मे ३१ सम्म कतार जानेले क्वारेन्टाइनमा बस्नुपर्ने
कतार गएर क्वारेन्टाइनमा बस्नुपर्ने प्रावधान मे ३१ सम्मका लागि बढाईएको छ । मे ३१ भित्रसम्म कतार आउने कतारी नागरिक, आप्रवासी र अन्य भिसा भएका सबै आगमनका यात्रुले अनिवार्य क्वारेन्टाइन बस्नुपर्ने,; डिस्कभर कतारले आफ्नो वेबसाइटमा भनेको छ । क्वारेन्टाइनको लागि होटल बुक गर्नुपर्ने एकमात्र माध्यम रहेको डिस्कभर कतारको वेबसाइटले हाल मे महिनाका लागि पनि बुकिङ खुला गरिसकेको छ ।
यसअघि क्वारेन्टाइनको आवश्यकता फेब्रुअरी १५ सम्मका लागि थप गरिएको थियो । हाललाई कतार आउन कतारी नागरिक, उनीहरूको सहयोगी , स्थायी बासिन्दा वा अन्य स्वीकृत भिसा धारकहरूको लागि अनुमती दिइएको छ । त्यस्तै कतारी आईडी भएका आप्रवासीले कतार पोर्टलको वेबसाईट मार्फत आवेदन भरेर परमिट प्राप्त गरेपछि कतार आउन पाउनेछ ।
नयाँ भिसामा आउनेहरुका लागि पनि नोवेम्बर महिना देखि प्रक्रिया सुरु भैसकेको छ । स्वास्थ्य मन्त्रालयद्वारा प्रकाशित सूची अनुसार कम जोखिम भएका देशहरू बाट आएकाहरु घरमै क्वारेन्टाइन बस्न पाउनेछन् र बाँकीले सरकारले तोकेको सेन्टरमा क्वारेन्टाइन बस्नुपर्नेछ । कतारमा क्वारेन्टाइन बस्नका लागि लाग्ने शुल्क हाललाई १,९५० रियाल देखि माथि रहेको छ । QNKhabar.com बाट