चितवन, २१ कार्तिक । बागमती प्रदेश अन्तर्गत सञ्चार रजिष्टारको कार्यलयद्वारा आयोजित चितवनमा पत्रकार महिलाहरुका लागि ५ दिने ‘समाचार लेखन तथा सम्पादन कार्यशाला’ हिजो सोमबार समापन गरिएको छ ।
बागमती प्रदेशमा क्रियाशिल पत्रकार महिलाहरुका लागि आयोजित ‘समाचार लेखन तथा सम्पादन कार्यशाला’को बागमती प्रदेश सरकारका प्रवक्ता तथा आन्तरिक मामिला तथा कानून मन्त्री गंगानारायण श्रेष्ठले २०८० कार्तिक १६ गते उद्घाटन गर्नु भएको थियो ।
हिजो सोमबार समापन कार्यक्रममा सहभागी पत्रकार महिलाहरुलाई प्रमाणपत्र वितरण गर्दै सञ्चार रजिष्टार रेवती प्रसाद सापकोटाले यस ५ दिने सिकाइ कार्यशालाले आगामी दिनमा उहाँहरुलाई समाचार लेखन तथा सम्पादनमा थप सहयोग पुग्ने विश्वास व्यक्त गर्नु भयो ।
कार्यशाला समापनका क्रममा सञ्चार रजिष्टार सापकोटाले अघिल्लो वर्ष पनि पत्रकार महिलाहरुका लागि यस्तै लेखन तथा सम्पादन कार्यशाला मकवानपुरको दामनमा पनि सञ्चालन गरिएको जानकारी दिनु भयो । उहाँले बागमती प्रदेशमा पत्रकारितालाई गुणस्तरीय बनाउन प्रयास जारी रहेको पनि बताउनुभयो ।
चितवनको चम्पा नगर, हवेलीमा सुरु भएको उक्त ५ दिने कार्यशालामा बागमती प्रदेशका १३ वटै जिल्लाबाट विभिन्न मिडियामा कार्यरत ३१ जना पत्रकार महिलाहरुको सहभागिता रहेको थियो । सो ५ दिने ‘समाचार लेखन तथा सम्पादन कार्यशाला’ मा प्रशिक्षकद्वय विनोद ढुंगेल र सुरेन्द्र पाण्डेले प्रशिक्षण दिनु भएको थियो ।
https://ujyaalonepalnews.com/archives/32994
