कतार एयरवेज सहिद स्मारक ए डिभिजन लिगको नवौँ चरणअन्तर्गत आजको दोस्रो खेलमा मछिन्द्र क्लबले थ्रिस्टार क्लबलाई शून्यका विरुद्ध २ गोलले पराजित गरेको छ। यसअघि आजै भएको पहिलो खेलमा सशस्त्रको एपीएफलाई नेपाल पुलिस क्लबले १–० गोल अन्तरले पराजित गरेको थियो।
मछिन्द्राका लागि आज रेजिन सुब्बाले ३८ मिनेटमा र विशाल राई (बी)ले ९० मिनेटमा गोल गर्दै क्लबलाई ३ अंक दिलाएका हुन्। जितसँगै मछिन्द्र लिगको शीर्षस्थानमा फर्किएको छ।
अघिल्लो सिजन मनाङमा रहेका प्रायः सबै र थ्री स्टारका केही खेलाडीलाई समेटेर बलियो टोली बनाएको मच्छिन्द्रसँग विराज महर्जन, विशाल राई, विशाल श्रेष्ठ, सुजल श्रेष्ठ, रेजिन सुब्बा, देवेन्द्र तामाङ, रन्जित धिमाल र एडिलाजा सोमिडेजस्ता खेलाडी रहेका छन्।
खेलमा अधिकांश समय थ्रिस्टारले दबाब बनाए पनि गोल गर्न भने सकेन। थ्रिस्टारको लिगमा औसत प्रदर्शन रहेको छ। योसँगै मछिन्द्रको उपाधि यात्रा बलियो हुँदै गएको छ।
