वालालम्पुर र अन्य प्रमुख शहरहरुमा रहेका क्यासिनो धाउने नेपाली कामदारको संख्या दैनिकरुपमा बढेको बताइएको छ ।
मलेसियामा स्टार वल्र्ड क्यासिनो, डि ग्यान्टिङ्ग क्यासिनो र ग्यान्टिङ्ग वल्र्ड क्यासिनो नेपाली युवाका प्रमुख गन्तव्य मानिन्छन् । मलेसियामा नेपालीलाई क्यासिनो प्रवेश सहज रहेको छ । क्यासिनो र लोट्टोमा मेहनतको कमाई गुमाउनेहरु आफूमात्र नभई नेपालमा रहेको आश्रित परिवारलाई विचल्ली बनाउने र घर नै फर्किन नसक्ने अवस्थामा पुग्ने गरेकोे नेपालीका संघसंस्थाले बताएका छन् ।
कतिपय कामदार जानाजान र कतिपय लहलहैमा क्यासिनो पुग्ने गरेको बताइन्छ । क्यासिनोको कुलतमा फसेकाले आफूसँग रहेकोे रकम सकाएपछि साथीभाइसँग सापट माग्ने, नदिए झगडा समेत गरेर दुश्मनी मोल्ने र कुटपिटबाट समेत उत्रने गरेकोे म्याग्दीका रमेश पुन बताउँछन् ।
सदस्यता लिनेलाई मलेसियामा क्यासिनोहरुले निःशुल्क प्रवेश र खाना खान दिने गरेका छन् । क्यासिनो गएर सानो रकम जितेपछि ठूलै हल्ला चलाउने गरिएका कारणबाट पनि नेपालीहरु क्यासिनो जान लालायित बन्ने र टोटो र म्याग्नममा दाउ लगाउने गरेका छन् । कतिपयले फोर डि र सिक्स डि नामका चिठ्ठामा कमाइ सक्ने गरेकोे छन् ।
पाँचथरका नवीन राई नेपाली दूतावास तथा सामाजिक संस्थाले पर्याप्त सचेतना फैलाउन नसकेको कारणले कामदारमा जानी नजानी क्यासिनोको लत बढेको बताउँछन् । उनले भने, ‘मलेसियामा कामदारको तलब बढेको छ । यहाँ आउने नेपाली कामदारको संख्यामा पनि दैनिक वृद्धि भएको छ, तर रातदिन गरेर गरेको कमाई क्यासिनो र लोट्टोको लतले स्वाहा हुने खतरा बढेको छ ।’
उनले मलेसियामा मात्रै नभएर नेपालमा प्रदान गरिने अभिमुखीकरणको तालिममा पनि यस प्रकारका कुलतका सम्बन्धमा ज्ञान दिनुपर्नेमा जोड दिए । राईले भने, ‘नेपालीमा देखिएको यस प्रकारका कुलतविरुद्ध अभियान नै चलाउनु आवश्यक छ ।’ मध्यान्ह दैनिकमा खबर छ !
https://ujyaalonepalnews.com/archives/24806
