भद्रपुर, १५ फागुन । नेपाल कम्युनिष्ट पार्टी (नेकपा) झापाले २१ फागुनमा बिर्तामोडमा सुखानी शहीद ४७औँ स्मृति तथा श्रद्धाञ्जलिसभा आयोजना गर्ने भएको छ ।
भद्रपुरबाट कारागार सार्ने बहानामा झापा र इलामको सिमाना सुखानीको जङ्गलमा २१ फागुन २०२९ सालमा तत्कालीन राजनीतिक बन्दीहरु रामनाथ दाहाल, नेत्र घिमिरे, नारायण श्रेष्ठ, कृष्ण कुइँकेल र विरेन राजवंशीको हत्या गरिएको थियो ।
सो दिनको स्मरणमा हरेक वर्ष स्मृति दिवस मनाउने गरिएको छ । नेकपा झापाले आयोजना गरेको उक्त स्मृतिसभामा पार्टी अध्यक्ष तथा प्रधानमन्त्री केपी शर्मा ओली र अध्यक्ष पुष्पकमल दाहाल ‘प्रचण्ड’ सहित पार्टीका वरिष्ठ नेता झलनाथ खनालले सम्बोधन गर्ने कार्यक्रम तय भएको अध्यक्ष चिन्तन पाठकले बताए ।
प्रधानमन्त्री ओली, अध्यक्ष दाहाल, पार्टी महासचिव विष्णु पौडेल र गृहमन्त्री रामबहादुर थापालगायत नेताहरुले सुखानी शहीद स्मृति पार्क सालबारीमा शहीदको शालिकमा माल्र्यापण गर्ने कार्यक्रम छ ।
नेकपा १ नम्बर प्रदेश कमिटीको बैठक १९ फागुनमा बिर्तामोडस्थित जिल्ला पार्टी कार्यालयमा र प्रदेशस्तरीय प्रशिक्षण कार्यक्रम २० गते बिर्तामोडको सिटी सेन्टरमा आयोजना गरिएको नेकपा झापाका सचिव एवं प्रचार तथा प्रकाशन विभाग प्रमुख मणिकुमार साम्पाङले बताए ।
प्रदेश कमिटीको बैठकमा १ नम्बर प्रदेश अन्तर्गतका नेकपा केन्द्रीय सदस्यहरुको पनि सहभागिता रहनेछ । २० गतेको प्रशिक्षणमा १४ वटा जिल्ला कमिटी र विराटनगर महानगर कमिटीका सचिवालय सदस्यहरु सहभागी हुने प्रदेशस्तरीय प्रशिक्षण कार्यक्रम आयोजना गरिएको छ ।
The post सुखानी शहीदको स्मृतिमा श्रद्धाञ्जलिसभा हुँदै appeared first on Koshi Online.
स्कूल पढ्दै गरेकी १४ वर्षिया किशोरीले शिशु जन्माईन्, गुपचुप घटना दबाउने प्रयास