काठमाडौं- श्री एयरलाइन्सले काठमाडौं–भरतपुर उडान भर्ने तयारी थालेको छ । कम्पनीले क्यु ४०० सिरिजको जेट इन्जिन जहाजमार्फत भरतपुरमा उडानको तयारी गरेको हो ।
भरतपुरमा परीक्षण उडानका लागि श्री एयरलाइन्सले नेपाल नागरिक उड्ययन प्राधिकरणसँग अनुमति मागेको छ । श्री एयरलाइन्सले उडान अनुमति पाएमा बुद्ध एयरको एकाधिकार तोडिने छ ।
यसैपनि बुद्ध एयरको एटीआर–४२ सिरिज फेज आउट हुने चरणमा रहेको प्राधिकरणका कर्मचारी बताउँछन् । श्री एयरलाइन्सले टर्बोप्रोपको उडानको लागि अनुमति मागेको हो ।
श्री एयरलाइन्सले नियमित रुपमा भरतपुरमा उडान भरेमा हवाईभाडा घट्ने विश्वास लिइएको छ । बुद्ध एयरले अहिले काठमाडौँ–भरतपुरको हवाई भाडा एकतर्फी चार हजार ७३९ रुपैयाँ लिने गरेको छ ।
श्री एयरलाइन्सले उडान अनुमति मागेको जहाजको क्षमता ८० सिटको हो । छोटो रनवेमा पनि अवतरण गर्न मिल्ने जहाज यस कम्पनीसँग रहेको छ ।
जहाज उत्पादन कम्पनी बम्बार्डियर एरोस्पेसले क्षेत्रीय र सर्ट हल रुट अपरेशनलक्षित क्यु ४०० सिरिजका जहाज उत्पादन गरेको हो ।
