उज्यालो नेपाल। रत्ननगरको वडा नं. १६ मा खानेपानी तथा सरसफाई सम्बन्धी सचेतना कार्यक्रम गरिएको छ । पिठुवा खानेपानी तथा सरसफाई उपभोक्ता संस्थाले कार्यक्रम आयोजना गरेको हो।
कार्यक्रममा वडा भित्र रहेका ११ वटा टोल विकास संस्थाका प्रतिनिधि र सरोकारवालाहरु गरि झन्डै ८० जनाको सहभागिता रहेको थियो ।
कार्यक्रमको उद्घाटन सत्रमा संस्थाका अध्यक्ष हरिकुमार श्रेष्ठले, पछिल्ला दिनहरुमा गरिएको धारा अनुगमनको क्रममा ३० प्रतिशत भन्दा बढी उपभोक्ताहरुले खानेपानीको धाराको सरसफाईमा ध्यान नदिएको पाईएको जानकारी दिए।
खानेपानीको मिटर र धारा वरपर फोहोर पानी जमेका कारण महामारी फैलनसक्ने अवस्था देखिएकाले सचेतना कार्यक्रम गरिएको उनले बताए ।
कार्यक्रमका प्रमुख अतिथि समेत रहेका वडाध्यक्ष हेमराज थापाले उपभोक्ता सचेत नभए सम्म संस्थाको एकल प्रयासले मात्र धारा सरसफाई र खानेपानीमा स्वच्छता कायम गर्न कठिन हुने धारणा व्यक्त गरे ।
कार्यक्रमका सहभागीहरुलाई खानेपानी तथा सरसफाई डिभिजन कार्यालयका पुर्व ईन्जिनियर तथा चितवन जिल्ला खुल्ला दिशा मुक्त क्षेत्र अभियानका संयोजक शिवराज न्यौपाने र स्वास्थ्यका लागि पानी र सरसफाई विज्ञ निशा प्रजाले सहजीकरण गरेका थिए ।
संस्थाका सचिव रुपेश तिवारीले संचालन गरेको कार्यक्रममा उपाध्यक्ष तुलबहादुर रायमाझीले सहभागीहरुलाई स्वागत मन्तव्य व्यक्त गरेका थिए ।
संस्थाले आफ्नो सेवाक्षेत्र रत्ननगर १४,१५ र १६ का सबै टोलविकास संस्थाका प्रतिनिधिहरुलाई सचेतना प्रदान गर्ने कार्यक्रम अनुसार मंगलबार वडा नं. १६ मा कार्यक्रम आयोजना गरिएको हो । अध्यक्ष श्रेष्ठका अनुसार बुधबार वडा नं. १४ र विहिवार वडा नं. १५ मा कार्यक्रम आयोजना गरिने छ ।
