काठमाण्डौ – साउदीमा मस्तिष्क घात भई अस्पतालमा उपचाररत महोत्तरीका जितेन्द्रकुमार झालाई नेपाल ल्याइएको छ । रोजगारीको सिलसिलामा साउदीमा रहनुभएका जितेन्द्रकुमार कोठामा बसिरहेकै बेलामा मस्तिष्क घात भई ढलेको र उपचारको क्रममा केही सुधार आएको भए पनि शरीरको बायाँ भाग नचल्ने भएकाले डाक्टरको सल्लाह अनुसार नेपाल पठाइएको त्यहाँ रहेको नेपाली दूतावासले जनाएको छ ।
दूतावासका अनुसार, सरकारले नै सम्पूर्ण खर्च व्यहोरेर जितेन्द्रकुमारलाई स्वदेश ल्याइएको हो । उहाँको उपचारमा संलग्न डाक्टरले परिवारको साथमा राखेर उपचार गर्दा केही सुधार हुन सक्ने सुझाव दिएका थिए । जसअनुसार साउदीको अस्पतालले पनि जतिसक्दो चाँडो नेपाल लैजान दूतावासलाई तागेता गरेको थियो ।
तर स्ट्रेचरमा राखेर पठाउन पर्ने अवस्थाका कारण पठाउने प्रयास गर्दा गर्दै पनि सम्भावना नभएको र पछिल्लो समय नेपाल एयरलाइन्समा त्यो व्यवस्था भएसँगै उहाँसहित थुप्रै गम्भीर प्रकृतिका बिरामी श्रमिकलाई स्वदेश पठाउन सहज भएको दूतावासले जनाएको छ ।
नेपाल एयरलाइन्सले साउदीको रियादमा नियमित उडान सञ्चालन गरेपछि वैदेशिक रोजगार बोर्डले जहाजमा स्ट्रेचर राख्ने व्यवस्था गर्न र त्यसबापतको खर्च समेत व्यहोर्ने गरेको छ । शुक्रवार नेपाल ल्याइएका जितेन्द्रकुमारको अहिले परिवारले जिम्मा लिएर काठमाण्डौको वीर अस्पतालमा भर्ना गरी उपचार गराइरहेको छ ।
https://ujyaalonepalnews.com/archives/24653
