रत्ननगर, बैशाख २७ । कालिका नगरपालिका वडा नं. ५ पदमपुरमा रहेको भीमोदय नमुना मा.वि ले बुधवार स्थापनाको ५३औं बार्षिकोत्सव तथा अभिभावक दिवस मनाएको छ ।
सामुदायिक विद्यालय तर्फ पूर्वी चितवनमै अब्बल मानिदै आएको सो विद्यालयले शैक्षिक उपलब्धीको समीक्षा, शैक्षिक विकासका योगदान गर्नेलाई सम्मान तथा सिकाइ उपलब्धी सुधार योजना गरेर बार्षिकोत्सव मनाएको हो । २०२७ सालमा स्थापना भएको सो विद्यालय २०८० सालमा शैक्षिक उपलब्धीलाई थप वृद्धि गर्न सुधार योजना ल्याएको हो ।
विद्यालयका प्रधानाध्यापक इन्द्र पौडेलले सुधार योजनामा कक्षा कोठामा आधुनिक प्रविधिको प्रयोग, आइसीटीको प्रयोगलाई प्राथमिकता दिने, कम सिकाइ उपलब्धी हासिल गर्ने विद्यार्थीलाई उपचारात्मक शिक्षण गरिने, विद्यार्थीहरुको सिर्जनशिलतामा बृद्धि गर्न प्रयोगशाला र पुस्तकालय प्रयोगमा बृद्धि गर्ने उल्लेख गरे ।
त्यसैगरी शैक्षिक सामाग्रीको प्रयोग र शिक्षकहरुबाट विद्यार्थीहरुमा परामर्श सेवा उपलब्ध गराउने, शिक्षकलाई पुर्नताजगी तालिम दिने, शैक्षिक सुधारको लागि शिक्षाविद्हरुसंग अन्तक्र्रिया कार्यक्रम गर्ने, शिक्षण सिकाइमा सुधारात्मक मुल्याङ्कनका साधन प्रयोग गर्ने सुधार योजनामा जनाइएको छ ।
कार्यक्रमका प्रमुख अतिथि बागमती प्रदेश सांसद कृष्ण प्रसाद सिल्वालले सार्वजनिक विद्यालय ध्वस्त बनाउन शैक्षिक माफियाहरु लागिपरेको बताए । भौतिक पूर्वाधारहरु तथा स्रोत साधन सम्पन्न हुँदा समेत शिक्षामा सुधार हुन नसकेकोमा चिन्ता व्यक्त गरे
उनले विद्यालयमा विद्यार्थीको आर्कषण बढाउन पूर्वाधार निर्माण र शिक्षण सिकाइलाई प्रभावकारी बनाउने गरी काम गर्ने बताए ।
कालिका नगरपालिकाकी उप मेयर विमला लामाले सामुदायिक विद्यालयको शैक्षिक सुधारको लागि प्रविधिको प्रयोग र प्राविधिक शिक्षा सुरु गरिएको बताइन् ।
कार्यक्रममा भीमोदय नमुना मा.विको शैक्षिक गुणस्तर विकासमा योगदान गरेका पूर्व अध्यक्ष, शिक्षक, शिक्षिकाहरु, उत्कृष्ट अंक ल्याई उत्तिर्ण गर्ने विद्यार्थीहरु, कर्मचारीलाई सम्मान गर्नुका साथै जेहेन्दा, विपन्न विद्यार्थीहरुलाई छात्रवृत्ति र शैक्षिक सामाग्री बितरण गरिएको छ ।
विद्यालय व्यवस्थापन समितिका अध्यक्ष अमृत श्रेष्ठको अध्यक्षतामा भएको कार्यक्रममा विद्यालय व्यवस्थापन समितिका पूर्व अध्यक्ष कमल प्रसाद आचार्य, वडा नं. २ का वडा अध्यक्ष लक्ष्मण पौडेल, अभिभावक दिवश पाण्डे, विद्यार्थी आलिशा अधिकारी लगायतले मन्तव्य राखेका थिए ।
कार्यक्रममा विद्यालयका सहायक प्रधानाध्यापक राम प्रसाद खनालले आर्थिक प्रगति प्रतिवेदन प्रस्तुत गरेका थिए । कक्षा १२ सम्म पढाई हुने सो विद्यालयमा १ हजार ५ सय विद्यार्थी अध्यायनरत रहेको शिक्षक डा. हरिप्रसाद कंडेलले जानकारी दिए ।
https://ujyaalonepalnews.com/archives/27229
