काठमाण्डौ – मलेसियाको पुनरावेदन अदालतले एक नेपालीको मृत्यु-दण्डको सजायलाई जेल सजायमा परिवर्तन गरिदिएको छ । मलेसियामा रहेको नेपाली दूतावासका अनुसार रोजगारीका लागि मलेसिया पुगेका धनुषाको गोविन्दपुरका सुरज देव साह तेलीलाई सुनाइएको मृत्यु-दण्डको सजायलाई पुनरावेदन अदालतले १२ वर्ष जेल सजायमा कायम गरिदिएको हो । मलेसियामा रोजगारी गरिरहेका सुरज सन् २०१६ मा कर्तव्य ज्यान अभियोगमा पक्राउ परेका थिए ।
गएको अगस्टमा उहाँलाई मलेसियाको फौजदारी संहिताको दफा ३०२ अनुसार मृत्यु-दण्डको सजाय तोकिएको दूतावासले जनाएको छ । तर अदालतको फैसला र मृत्यु-दण्डको सजाय सम्बन्धमा गरिएको पुनरावेदनमा मलेसियाको पुत्रजयास्थित पुनरावेदन अदालतले आज बिहीबार(८ सेप्टेम्बर २०३३) मृत्यु-दण्डको सजायलाई १२ वर्ष जेल सजायमा परिवर्तन गरिदिएको हो । पुनरावेदन अदालतको यो फैसलापछि अब सुरज देव साह बाँकी सजाय सकिएपछि नेपाल फर्कने दूतावासले जनाएको छ ।
सन् २०१६ मा लोरी चलाउने एक स्थानीय नागरिकको ह’त्या गरेको ठहर गर्दै उनलाई उच्च अदालतले मृत्यु-दण्डको फैसला गरेको थियो । ३६ बर्षिय सुरज देव साह तेलीलाई सो घटनामा दोषि ठहर्याउँदै मलेसियन पिनल कोडको दफा ३०२ अन्तर्गत उच्च अदालतका न्यायाधिश मोहम्मद राजिद हारुनले मृत्यु-दण्डको फैसला गरेका थिए ।
सुरज मलेशियाको एउटा पाम तेल बगानमा काम गर्थे । तेलीले एक ३४ बर्षिय स्थानीय मलेसियन व्यक्तिलाई सन् २०१६, डिसेम्वर २ तारिखका दिन विहान १ः३० देखि ४ बजेर ५ मिनेटको बीचमा ह’त्या गरेको प्रहरीको अभियोग थियो ।
https://ujyaalonepalnews.com/archives/24274
