निराजन घिमिरे, भदौ १०,चितवन- विषादीका कारण कालिका नगरपालिका ९ शक्तिखोरका मौरीपालक कृषक प्रभा केसीको ५२ घार मौरी मरेका छन् । मौरी चराउनको लागी छिमेकी नगर रत्ननगरको वडा नं. १४ पिठुवामा लगेको बेला घटना भएको हो । पिठुवाको बुद्धचोक नजिकै राखिएका ५७ घार मौरी मध्ये ५२ घार मौरीमा गएराती अज्ञात समूहले रासायनिक विषादी छर्कंदा मौरी मरेको हो ।
मौरी नष्ट हुँदा झन्डै ६ लाख बराबरको क्षति भएको कृषक केसीका श्रीमान् रणबहादुर थापाले जानकारी दिए । अज्ञात समूहले विषादी हालेका कारण उत्पादन दिने बेला भएका लाखौँ मूल्य बराबरका मौरी नष्ट भएको मौरीपालक संघ कालिकाका अध्यक्ष तेजप्रसाद लामिछानेले बताए । घटनामा संलग्न व्यक्तिको खोजी कार्य गरि कारबाही गर्न र कृषकलाई उचित क्षतिपुर्तिको लागी उनले प्रशासन संग आग्रह गरे ।
हिजो भदौ ९ गते राती घटना भएपछि घटनाको विषयमा बुझ्न सरोकारवाला पक्षले घटनास्थलको अनुगमन गरेका छन् । केशीले विगत लामो समय देखि थापा पशुपंक्षी तथा मौरी फर्म संचालन गरि मौरीपालन व्यवसाय गर्दै आएकी छन् । वर्षातको समयमा ‘चरन क्षेत्रको अभाव भएसंगै उनले झन्डै २ महिना अगाडी मौरीको घार पिठुवामा लगेकी थिईन् ।
अब उत्पादन सुरु हुने सिजनमा मौरी मासिए पछी आफूमाथि ठुलो बज्रपात परेको केसीका श्रीमान् रणबहादुर थापाले बताए । वर्षातमा चिनिपानी खुवाएर राखेको मौरी बाट आफुले यो सिजनमा झन्डै १५ लाख बराबरको उत्पादन अपेक्षा राखेको उनको भनाई छ । मौरी चरनको लागी दाङ, बाके, बर्दीया लैजादा यस्तो घटना नघटेको तर आफ्नै छिमेकी नगरमा ल्याउँदा यस्तो घटना भएकोमा उनि दुखि छन ।
नेपाल मौरी पालक महासंघ अध्यक्ष शिव प्रसाद शर्मा पौडेलले चराउन राखिएको मौरीको गोलामा विष हालेर मार्नु किसानविरुद्धको अपराध भएको भन्दै दोषीलाई पक्राउ गरी कारवाही गर्न सरकारलाई आग्रह गरे । लामिछानेले पीडितलाई उचित क्षतिपूर्ति दिन समेत सरकारसँग माग गरेकाछन् । चितवनमा हाल ५० घारभन्दा बढी मौरी पाल्ने झन्डै ४०० कृषक छन् । यो घटना बाहिर आएसँगै मौरीपालक कृषक थप चिन्तित बनेका छन् ।
https://ujyaalonepalnews.com/archives/24048
