सेनाभित्रको अनियमितता छलफल : रक्षामन्त्री र सेनापति नै अनुपस्थित

काठमाडौं ।नेपाली सेनाभित्रको अनियमितताबारे छलफल गर्न राज्य व्यवस्था समितिले बोलाएको बैठकमा उपप्रधान तथा रक्षामन्त्री ईश्वर पोखरेल र प्रधान सेनापति पूर्णचन्द्र थापा अनुपस्थित भएका छन् । मिनी संसद्का रूपमा रहेको संसदीय समिति बैठकमा उनीहरू उपस्थित नभएपछि छलफल नै हुन सकेन ।

बैठक स्थगित गर्दै समिति सभापति शशी श्रेष्ठले अर्को बैठकमा अनिवार्य उपस्थित हुने सन्देश मन्त्रीसमक्ष पु¥याइदिन रक्षा सचिव रेश्मीराज पाण्डेलाई निर्देशन दिइन् । नेपाली सेनाभित्र अनियमितता भएको दाबी गर्दै सांसद् रेनुका गिरीले उजुरी गरेपछि प्रतिनिधिसभाको राज्य व्यवस्था समितिले बिहीबारको बैठकमा तालुकदार मन्त्री पोखरेल र प्रधानसेनापति थापालाई बोलाएको थियो ।

बिहीबारको बैठकमा दुवै जना अनुपस्थित भएपछि सांसदले आक्रोश पोखे । उनीहरूले आफ्नो मन्त्रालय र क्षेत्राधिकारभित्रका विषयमा छलफल राख्दा मन्त्री र सेनापति नै अनुपस्थित हुनुले संसद्प्रति सरकार जवाफदेही नबनेको गुनासो गरे । सांसद कृष्णगोपाल श्रेष्ठले संसद्लाई बेवास्ता गर्ने प्रवृत्तिले संसदीय व्यवस्थालाई कमजोर बनाउने धारणा राखे ।

‘सरकारले संसद्का निर्देशन पालना नगर्ने र छलफलमा अनुपस्थित हुनुले संसद्लाई सरकारले बेवास्ता गरेको स्पष्ट हुन्छ,’ उनले भने, ‘सरकारले संसद् नचलाउने जस्ता व्यवहार देखाउँदा समितिले गरेका निर्णय कार्यान्वयनमा समस्या आएको छ ।’

उपप्रधानमन्त्री एवं रक्षामन्त्री पोखरेल प्रधानमन्त्री केपी शर्मा ओलीलाई भेट्न बिहीबार बिहान अस्पताल पुगेका थिए । उनले मन्त्रालयका तर्फबाट सचिवलाई बैठकमा पठाएका थिए । त्यस्तै, सेनाका तर्फबाट पनि प्रधानसेनापतिले आफू उपस्थित नभई प्रतिनिधि पठाएका थिए । बैठकमा अनुपस्थित भएपछि सांसद झपट रावलले सरकारले संसद्लाई अटेर गरेको बताए । उनले सरकारलाई निर्देशन दिएर कार्यान्वयन गर्ने निकायका रूपमा संसद्को समितिलाई बेवास्ता गर्ने प्रवृत्ति हटाउनु आवश्यक भएको बताए ।

बैठकमा उपस्थित भएका सांसदले मन्त्री र प्रधानसेनापतिको उपस्थितिबिना सेनाभित्रको अनियमितताको विषयमा छलफल गर्न नसकिने भन्दै बैठक स्थगित गर्न माग गरेका थिए । त्यसपछि सभापछि श्रेष्ठले पनि सरकारका तर्फबाट मन्त्रीलाई नै उपस्थित गराउनु मनासिव भएकाले बैठक स्थगित गर्ने निर्णय लिइन् । उनले बैठकमा उपस्थित भएर छलफलमा सहभागी हुने मन्त्री र प्रधानसेनापतिलाई निर्देशन दिइन् । संसदीय समितिको बैठकमा रक्षा सचिव पाण्डे, नेपाली सेनाका पदाधिकारी र समितिका सदस्यहरु थिए ।

यसैगरी, सांसद वृजेशकुमार गुप्ताले पनि संसदीय गतिविधिलाई स्वीकार गर्ने वातावरण निर्माण गर्न आवश्यक भएको बताए ।

The post सेनाभित्रको अनियमितता छलफल : रक्षामन्त्री र सेनापति नै अनुपस्थित appeared first on Rajdhani Daily News.