उज्यालो नेपाल – रत्ननगरको वडा नं. १६ पिठुवामा रहेको पिठुवा गरिबी निवारण साना किसान कृषि सहकारी संस्थाको भवन सिलान्यास गरिएको छ । भवनको आज (शनिवार) एक कार्यक्रमका बिच प्रदेशसभा सांसद कृष्ण प्रसाद खनालले सिलान्यास गरे ।
भवन सिलान्यास गर्दै सांसद खनालले कृषि तथा पशु क्षेत्रको विकासका लागि सहकारीले अभियान सञ्चालन गर्नुपर्ने बताए । सहकारीको विकासका लागि आफु सधैं तत्पर रहेको उल्लेख गर्दै खनालले निर्माण हुने भवनको लागी बजेट अभाव हुन नदिने प्रतिबद्धता व्यक्त गरे।
४५ लाखको अनुमानित लागतमा बन्ने ४ कोठे भवनको लागी वडा नं. १५ ले चालु वर्षको बजेट बाट २.५ लाख र प्रदेश सरकार बाट २० लाख प्राप्त भएको संस्थाका अध्यक्ष दिनेश घलानले जानकारी दिए । निर्माणको क्रममा नपुग रकम संस्थाले लगानी गर्ने उनले उल्लेख गरे । कार्यक्रममा सम्बोधन गर्दै अध्यक्ष घलानले अर्थतन्त्रको खम्बामध्ये सहकारी संस्था पनि एक खम्बा भएकाले दिगो विकासको लक्ष्य प्राप्त गर्न सहकारी संस्थाहरुले महत्वपूर्ण भूमिका खेलेको बताए ।
साबिक पिठुवा गाविस हाल रत्ननगरको वडा नं. १४,१५ र १६ कार्यक्षेत्र रहेको सहकारीले वडा नं. १५ मा भवन निर्माण गर्न लागेको हो । तिन वर्ष अगाडी झन्डै २१ लाखको लागतमा खरिद गरिएको साढे १३ धुर जग्गामा भवन निर्माण हुनेछ ।
वि.सं. २०६८ सालमा स्थापना भएको सहकारी स्थापनाको सुरुवात देखि नै भाडामा कार्यालय संचालन गरिदै आएको छ । झन्डै १५०० जना शेयर सदस्य भएको सहकारी भाडाको साँघुरो कार्यालयबाट सेवाप्रदान गर्नुपर्दा आफुहरुले अनेकौं समस्या भोगिरहेको सहकारीका व्यवस्थापक सुलोचना खनाल तिवारीले बताईन् ।
शिलान्यास कार्यक्रममा वडा नं. १५ का वडाध्यक्ष आशिक तामांग, वडासदस्यहरु, विभिन्न संघसंस्थाका प्रतिनिधिहरु, सहकारीका सल्लाहकार समिति, लेखा समिति, निर्वाचन समिति सदस्यहरु, शेयर सदस्य लगायत सरोकारवालाहरुको उपस्थिति रहेको थियो । कार्यक्रम संस्था कि सचिव कोपिला पौडेलले संचालन गरेकी थिईन् ।
https://ujyaalonepalnews.com/archives/31591
