राजनीतिक नेतृत्व भ्रष्टाचारमा डुब्दै जाने हो भने त्यसले शासकीय प्रणालीलाई नै पंगु र असफल पारिदिने निश्चित छ । तत्कालीन सूचना तथा सञ्चार प्रविधिमन्त्री गोकुल बाँस्कोटाको कमिसन काण्ड र उनको बर्हिगमनसँगै मुलुक कुशासनको चपेटामा पर्दै गइरहेको प्रस्ट देखिन थालेको छ । प्रधानमन्त्री केपी शर्मा ओलीको सबैभन्दा विश्वास पात्र मन्त्रीका रूपमा रहेका बाँस्कोटा नै त्यसरी कमिसनखोरसँगको बार्गेनिङमा लिप्त भएको अडियो सार्वजनिक हुनुले प्रधानमन्त्रीको भ्रष्टाचारमा शून्य सहनशीलताको नीतिलाई नै फितलो बनाइदिएको छ ।
यदि, प्रधानमन्त्रीले यसलाई सानोतिनो घटनाका रूपमा लिए भने त्यो उनको लागि ठूलो आत्मघाती काम हुनेछ । यस्ता भ्रष्टाचारका काण्डलाई गहन रूपमा लिएर छानबिन नगर्ने हो र फेरिफेरि पनि यस्ता घटना घट्न दिइरहने हो भने प्रधानमन्त्री ओली असफल त हुन्छन् नै, त्यसका साथसाथै बामे सर्दै गइरहेको संघीय लोकतान्त्रिक गणतन्त्र पनि पक्षघातको सिकार हुन पुग्छ । पक्षघातले ग्रसित भएको शासकीय व्यवस्थाले जनतामा प्रभावकारी सेवा वितरण गर्न सक्दैन जसका कारण जनतामा शासन व्यवस्थाप्रति नै अलगाव र घृणा पैदा हुन सक्छ ।
यो शासन प्रणालीको संस्थागत विकास गर्ने महŒवपूर्ण भूमिकामा रहेको ओली सरकार व्यवहारमा नै भ्रष्टाचार र भ्रष्टाचारीप्रति कठोर र निर्मम हुन सक्नुपर्छ । तर, प्रधानमन्त्रीले जसरी बोलीमा भ्रष्टाचारीको मुख पनि हेर्दिनँ भनेर भाषण गरिरहेका छन् तर उनको व्यवहारमा त्यस्तो देखिन सकेको छैन । प्रधानमन्त्रीले आफ्नो टिममा रहेका मन्त्रीलाई नियन्त्रणमा राख्न सकेको देखिएन् । यदि, प्रधानमन्त्री साँच्चै नै भ्रष्टाचारीप्रति निर्मम बन्न सकेको भए सञ्चारमन्त्री बाँस्कोटा त्यसरी करोडांै रुपैयाँ बार्गेनिङ गर्न सक्ने अवस्थामा हुँदैनथे । जबजब ओलीका मन्त्री भ्रष्टाचारमा लिप्त हुँदै जान्छन्, तबतब उनको भ्रष्टाचारविरुद्धको शून्य सहनशीलताको नाराले उनी स्वयंलाई गिज्याइरहनेछ ।
जब, प्रधानमन्त्री ओली २०७४ साल ३ फागुनमा दोस्रोपटक प्रधानमन्त्रीको रूपमा आए । त्यतिबेलादेखि नै उनले आफ्नो टिममा ल्याउने व्यक्ति नैतिकवान् सदाचारी र रातोदिन देश र जनताको हितमा काम गर्ने व्यक्ति ल्याउनुपर्छ भन्ने आमजनता र उनका शुभेच्छुकको चाहना थियो । तर, दुईतिहाइको समर्थन पाएका ओलीले त्यस्ता व्यक्तिलाई मन्त्री बनाउन सकेनन् । मन्त्री पद राजनीति र व्यक्ति विशेषको कोटाका आधारमा चयन गरियो । त्यसरी आएका अधिकांश मन्त्रीहरू मुलुकको समृद्धि र सुशासनका लागि भन्दा पनि आफ्नै स्वार्थसिद्ध गर्ने कार्यमा लागे । अहिले पनि प्रधानमन्त्रीका सारथीका रूपमा रहेका अधिकांश मन्त्री कम्मल ओढेर घिउ खाने प्रवृत्तिकै छन् भन्ने आमगुनासो आइरहेको छ । प्रधानमन्त्री ओली अब त्यस्ता मन्त्रीप्रति कठोर र निर्मम बन्नैपर्छ ।
मन्त्री भ्रष्ट भए भने उनी मातहत रहेका सचिव, सहसचिव, महानिर्देशक तथा अन्य कार्यालय प्रमुख स्वतः भ्रष्ट हुन्छन् । त्यसैले अहिले अधिकांश मन्त्रीको प्रवृत्ति हेर्दा मुलुकमा भ्रष्टाचारले संस्थागत रूप लिँदै गइरहेको सहजै अनुमान गर्न सकिन्छ । प्रधानमन्त्रीले अब सबै मन्त्री तथा प्रशासनिक नेतृत्वलाई उच्च निगरानीमा राखेर उनीहरूको अनुगमन गर्नेगरी विभिन्न संयन्त्र बनाउनुपर्छ । ठूलाठूला खरिद प्रक्रिया र ठेक्का हुने प्रोजेक्टमाथि प्रधानमन्त्री कार्यालयको नियमित निगरानी बढाउनुपर्छ । प्रधानमन्त्रीले आफ्नो अभियानलाई मूर्तरूप दिने हो भने भ्रष्टाचारमा निर्लिप्त भएका मन्त्रीलाई वर्खास्त गर्न सक्ने तथा प्रशासनिक नेतृत्वलाई कडा कारबाही गर्न सक्ने परिपाटीको विकास गर्नुपर्छ ।
The post भ्रष्टाचारीमाथि निर्मम र कठोर कदम चाल appeared first on Rajdhani Daily News.
