माछाको परिकारमा कुनै पनि रङ्ग नमिसाउने मलेखुका माछा व्यवसायीको प्रतिबद्धता

धादिङ- मलेखुका माछा ब्यपारीहरुले अबदेखि माछाको परिकार बनाउँदा कुनै पनि अखाद्य रङ्ग नमिसाउने बताएका छन् ।

केही दिन अघि स्थानीय प्रशासनले मलेखु बजारमा गरेको अनुगमनका क्रममा विक्रिका लागि राखिएको सबै माछाहरुमा अखाद्यय बस्तु मिसावट गरेको भन्दै जरिवानासहित माछा जफत गरेपछि ब्यपारीले रंग नमिसाउने प्रविद्धता जनाएका हुन् ।

माछाको स्वाद र परिकारका लागी निकै प्रशिद्ध मलेखु बजारमा विक्रिका लागी राखिएको माछामा मानव स्वास्थ्यका लागी निकै हानिकारक रसायनयुक्त रङ्ग मिसाएको भन्दै कारवाही गरेको हो । अब भने कुनै किसिमको रङ्ग नमिसाउने सामुहिक प्रतिबद्धता ब्यापारीहरुले गरेका छन् ।

अनुगमनपछि मलेखु बजारका माछा ब्यपारीहरुले आर्थिक मन्दीका कारण सुस्ताएको ब्यापार ब्यवसाय पर्व सुरुभएसँगै केही सुधार हुने आशा रहे पनि अहिले भने ठप्प जस्तै भएको बताएका छन् ।

आफुहरुले मानव स्वास्थ्य माथि खेलवाड नगरेको र खाद्यय तथा गुण नियन्त्रकबाट आएको अनुगमनले नै सिफारिश गरेको रङ्ग प्रयोग गर्दै आएको समेत ब्यपारीहरुले बताएका छन् ।

तर मात्रा भने आफुहरुले मिलाउन नजान्दा यस्तो अवस्था आएको स्वीकारेका छन् । अहिले भने मालेखु बजारका होटल ब्यवसायी माछा ब्यपारीले सबै माछाहरु रङ्ग नलागई विक्रिका लागी राखेका छन् ।

ब्यापारीहरुले यसरी वर्षमा एक पटक मात्रै नभई हरेक महिना अनुगमन गर्नुपर्ने माग समेत गरेका छन् । जस्ले गर्दा आफुहरुलाई सुध्रिने मौका मसेत पाउने भनाई छ ।

अहिलेको अवस्थामा ब्यापार ब्यावसाय पनि सुस्ताएको बताउँदै अनुगमनका नाममा वर्षमा एक पटक मात्रै आएर गर्ने चर्को जरिवाना अर्को समस्याको विषय बनेको गुनासो ब्यपारीहरुले गरेका छन् ।

माछाको लागी प्रशिद्ध मानिएको मलेखुको मजुवा बजारमा मात्रै ४५ वटा होटल तथा एक दर्जन भन्दा धेरै माछा व्यवसायीहरु रहेका छन् । उनिहरुले प्रतिदिन एक टनको हाराहारीमा माछाका विभिन्न परिकारहरु बनाई विक्रि गर्ने गर्दछन् ।