महराले कसरी बिताए थुनाका १३५ दिन?

0
45

संसद सचिवालयकी कर्मचारीलाई जबर्जस्ती करणी प्रयास गरेको आरोपमा पूर्वसभामुख महराले सोमबार सफाइ पाए। हिरासत र पुर्पक्षका लागि थुनासमेत गरेर उनले एक सय ३५ दिन बन्दी बने।

गत असोज १२ गते संसद सचिवालयकी कर्मचारी रोशनी शाहीले महराले आफूमाथि जबर्जस्ती करणी प्रयास गरेको आरोप लगाएकी थिइन्। असोज १४ मा महराले सभामुख पदबाट राजीनामा दिएका थिए।

उजुरी दर्ता भएपछि असोज १९ मा उनी पक्राउ परे। एक महिना हिरासतमा बसेपछि तत्कालीन जिल्ला न्यायाधीश सुर्दशनराज पाण्डेको इजलासले महरालाई कात्तिक १८ गते पुर्पक्षका लागि थुनामा पठाएको थियो।

तर, अदालतमा बयान दिँदा शाहीले महराले आफूमाथि करणी प्रयास नगरेको दाबी गरेकी थिइन्। उनले सोही विवरणको निवेदन समेत अदालतमा दिएकी थिइन्।

सदरखोरमा महराः पढाइ र भेटघाटमा व्यस्त
कात्तिक १८ को रात उनले डिल्लीबजार सदरखोरमा बिताए। सदरखोरभित्रको ‘क सेल’ मा उनलाई राखिएको थियो।

१० वर्षे माओवादी युद्धको नेतृत्वपंक्तिमा रहेर काम गरेका महरा पहिलो पटक जेल परेका थिए। शैक्षिक आन्दोलनबाट राजनीतिमा उदाएका महरा यसअघि कहिल्यै जेल परेका थिएनन्।

जेलमा महराको बढीजसो समय पढेर, घाम तापेर र भेटघाटमै बित्यो।

mahara90.jpg

सुरुवाती समयमा जेलमा महराले कयौँ पुस्तक पढे। जेल परेकै भोलिपल्ट उनले सदरखोरभित्रको पुस्तकालयबाट ६ वटा पुस्तक लगेका थिए। जसमा फ्रान्सेली शासक नेपोलियन बोनापार्टदेखि नेपाली मिडिया उद्यमी तथा वरिष्ठ पत्रकार पुष्करलाल श्रेष्ठको कलमसम्म थिए। यीबाहेक विश्वप्रसिद्ध व्यक्तित्व, आन्तरिक द्वन्द्वमा मिडिया राजनीति, नेपालमा माओवादी सशस्त्र द्वन्द्व र नेपालको कूटनीतिक अभ्यास नामक किताब पनि लिएका थिए।

उनका वरिपरि अरु पनि ‘भीआईपी कैदी’ थिए। महरानजिकै पूर्वप्रहरी महानिरीक्षक रमेशचन्द ठकुरी र सशस्त्र प्रहरीका डिआईजी रञ्जन कोइराला पनि थिए। ठकुरी सुडान घोटालामा भ्रष्टाचार आरोपमा दोषी ठहरिएका हुन् भने कोइराला आफ्नै श्रीमतीको हत्याका दोषी हुन्।

पछिल्लो समय उनलाई भेट्न कार्यकर्ताहरुको लर्को लाग्ने गरेको थियो। दिनमै ३० जनासम्मले महरालाई भेटेका थिए।

युद्धकालमा दाङको हापुरे र बर्दियाको ठाकुरद्वारामा भएका वार्तामा उनी माओवादी वार्ता टोलीका संयोजक थिए। पटकपटक वार्ता टोलीमा रहेका उनी माओवादीको सार्वजनिक अनुहार थिए। थुप्रै कार्यकर्ताले उनलाई ‘सर’ सम्बोधन गर्थे। युद्ध समाप्तिपछि संसदीय राजनीतिमा आउँदै गर्दा एकदुई पटक विवादित भएपनि महरा भद्र छविका नेता मानिन्थे।

तर, बलात्कार प्रयासको आरोपसँगै उनको त्यो छवि त ध्वस्त भयो नै राष्ट्रिय–अन्तर्राष्ट्रिय सञ्चारमाध्यममा उनी ‘हेडलाइन’ पनि बने।

सफाइ पाएर छुटेसँगै महरा बलात्कार प्रयासको आरोपबाट मुक्त भएका छन्। तर, उनलाई अब राजनीतिक/सार्वजनिक जीवनमा फर्किन सहज हुने छैन।

उनले आफ्नो गुमेको छवि फिर्ता गर्न र राजनीतिमा टेक्ने जमिन खोज्न कस्तो कदम चाल्नेछन्, त्यो भने भविष्यले देखाउनेछ।

यो पनि:

सदरखोरमा महराः बिहान घाम ताप्छन्, दिउँसो पढ्छन् नेपोलियन बोनापार्ट

कर्णाली प्रदेश स्थापना तथा सहिद दिवसः सार्वजनिक बिदा

Previous articleमिडिया काउन्सिल विधेयक सुधार गरिनु सकारात्मक : कमल थापा
Next articleसानुमायाको ६० लाख यसरी चोरियो