उज्यालो नेपाल- रत्ननगर–१६ हात्तीगाडेमा रहेको एकीकृत कृषक बचत तथा ऋण सहकारी संस्थाको १४औं साधारणसभा तथा नेतृत्व चयनका क्रममा निर्वाचित पदाधिकारीहरूको सपथ ग्रहण तथा पद हस्तान्तरण गरिएको छ ।
मङ्सिर ११ गते बिहिबार भद्रकालीधाम परिसरमा आयोजित एक कार्यक्रममा नयाँ कार्यसमिति र लेखा समितिले सपथग्रहण संगै पद तथा जिम्मेवारी औपचारिक रूपमा सम्हालेको हो।

संस्थाको नेतृत्व चयन कार्यक्रमबाट अध्यक्षमा विष्णुप्रसाद अर्याल निर्वाचित भएका छन्। उपाध्यक्षमा अनुप बुढाथोकी, सचिवमा लक्ष्यबहादुर गुरुङ र कोषाध्यक्षमा सन्तोषी घिमिरे चयन भएका छन्। त्यस्तै सदस्यहरुमा जगन्नाथ नेपाल, दिलबहादुर थापा, तुलबहादुर बुढाथोकी (राजकुमार) र प्रेमकुमारी सारु निर्वाचित भएका छन्।

एउटा सदस्य पदमा उम्मेदवारी नपरेकाले सर्वपक्षीय सहमतिमा मनोनयनमार्फत सदस्य चयन गरिने निर्वाचन समिति संयोजक पुरुषोत्तम लामिछानेले जानकारी दिए।

यसैगरी लेखा समितिमा संयोजक शिवप्रसाद पुडासैनी, सदस्य एक बहादुर बुढाथोकी र गायत्री लामिछाने बोहरा सर्वसम्मत रूपमा चयन भएका छन्।

शपथग्रहण तथा पद हस्तान्तरण कार्यक्रममा वडाध्यक्ष हेमराज थापा, सातकन्या सामुदायिक वनका अध्यक्ष रामहरी पनेरु, स्थानीय समाजसेवी, शेयर सदस्य तथा अतिथिहरूको उल्लेखनीय उपस्थिति थियो।
कार्यक्रमलाई सम्बोधन गर्दै वडाध्यक्ष थापाले सहकारीलाई जिम्मेवारीपूर्ण र पारदर्शी ढङ्गले सञ्चालन गर्न सुझाव दिए। उनले भने, “सहकारीको मूल मर्म सदस्यहरूको आर्थिक विकास र विश्वासमाथि आधारित छ। निर्वाचित टीमले यही मर्मअनुसार काम गर्छ भन्ने अपेक्षा छ।”

नवनिर्वाचित अध्यक्ष विष्णुप्रसाद अर्यालले सहकारीप्रति सदस्यहरूको विश्वास र अपेक्षालाई सम्मान गर्दै आगामी दिनमा सदस्यता विस्तार र आर्थिक गतिविधिमा पारदर्शिता प्राथमिकता रहेको बताए।
उनले भने, “शेयर सदस्यहरूको मनोभावना र राज्यले तोकेको नियमकानुनको पूर्ण पालनासहित सहकारीलाई व्यवस्थित र सक्षम बनाउने हाम्रो प्रतिबद्धता छ।”

निर्वाचन समिति संयोजक पुरुषोत्तम लामिछानेले निर्वाचन प्रक्रिया निष्पक्ष र छरितो रूपमा सम्पन्न गर्न सहयोग गर्ने सबैलाई धन्यवाद दिंदै सहकारीको सुशासनमा निर्वाचनको भूमिकाबारे पनि आफ्नो धारणा राखे।
उनका अनुसार, “लामो समयदेखि सक्रिय सदस्यहरूको सहभागितामा सहकारीले अग्रगमन गरिरहेको छ। नयाँ समितिले पनि यो यात्रालाई अझ मजबुत बनाउनेछ।”

सहकारीका शेयर सदस्यहरूले पनि नयाँ नेतृत्वबाट सेवा प्रवाह, निर्णयप्रक्रियामा पारदर्शिता, ऋण व्यवस्थापन र कृषि–आधारित कार्यक्रम विस्तारमा थप प्रभावकारी काम हुने अपेक्षा व्यक्त गरेका छन्। कार्यक्रम निर्वाचन समिति सदस्य दिलिप खनियाँले संचालन
गरेका थिए ।

चितवन — भरतपुरमा मर्निङवाकमा निस्केका व्यक्तिलाई ठक्कर दिएर भागेको मोटरसाइकल र त्यसका चालकलाई प्रहरीले घटना भएको ४८ दिनपछि काठमाडौंबाट नियन्त्रणमा लिएको छ। भरतपुर महानगरपालिका-४ का ६० वर्षीय कृष्णप्रसाद कँडेललाई मर्निङवाक गर्दै गर्दा भरतपुर चौबीसकोठीनजिक रामपुर जाने सडकमा असोज २१ गते बिहान सवा पाँच बजेतिर ठक्कर दिएको थियो।

ठक्करका कारण गम्भीर घाइते भएका कँडेल हाल पनि उपचारमा छन्। घटनापछि ठक्कर दिने मोटरसाइकल चालक फरार थिए । भागेका चालक खोज्न परिवारका सदस्य तथा आफन्तले प्रशासन समक्ष माग गर्दै आएका थिए।

चितवन जिल्ला प्रहरी कार्यालयका प्रवक्ता डीएसपी रवीन्द्र खनालले विभिन्न खालका अनुसन्धान विधि र ठाउँठाउँका सिसिटिभीका सयौं भिडिओहरू विश्लेषण गरेको बताए। यस क्रममा शंकाको घेरामा दर्जनौं मोटरसाइकल आए पनि दुर्घटना नं ३७ प ८५३० नम्बरको मोटरसाइकलले गराएको आफूहरूले निर्णय गरेको उनले बताए।

उक्त मोटरसाइकल गोरखा नगरपालिका-१३ का २७ वर्षीय सुनिल गुरुङले चलाएको खुल्न आएको खनालले सुनाए। खोज अनुसन्धानमा गुरुङ काठमाडौं बौद्धमा लुकीछिपी बसेको खुलेपछि चितवन प्रहरीले टेकु प्रहरीको सहयोग लिएको थियो।

८ मंसिर, बारा । बाराको सिमरास्थित नेपाल राष्ट्रिय माविका शिक्षकले जेनजी आन्दोलन पछि विद्यार्थीले स्कुल जलाउने धम्की दिन थालेको गुनासो गरेका छन् ।

सोमबार ईलाका प्रहरी कार्यालय सिमरामा मधेश प्रदेशका प्रहरी प्रमुख डिआईजी गोविन्द थपलियाको उपस्थितीमा आयोजित प्रहरी–स्थानीय अन्तरक्रिया कार्यक्रममा बोल्दै श्री नेपाल राष्ट्रिय माध्यमिक विद्यालयका १०+२ इन्चार्ज डम्बर खड्काले जेनजी आन्दोलनपछि विद्यार्थीसँग शिक्षक डराउनुपर्ने अवस्था बनेको गुनासो गरे ।

‘जेनजीको उमेर समुहलाईनै हामीले पढाउनुपर्छ, विद्यार्थीलाई कक्षा कोठामा पढाउँदा पनि डराउनुपर्ने अवस्था बनेको छ,’ खड्काले प्रहरी प्रमुख थपलियासँगको अन्तरक्रियामा भने ।

अन्तरक्रिया कार्यक्रममा विद्यालयमा दुईसाता अघिको एउटा घटना सम्झँदै शिक्षक खड्काले एउटा विद्यार्थीका कारण एकजना अंग्रेजीको पुराना शिक्षकले जागिरै छाडेको बताए ।

‘वीरगञ्जबाट हामीकहाँ पढाउन आउने एकजना शिक्षकले स्कुलै छोड्नुभो,’ उनले भने । यसैबर्ष ११ मा भर्ना भएको एउटा विद्यार्थीलाई पढाईका विषयमा सम्झाउँदा स्कुलै जलाईदिने क्षमता आफूसंग भएको धम्की विद्यार्थीले दिएको खड्काको भनाइ छ ।

‘कोठा नम्बर १० मा बस्नुपर्ने विद्यार्थी ९ मा गएछ, ९ को शिक्षकले कोठा नम्बर १० मा पठाउनु भो त्यतिकैमा विद्यार्थी रिसाएर ढोका पनि फुटाइदिएछ, मैलेपनि पछि थाहा पाएँ, शिक्षकसँग रिसाएर उक्त विद्यार्थीले स्कुलै जलाउने धम्की दिएछ । अहिले उक्त शिक्षक वीरगञ्जमै बस्नुहुन्छ पढाउन बोलाउँदा त्यहाँको वातावरण खराब छ भन्नुहुन्छ,’ शिक्षक खड्काले कार्यक्रममा भने ।

काठमाडौं : प्रधानमन्त्री सुशीला कार्कीको मुख्य स्वकीय सचिव आदर्श श्रेष्ठले प्रधानमन्त्रीको सचिवालयमा आफ्नो श्रीमती नियुक्त गरेको विरोधमा ज्ञापन पत्र बुझाउन सिंहदरबार पुगेका मिरज ढुंगानासहितका जेनजी नेता भित्र छिर्न पाएनन्।

उनीहरू नेपोबेबी अभियान हुँदै सडकसम्म पुगेको जेनजीहरुको भ्रष्टाचार विरोधी आन्दोलनको बलमा बनेको सरकारले नै नातावादका आधारमा परिवारका सदस्यलाई सरकारी नियुक्ति दिएको भन्दै प्रधानमन्त्री कार्कीलाई विरोध स्वरूप ज्ञापन पत्र बुझाउन सिंहदरबार गएका थिए। तर सुरक्षाकर्मीले मिरजसहितको टिमलाई सिंहदरबार भित्र छिर्नै नदिएपछि उनीहरूले गेटमै ज्ञापन पत्र टाँसेर फर्किए।

काठमाडौं- गत भदौ २३ र २४ गते भएको जेन-जी आन्दोलनमा बुलेट बाइकको साइलेन्सर पड्काउँदै सडकमा उत्रिएका तेन्जिन लामाले आफू तिब्बतीयन भएको स्वीकारेका छन्।

‘तिब्बतीय ओरिजिनल ब्लड’ लेखिएको टीसर्ट लगाएर बुलेट बाइक पड्काउँदै हिँडेका उनले जिल्ला प्रहरी परिसरमा दिएको बयानमा आफू आधा तिब्बतीयन भएको स्वीकारेका हुन् ।

जिल्ला प्रहरी परिसर काठमाडौंका प्रवक्ता एवम् एसपी पवनकुमार भट्टराईले तेन्जिनको नेपाली नागरिकता, बाबुआमा र शिक्षाको प्रमाण पत्रसमेत नेपालकै भन्ने कुनै पुष्टि नभएको बताए ।

‘भदौ २३ गतेको आन्दोलनका क्रममा तेन्जिनले हतियार बोकेको पुष्टि भएन । उनले बोकेको हतियार (पेस्तोल) घातक नभएको पुष्टि भएको छ। उनले केएल टावरमा रहेको द टोय स्टोर इन्टरप्राइजेजमा किनेको खुलेको छ’, भट्टराईले भने, ‘उक्त हतियार जेन-जी आन्दोलनको करिब ६ महिनाअघि बानेश्वरको पुलमा म्युजिक भिडियो सुटिङका क्रममा बोकेको पाइएको छ।’

भट्टराईले तेन्जिन तिब्बतीयन रहेको कुरा करिब पुष्टि भएको बताए । ‘तेन्जिङले आफू आधा तिब्बतीयन भएको स्वीकारेका छन् । प्रहरीसँग पनि उनले स्वीकारेका छन्’, उनले भने, ‘जेन-जीको भ्रष्टाचारविरोधी अभियानमा गएर उत्तेजक रुपमा बोल्नु गल्ती भयो भनेका छन् ।’

उता सुरेन्द्र गुरुङ भन्ने हाकिमको भने कुनै अवैध गतिविधिमा संलग्नता नभेटिएको भट्टराईले बताए । ‘सुरेन्द्र पेशाले र्‍यापर रहेछन् । तेन्जिनसँग डेढ वर्ष अगाडि र्‍याप ब्याटलमै भेट भएको देखियो’, उनले भने, ‘तेन्जिनले म्युजिक भिडियो सुटिङका क्रममा नक्कली पेस्तोल प्रयोग गरेको स्वीकारेका छन् । सुरेन्द्रले उसबेला टीओबीको अर्थ ओरिजिनल ब्रदर्श राख्न सुझाएको पाइएको छ । तर तेन्जिले तिब्बतीयन ओरिजिनल ब्लड लेखेरै टीसर्ट लगाएका पाइयो ।’

तीनवटा कसुर

प्रहरीले तेन्जिनविरुद्ध विभिन्न तीनवटा कसुरमा मुद्दा अघि बढाएको भट्टराईले उल्लेख गरे । तेन्जिनले जेन-जी आन्दोलनका समयमा ‘मेरो देश फिर्ता दे’ भन्दै नाराबाजी गरेका थिए । आफूले उक्त नारा लगाउनु पनि गल्ती भएको तेन्जिनले स्वीकारेका छन् ।

पहिलो मुद्दा जिल्ला प्रशासन कार्यालयमा अभद्र व्यवहार गर्न नहुने कसुरमा चलाइएको थियो । जसमा प्रशासनले तेन्जिनसँग ७५००० धरौटी मागेको छ ।

अर्को मुद्दा लिखतसम्बन्धी पनि चलाइएको छ। त्यसैगरी नागरिकता र राहदानीसम्बन्धी कसुरमा पनि मुद्दा चलाइएको भट्टराईले बताए । उनका अनुसार तेन्जिनबाट लागुऔषध गाँजा पनि बरामद भएको छ।

प्रहरीले अहिलेसम्म टीओबीसँग सम्बन्धित १३ वटा बुलेट मोटरसाइकल र एउटा पल्सर मोटरसाइकल नियन्त्रणमा लिएको छ। ‘टीओबीका सबै सदस्य हामीसँग सम्पर्कमा छन्’, उनले भने ।

कोही नाता भेटिएनन्

प्रहरीका अनुसार तेन्जिनको पालन पोषण पेमा डोल्माले गरेको भेटिएको छ। ‘अहिलेलाई तेन्जिनका सबै मान्छे, आफन्त भन्नु पेमा डोल्मा रहेको खुलेको छ। उनले नै ब्यहोरेको पाइएको छ’, उनले भने, ‘बाबुआमाको पहिचान कहीँ कतैबाट खुल्न सकेको छैन । हजुरबाले डेढ वर्षदेखि पालेको भनिएको छ । तर कोभिड कालमा हजुरबाको निधन भएको भनिएको छ ।’

तेन्जिनले लिएको नागरिकता नक्कली भएको पुष्टि यसअघि नै भएको छ। अब उनका बुवाआमा र शिक्षा लिएको विद्यालय पनि नक्कली पाइएको छ। उनले नेपालका कुनै विद्यालयमा अध्ययन नगरी नक्कली शैक्षिक प्रमाण लिएको पाइएको भट्टराईले बताएका छन् ।

उनले काठमाडौं महानगरपालिका-६ बौद्ध ठेगाना भएको जन्मदर्ता र नागरिकता पनि नक्कली ठहर भएको छ। त्यसमा जन्मदर्ता वि.सं. २०६३ चैत १० गते गरेको पाइएको छ। नागरिकता भने २०७९ असारमा जिल्ला प्रशासन कार्यालय काठमाडौँबाट लिएको भनिएको छ । तर नागरिकता नक्कली रहेको खुलिसकेको छ।

यसअघि नै वडा कार्यालयले तेन्जिनसम्बन्धी कुनै पनि विवरण उपलब्ध नभएको जवाफ दिइसकेको छ। तेन्जिन लागुऔषधको मुद्दामा पनि पक्राउ परेकाले ९० दिनसम्म हिरासतमा रहन सक्छन् । उनलाई प्रहरीले असोज २६ गते पक्राउ गरेर अभद्र व्यवहारमा म्याद थप गर्दै अनुसन्धान गरेको थियो ।

परराष्ट्र मन्त्रायलले विदेशस्थित नेपाली नियोगहरूमा मतदाता उपस्थित भएर गरिने मतदानको व्यवस्थापन गर्न लगभग असम्भव रहेको जनाएको छ।

नीति अनुसन्धान प्रतिष्ठानले विदेशमा भएका नेपाली नागरिकलाई तीन प्रकारको मतदानको सेवा उपलब्ध गराउन सकिने निष्कर्ष सहितको अध्ययन प्रतिवेदन सरकारलाई दिएको छ। जसमा दूतावासमा व्यक्ति उपस्थित भएर गरिने मतदान, प्रविधि समर्थित हुलाकी मतदान र इन्टरनेट भोटिङ गर्न सकिने उल्लेख छ।

परराष्ट्र मन्त्रालयले केही समयअघि विश्वभर रहेका नियोगहरूलाई पत्र लेखेर वैदेशिक मतदान गर्न सकिने नसकिनेबारे जबाफ मागेको थियो। नियोगहरूले पठाएको जबाफपछि परराष्ट्र मन्त्रालय दूतावासमा मतदान गराउन नसकिने निष्कर्षमा पुगेको हो।

उनीहरूले यसमा १० वटा चुनौती देखाएका छन् –

पहिलो, तथ्यांक छैन।

परराष्ट्र मन्त्रलायका अनुसार हाल एक सय ११ वटा देशमा संस्थागत रूपमा र १ सय ७८ देशमा नेपाली नागरिक पुगेका छन्। तर सरकारसँग ‘कति नेपाली कहाँ छन्’ भन्ने यकिन तथ्यांक छैन। अझ मतदान केन्द्र राख्नुपर्ने अवस्थामा कुन स्थानमा राख्ने भन्ने नै तय गर्न गाह्रो छ। भट्टराईले उक्त छलफलमा उदाहरण दिँदै भने- युएईको अबुधावीमा कति छन्, दुबईमा कति छन्, हामीसँग तथ्यांक छैन। त्यसैले मतदान केन्द्र कहाँ राख्ने अनुमान गर्न गाह्रो छ।

दोस्रो, सुरक्षामा जटिलता।

परराष्ट्र मन्त्रालयका अनुसार विदेशस्थित नेपाली दूतावासहरूलाई त्यहाँको स्थानीय सरकारले दुई जनासम्म सुरक्षाकर्मी उपलब्ध गराउने गरेका छन्। यदि नेपालले कुनै कार्यक्रम गर्नुपर्‍यो भने भाडामा सुरक्षा लिनुपर्ने हुन्छ। भाडामा लिएका सुरक्षाकर्मीले निर्वाचनमा दिने सुरक्षा कस्तो हुन्छ यकिन साथ भन्न नसकिने मन्त्रालयको तर्क छ। निर्वाचनका लागि बाह्य देशको सुरक्षाकर्मी प्रयोग गर्ने हो भने कानुनबाट निर्वाचनमा बाह्य देशको सुरक्षाकर्मी प्रयोग गर्ने अधिकार दिनुपर्छ।

नेपालले अहिले बाह्य देशबाट मतदान गराउने कानुन बनाउँदैमा समस्या समाधान नहुने परराष्ट्र मन्त्रालयको जिकिर छ।

‘कसैले निर्वाचन बिथोल्यो भने निर्वाचन कानुन अनुसार साठी दिनभित्र मुद्दा दायर गर्नुपर्छ। कसैले हुलदंगा गर्‍यो भने पक्राउ गर्न कसलाई लगाउने? अर्को देशको सुरक्षाकर्मीलाई? भाडाको सुरक्षाकर्मीले पक्राउ गर्छ कि गर्दैन भन्ने प्रश्न हुने भयो’, भट्टराईले छलफलमा भने, ‘केही गरी हुलदंगा भयो र नेपालीको मास डिपोर्टेसन भयो भने झन् समस्या हुन्छ।’

तेस्रो, दूतावासमा कम्पाउण्ड छैन।

परराष्ट्र मन्त्रालयका अनुसार धेरै देशका दूतावासको कम्पाउण्ड सानो छ। धेरै नियोगहरू अपार्टमेन्टमा बसेका छन्। ग्वान्जाओको नियोग २१ औँ तलामा छ। न्यू योर्कको १७ औँ तलामा छ। मलेसियाको २२ औँ तलामा छ। यस्तो अवस्थामा दूतावासमा लाइन लगाएर भोटिङ सकिन्छ कि सकिँदैन सरकारले तय गर्नुपर्छ।

चौथो, कर्मचारीसँग आक्रोशित प्रवासी।

विदेशमा भएका नेपाली दूतावास, कर्मचारी र सरकारप्रति त्यहाँका प्रवासी नेपाली नकारात्मक रहेको परराष्ट्र मन्त्रालय बताउँछ। त्यसैले निर्वाचनमा खटिँदा कर्मचारीकै सुरक्षाको समस्या छ। निर्वाचनका बेला केही गरी कसैले आक्रमण गर्‍यो भने समस्या हुन्छ,’ भट्टराईले छलफलमा भने, ‘दूतावास बाहिर नेपालीको ठूलो जनसंख्या मतदानमा आए कसरी सुरक्षाा दिने स्पष्ट हुनुपर्छ।’

पाँचौं, दूतावास बाहिर मतदान व्यवस्थापनको चुनौती।

परराष्ट्र मन्त्रालयलका अनुसार दूतावासमा मतदान गराउन नसकिने अवस्थामा स्कुल र सामुदायिक स्थल भाडामा लिएर मतदान गराउनुपर्ने हुन्छ। त्यसका लागि ती विद्यालय र सामुदायिक भवनलाई पनि सुरक्षा प्रत्याभूति दिनुपर्ने हुन्छ। परराष्ट्र मन्त्रालय स्रोतका अनुसार कतिपय सामुदायिक भवनको भाडा निकै महङ्गो हुन्छ। कुवेतमा इजिप्टले मतदान गराउन सार्वजनिक स्थल भाडामा लिँदा मात्र कुवेती ६ हजार दिनार तिरेको थियो। जबकी कुवेतमा इजिप्टका ६ लाख जनसंख्यामध्ये १५ हजारले मात्र मत खसालेका थिए। ६ हजार दिनार भनेको नेपाली २७ लाख ८६ हजार हुन आउँछ। त्यत्रो रकम तिरेर मतदान स्थल भाडामा लिन गाह्रो छ। इजिप्टले ती देशमा एक महिना अघि मतदान गराएको र निर्वाचनका लागि ल्यापटप सहित मतदाता भेरिफाइ गर्ने कर्मचारी देशबाट खटाएको थियो।

छैटौं, मतदानको दिनको चुनौती।

सरकारले तोकेको मतदान हुने दिन फागुन २१ गते बिहीबार छ। विदेशमा धेरै नेपालीहरूको आइतबार बिदा हुन्छ। त्यसैले मतदानको कार्यतालिकामा परिवर्तन आवश्यक रहेको परराष्ट्र मन्त्रालयका अधिकारी बताउँछन्।

सातौँ,

परराष्ट्र मन्त्रालयले नेपालीहरू भएका कतिपय ठाउँमा नेपालको नियोग नभएकाले त्यहाँ कसरी मतदान गराउने भन्ने टुंगो गर्नुपर्ने जनाएको छ। ‘क्यारेबियन मुलुकहरूदेखि सुडानसम्म नेपाली छन्,’ भट्टराईले सोधे, ‘सबै नागरिकलाई मताधिकार दिने हो भने कसरी दिने?’

आठौँ,
दुई देशको नागरिकको भेरिफिकेसन। नीति अनुसन्धान प्रतिष्ठानले नेपाली नागरिकलाई अवधि सहितको पासपोर्टका आधारमा मतदानको अधिकार दिन सुझाव दिएको छ। तर परराष्ट्र मन्त्रालयले विदेशको नागरिकता लिए नलिएको भेरिफिकेसन गर्न नसकिने जनाएको छ।

‘पिआर वा टिआर भएका व्यक्ति विशुद्ध नेपाली नागरिक हुन्। पिआरधारीलाई भोट गर्ने अधिकार दिनुपर्छ,’ भट्टराईले भने, ‘विदेशी नागरिकता र पासपोर्ट लिएको व्यक्तिको पहिचान सजिलो छैन। धेरै देशमा ‘प्राइभेट इन्फरमेसन एक्ट’ लागू हुन्छ। स्वघोषणाले मात्र हामीले पुष्टि गर्न सक्ने अवस्था छैन।’

परराष्ट्र मन्त्रालयले बरू पासपोर्टमा भएको भिसालाई र पिआर अथवा टिआरका आधारमा भोट हाल्ने व्यवस्था गर्न सुझाएको छ। भिसामा अवधि हुने र विदेशी पासपोर्ट लिएको मान्छेको भिसा नहुने भएकाले पहिचान गर्न सहज हुने मन्त्रालयले जनाएको छ।

नवौं,
मतदातामा डिजिटल लिटेरेसी छैन। खाडी राष्ट्रमा गएका कतिपय मतदाताले नेपालबाट पठाइएको मेसेज हेरेर बुझ्ने अवस्था नरहेको भट्टराई बताउँछन्।

‘फोन डेढ लाखको बोक्नुहुन्छ। तपाईंको मोबाइलमा यस्तो मेसेज आएको छ, पठाउनुहोस् भन्यो भने हेरेर काम गरिदिनुस् भनेर मोबाइल दिनुहुन्छ,’ भट्टराई भन्छन्, ‘मतदातालाई बुझाउनुपर्ने अवस्था छ।’

दशौँ,
परराष्ट्र मन्त्रालयका अधिकारीहरू विदेशबाट मतदान हुने अवस्थामा अनुमगन गर्ने बजेट समेत दूतावाससँग नहुने बताउँछन्। वर्षमा विभिन्न कार्यक्रम गर्न जम्मा दश लाख बजेट हुने भएकाले त्यो बजेटले निर्वाचनका लागि मतदाताहरूलाई शिक्षा लगायतका कार्य गर्न गाह्रो हुने मन्त्रालयको धारणा छ। त्यसैले नियोगहरूलाई बजेट आवश्यक रहेको अधिकारीहरू बताउँछन्।

परराष्ट्र मन्त्रालयले विदेशस्थित नियोगबाट मतदान व्यवस्थापन गर्न चुनौती भए पनि केही देशबाट पाइलटिङ गर्न सकिने पत्र प्रधानमन्त्री तथा मन्त्रिपरिषद् कार्यालयलाई दिएको स्रोतले जनाएको छ।

८ मंसिर, काठमाडौं । गत २३ र २४ भदौमा भएको जेनजी आन्दोलनमा आगजनी तथा तोडफोड गरेको आरोपमा जिल्ला प्रहरी परिसर काठमाडौंले २६७ जनालाई पक्राउ गरेको छ ।

काठमाडौंका विभिन्न ठाउँहरूमा तोडफोड र आगजनी गरेको आरोपमा अहिलेसम्म २६७ जनालाई पक्राउ गरेर मुद्दा चलाइएको परिसरका एसएसपी रमेश थापाले बताए ।

जसमध्ये २६२ पुरुष र ५ जना महिला छन् । यसरी समातिएका मध्ये प्रहरी हत्यामा संलग्न भएको आरोपमा मात्रै १६ जना पक्राउ परेका थिए । उनीहरू मध्ये १३ जना अहिले पुर्पक्षका लागि कारागार चलान भएको परिसरका एसपी पवनकुमार भट्टराईले बताए ।

३ जना भने अहिले अनुसन्धानका लागि हिरासतमै छन् । अहिलेसम्म प्रहरी हत्यासहित अन्य मुद्दाका गरेर ४३ जना पुर्पक्षका लागि कारागार चलान भएका छन् । ३३ जना धरौटीमा रिहा भएका छन् ।

११३ जनामाथि अहिले अनुसन्धान भइरहेको छ । ८७ जनालाई हाजिरी जमानीमा छाडिएको छ । पक्राउ परेकाहरूविरुद्ध १५४ मुद्दा दर्ता भएका छन् ।

७ मंसिर, काठमाडौं । प्रधानमन्त्री सुशीला कार्कीका प्रमुख स्वकीय सचिव आदर्शकुमार श्रेष्ठले परिवारका सदस्य र नातेदारहरुलाई सचिवालयमा नियुक्ति दिलाएको खुलेको छ । प्रधानमन्त्री तथा मन्त्रिपरिषद्‌ कार्यालयसम्बद्ध स्रोतका अनुसार, नेपाल सरकारको सचिव सरहको सुविधा लिएका आदर्शले पत्नी संगीता श्रेष्ठलाई सहसचिव सरहको स्वकीय सहसचिव बनाएका हुन् ।

स्रोतका अनुसार, नातेदार कमला श्रेष्ठ पनि स्वकीय सहसचिवमा नियुक्त भएका छन् । संगीता र कमला दुवै एकै दिन अर्थात् असोज २ गते नियुक्त भएका हुन् ।सुशीला कार्की प्रधानमन्त्रीमा नियुक्त भएको एक साताभित्रै उनीहरूको नियुक्ति भएको हो । नासु सरहको प्रशासन सहायकमा पुनम श्रेष्ठ र रविना श्रेष्ठ पनि त्यही दिन नियुक्त भएका थिए ।

आदर्श स्वयं सर्वोच्च अदालतको सूचना प्रविधि महाशाखामा करारमा कार्यरत कर्मचारी थिए । उनी सुशीला कार्की प्रधानन्यायाधीश हुँदा पनि सर्वोच्च अदालतमा कार्यरत थिए । प्रतिक्रियामा प्रधानमन्त्रीका प्रमुख स्वकीय सचिव श्रेष्ठले संगीता आफ्नी पत्नी रहेको स्वीकारे ।
‘नाता खोज्दै जाँदा त नेपालभर कोही न कोही नाता पर्छ होला नी,’ उनले भने, ‘मैले नातेदार भनेर सबैलाई नियुक्त गरेको होइन ।’ प्रधानमन्त्रीको सचिवालय संवेदनशील ठाँउ भएकाले प्रधानमन्त्रीको विश्वास र गोप्यताका लागि नजिकको मानिस नियुक्त गरेको र त्यसक्रममा आफ्नो पत्नी चयन भएको उनले स्वीकारे ।

उनले भने, ‘नियुक्त भएका श्रेष्ठ थरका सबै मानिसहरू मैले नै नियुक्त गरेको भनेर अफवाह फैलाइयो, त्यो एकदमै गलत हो ।’ प्रधानमन्त्री सुशीला कार्कीले सम्हालेका मन्त्रालयहरूमा प्रमुख स्वकीय सचिवको हैसियतले आफूले समन्वय गरिरहनुपरेको भन्दै उनले ती निकायमा नियुक्त भएका र जिम्मेवारी पाएका कतिपय व्यक्तिहरूको नाम समेत आफूसँग जोडिएको भन्दै त्यसमा सत्यता नभएको दाबी गरे ।

नियुक्तिहरूमा आफू र पूर्वप्रधानन्यायाधीश कल्याण श्रेष्ठको नाम जबर्जस्ती मुछ्न खोजिएको भन्दै उनले बहालवाला सचिवका परिवारका सदस्य र निजामती सेवामा कार्यरत केही व्यक्तिहरूलाई पनि आफूसँग जोडेको गुनासो गरे । उनले भने, ‘प्रतिस्पर्धाबाट निजामती सेवामा प्रवेश गरेकाहरूलाई पनि मैले नियुक्त गरेको भनी हल्ला चलाइयो ।’