काभ्रे । शिक्षा, विज्ञान तथा प्रविधि मन्त्री गिरिराजमणि पोखरेलले विद्यालयलाई जागिर खाने थलो नबनाउन शिक्षकहरुलाई अनुरोध गरेका छन । जिल्लाको चौंरीदेउराली गाउँपालिका साक्षर गाउँपालिका घोषणा कार्यक्रममा मन्त्री पोख्रेलले विद्यालयलाई जागिर खाने थलो नबनाउन शिक्षकहरुलाई अनुरोध गर्दै उनले भने, गाउँपालिकालाई ९६.८३ % प्रतिशत साक्षर भएर मात्र हुँदैन अब बाँकी रहेका ३.१७ % शत नागरिकलाई खोजीखोजी साक्षर बनाउन गाउँपालिकालाई आग्रह गरे । मन्त्री पोख्रेलले अब तीन ऐन ल्याउने तयारी गरिरहेको उल्लेख गर्दै सबै नेपालीहरुलाई सीप सिकाउनका लागि प्राविधिक र व्यावसायिक शिक्षा नीति ल्याउन लागिएको बताए ।
सोही कार्यक्रममा मन्त्री पोख्रेलले अहिलेसम्ममा ५१ जिल्लालाई साक्षर घोषणा गरिसकेको र नेपालको साक्षरता ८२ प्रतिशत पुगेको बताउँदै आउने वर्षसम्ममा नेपाललाई साक्षर घोषणा गर्दै शिक्षित नेपाल बनाउने दिशामा मन्त्रिपरिषद्ले निर्णय गरिसकेको बताए । शिक्षकहरुको परिचय कुन ट्रेड युनियनको कुन तहमा भन्दा पनि गुणस्तरीय शिक्षा कतिको प्रदान गर्न सकियो भन्ने तर्फबाट परिचित हुन जरुरी रहेको बताउदै उनले भने, शिक्षा पूर्वाधारको पनि पूर्वाधार भएको उल्लेख गर्दै मानव जनशक्ति तयार गर्ने माध्यम भएकाले अनिवार्य तथा सङ्घीय संसद्बाट निःशुल्क शिक्षा ऐन बनाइसकेको र त्यसको कार्यान्वयन गर्ने चरणमा रहेको उल्लेख गरे ।
विद्यार्थीले छिटो बुझ्ना मातृभाषामा पढाउनु पर्नेमा जोड दिदै मन्त्री पोखरेलले शिप सिकाईसँग विद्यार्थीलाई जोड्नुपर्नेमा पनि जोड दिए । ‘घरमा आमा–बुबासँग जुन भाषा बोल्छ त्यही भाषामा पढाउनु पर्छ । अध्ययन अनुसन्धानले के देखाएको छ भने मातृभाषामा शिक्षा प्रदान गर्दा विद्यार्थीले चाँडै बुझ्न सक्छन ।’ उनले भने, ‘गाउँपालिकाले बिद्यालय कार्य सम्पादन सम्झौता गर्नुपर्छ । १२ सकिदा विद्यार्थीले एउटा सीप सिकेकै हुनुपर्छ । सीप सिकाइसँग विद्यार्थीलाई अब जोड्नु पर्छ ।’ भाषा पढाउने नाममा अंग्रेजी भाषा पढाएर नेपाली कमजोर बनाउन नमिल्ने पोखरेलले बताए ।
१५ देखि ६० बर्ष उमेर समुहका ९६.८३ प्रतिशत मानिस साक्षर चौरीदेउराली गाउँपालिकालाई साक्षर घोषणा गरिएको हो । बिहीवार अध्यक्ष दिननाथ गौतमले गर्नुभएको प्रस्तावमा नेपाल सरकारका शिक्षा विज्ञान तथा प्रविधी मन्त्री गिरिराजमणि पोखरेल समक्ष प्रस्ताव पेश गरे पश्चात मन्त्री पोखरेलले गाउँपालिकालाई साक्षर घोषणा गरेका हुन ।
The post विद्यालयलाई जागिर खाने थलो नबनाउ : मन्त्री पोखरेल appeared first on Rajdhani Daily News.
