निराजन घिमिरे, मङ्सिर १५- गत मङ्सिर ४ गते सम्पन्न प्रतिनिधिसभा तथा प्रदेशसभा सदस्य निर्वाचनको मतगणना अझै जारी छ । देशका केहि निर्वाचन क्षेत्रहरुमा मतगणना जारी रहेता पनि चितवनको भने पूर्ण नतिजा सार्वजनिक भैसकेको छ । सार्वजनिक नतिजा अनुसार चितवनको तिन वटा निर्वाचन क्षेत्र मध्ये दुई वटामा राष्ट्रिय स्वतन्त्र पार्टीका उम्मेदवार विजयी भएका छन् भने एउटा निर्वाचन क्षेत्रमा राप्रपाका नेता विक्रम पाण्डे निर्वाचित भएका छन् ।
चितवनमा प्रतिनिधिसभा तर्फको तिन क्षेत्रमा यो पटक ५५ जना उम्मेदवार चुनावी मैदानमा थिए । ति ५५ जना मध्ये २८ जना स्वतन्त्र उम्मेदवार थिए भने बाँकी विभिन्न राजनैतिक दलबाट उम्मेदवार बनेका थिए । यि ५५ जना उम्मेदवार मध्य ५ जना उम्मेदवारले भने १० भोट पनि प्राप्त गर्न सकेनन् । यि ५ जना मध्ये पनि दूइ जनाले त जम्मा १/१ भोट मात्र प्राप्त गरे । चितवन क्षेत्र नम्बर १ बाट डोजर चुनावचिन्ह लिएर उम्मेदवार बनेका तिलक मणी पाठक र क्षेत्र नम्बर ३ बाट टि-टेबल चुनावचिन्ह लिएर उम्मेदवार बनेका भिम्सीन बस्नेतले एक/एक मत मात्र पाए । उनीहरूलाई आफ्नै घरका सदस्यहरूले समेत पत्याएको देखिँदैन ।
त्यस्तै चितवन क्षेत्र नं. २ बाट पुतली चुनाव चिन्ह लिएर उठेका खेमराज भट्टराईले ४ मत पाएका छन् भने चितवन क्षेत्र नं. ३ बाट हारमोनियम चुनाव चिन्ह लिएर मैदान उत्रेका हरि तामांगले ५ मत र सोही निर्वाचन क्षेत्रबाट नरिवल चुनाव चिन्ह लिएर मैदान उत्रेकी सुमित्रा राई गिरीले पनि जम्मा ९ मत पाईन् । यि उम्मेदवारहरुलाई आफ्नै परिवार र साथीभाई ईष्टमित्रले समेत नपत्याएको देखिन्छ । १० मत पनि कटाउन नसक्ने यी पाँचैजना स्वतन्त्र उम्मेदवार हुन् ।
चितवनमा गत स्थानिय निर्वाचनमा पनि ७ पालिकामा पालिका प्रमुखमा उम्मेदवारी दिएका ६७ जना मध्ये १० जनाले १० मत कटाउन सकेका थिएनन् भने उपप्रमुखमा उम्मेदवारी दिएका ४० जना मध्ये ३ जनाले १० मत प्राप्त गर्न सकेका थिएनन् । यि ३ जना मध्ये पनि माडी नगरपालिकामा उपमेयर पदमा उम्मेदवार बनेका टिका सुवेदीले १ मत पनि प्राप्त गरेनन् । अर्थात उनि आफैले आफुलाई मत नहालेको देखिन्छ ।
यस्तै वडाध्यक्षमा उम्मेदवारी दिएका ४४५ जना मध्य ५३ जनाले १० मत नकटाएको देखिन्छ भने यि ५३ जना मध्ये पनि १९ जनाले शुन्य मत प्राप्त गरेका थिए । यि १९ जनाले पनि आफुले आफैलाई मत नदिएको देखिन्छ ।
https://ujyaalonepalnews.com/archives/25122
