भरतपुर । फ्लोरिकल्चर एसोसिएसन नेपाल चितवन शाखाले जिल्लामा सयपत्री र मखमली फूलको मूल्य तोकेको छ । एसोसिएसनले सोमबार पत्रकार सम्मेलनको आयोजना गरी फूलको मूल्य तोकिएको जानकारी दिएको हो । यसवर्ष तिहारमा बिक्री हुने सयपत्री फूलको खुद्रा मूल्य प्रतिमाला सय रूपैयाँ र प्रतिकिलो ५०० रूपैयाँ तोकिएको एसोसिएसनले जनाएको छ । मखमली फूलको खुद्रा मूल्य प्रतिमाला ८० देखि १०० रूपैयाँ तोकिएको छ ।
गत वर्षको तिहारमा सयपत्री फूलको खुद्रा मूल्य प्रतिमाला ८० देखि १०० रूपैयाँ तोकिएको थियो । यसवर्ष तोकिएको भन्दा बढी मूल्य लिएको पाइए नियमन गर्न एसोसिएसनले स्थानीय सरकार र जिल्ला प्रशासन कार्यालयलाई आग्रह गरेको छ । त्यसैगरी, जिल्लाको उत्पादनले तिहारमा एक लाख माला अपुग हुने एसोसिएसनको अनुमान छ ।
जिल्लामा तीन लाखवटा मालालाई पुग्ने फूल उत्पादन हुने देखिएको फ्लोरिकल्चर एसोसिएसन नेपाल चितवन शाखाका अध्यक्ष तेजेन्द्र सापकोटाले बताए । माला र सजावटका लागि भने चार लाख माला आवश्यक पर्ने आकलन गरिएको उनको भनाइ छ । लक्ष्मीपूजाको दिन र भाइटीकाको दिनका लागि फूलको माग उच्च हुन्छ ।
‘चितवनको मालाले पुगेन भने दाङलगायतका जिल्लाबाट ल्याएर पनि यहाँको माग पूर्ति गर्नुपर्ने हुन्छ । भारतीय मालाचाहिँ सकेसम्म झिकाउँदैनौँ’, उनले भने, ‘डेकोरेसनमा अलि बढी फूल प्रयोग भयो भने नपुग्न सक्छ ।’
एसोसिएसनका अनुसार जिल्लामा राष्ट्रिय स्वतन्त्र पार्टीले लगाएको समेत गरी करिब ५० बिघामा सयपत्री फूल लगाइएको छ । रास्वपाले मात्रै १० बिघामा फूल लगाएको जनाएको छ । गत वर्ष जिल्लामा ३५ बिघामा सयपत्री फूल लगाइएको एसोसिएसनका सचिव सुलभ श्रेष्ठ बताउँछन् । यसवर्ष तिहार केही पछाडि धकेलिएकाले जिल्लामा गत वर्षभन्दा धेरै फूल उत्पादन भएको उनी बताउँछन् ।
फूल टिपेर एउटा माला तयार गर्दामात्रै २० रूपैयाँ खर्च हुने पुष्प व्यवसायी बताउँछन् । एउटा बोटमा सामान्यतः तीनवटा मालाका लागि पुग्ने फूल फुल्ने र एउटा मालामा किसानले १५ रूपैयाँमात्रै नाफा कमाउने उनीहरु बताउँछन् । जिल्लामा फूल आफैँ उत्पादन गरेर व्यावसायिकरुपमा पुष्प व्यवसाय गर्ने करिब सात जनामात्रै छन् ।
https://ujyaalonepalnews.com/archives/32990
