लोकतान्त्रिक गणतन्त्र र नेपालको संविधानविरुद्ध दिग्भ्रमित पार्ने प्रयास भएको छ: एमाले

काठमाडौं – प्रमुख प्रतिपक्षी दल नेकपा एमालले नेपाली समाजलाई विभिन्न ढङ्गले विभाजित गर्ने र लोकतान्त्रिक गणतन्त्र र नेपालको स‌ंविधान विरुद्ध समाजलाई दिग्भ्रमित पार्ने प्रयासहरु भइरहेको बताएको छ ।

बुधबार बसेको केन्द्रीय कमिटीको बैठकले समसामयिक प्रस्ताव पारित गर्दै संघीय लोकतान्त्रिक गणतन्त्रात्मक प्रणालीलाई कमजोर बनाउने गतिविधिहरु भइरहेको निश्कर्ष निकालेको हो ।

बैठकले समाजमा अराजकता बढ्दै गएको र समाजलाई विभिन्न ढङ्गले विभाजित गर्ने र राष्ट्रलाई कमजोर बनाउने श्रृंखलाबद्ध प्रयासहरू भइरहेको भन्दै त्यस्ता गतिविधितर्फ गंभिर बन्न सरकारको ध्यनाकर्षण गराएको छ ।

”जनताले बलिदान गरेर ल्याएको लोकतान्त्रिक गणतन्त्र र नेपालको संविधानका विरूद्ध समाजलाई दिग्भ्रमित पार्ने, राजनीतिक लेपनको आडमा विभिन्न राजनीतिक अपराधहरूबाट उन्मुक्ति खोज्ने, राजनीतिक नेतृत्वका विरूद्ध निराधार लाञ्छना, गालीगलौज र चरित्रहत्या गर्ने, समाजलाई प्रदुषित पार्ने, जातीय र धार्मिक सहिष्णुतामा खलल पुर्‍याउने जस्ता अराजक गतिविधिहरू बढिरहेका छन् । यसबीचमा कतिपय ठाउँमा धार्मिक दङ्गाहरू समेत गराइएका छन् । एमालेले लोकतान्त्रिक गणतन्त्रका विरूद्ध भइरहेका अराजक क्रियाकलापहरूको निन्दा गर्दै लोकतान्त्रिक गणतन्त्रको रक्षाका लागि दृढ सङ्कल्प रहेको छ । बैठकबाट पारित समसामयिक प्रस्तावमा भनिएको छ ।