चीनमा कोरोना भाइरसको संक्रमण देखिएयता साढे १५ हजार चिनियाँ नेपाल आएका छन्।
अध्यागमन विभागका अनुसार जनवरी महिनामा मात्र १२ हजार १ सय ६९ र फेब्रुअरीमा ३ हजार २ सय ८५ चिनियाँ नागरिक नेपाल आएका हुन्।
सन् २०१९ को डिसेम्बर अन्तिम साता चीनमा कोरोनाको संक्रमण देखिएको थियो। चीनमा कोरोना संक्रमण बढ्दै जाँदा कतिपय देशले चीन आवातजावत बन्द गरेपनि नेपालले भने त्यस्तो केहि निर्णय नगर्दा चिनियाँ नागरिक नेपाल प्रवेश गरिरहेका हुन्।
सोमबार अपरान्हसम्म पनि चीन आवातजावतबारे सरकारको कुनै निर्णय नआएको अध्यागमन विभागका महानिर्देशक ईश्वरराज पौडेलले जानकारी दिए।
सरकारले सोमबार एक सूचना जारी गरी फागुन २७ देखि लागु हुनेगरी चीन (उसका विशेष प्रशासन क्षेत्रहरु समेत), इरान, इटाली, दक्षिण कोरिया, र जापान लगायतका मुलुकबाट आउने यात्रुलाई तत्कालका लागि अराइभल भिसा रोकेको छ।
चीन आवात–जावत गर्नेको संख्यामा भने गतवर्षको तुलनामा झण्डै ५ गुणाले कमी आएको छ। २०१९ को फेब्रुअरिमा १४ हजार १ सय ६१ जना नेपाल आएका थिए।
तर यो वर्षको फेब्रुअरिमा ३ हजार २ सय ८५ जना चीनियाँ मात्रै नेपाल आएका छन्। यो संख्या प्रत्येक दिन कम हुँदैगएको अध्यागमन विभागका महानिर्देशक पौडेलले जानकारी दिए।
चीनमा कोरोना संक्रमण फैलिएपछि नेपाल प्रवेशमा कुनै रोकतोक नभए पनि चीनबाट अन्यत्र उड्ने हवाइयात्रुमा कुनै लक्षण देखिए उनीहरुलाई त्यहिँको विमानस्थलमै रोक्ने गरिएको छ।
पछिल्लो समय नेपालबाट चीन जानेको संख्यामा पनि कमी आएको छ। गतवर्ष फेब्रुअरिमा १५ हजार ५ सय ८८ जना चीन गएका थिए भने, यही अवधिमा यो वर्ष चीन जानेको संख्या ३ हजार ५ सय ६१ मात्रै छ।
गत डिसेम्बरमा चीनमा कोरोना भाइरसको संक्रमण देखिएपछि त्यहाँ आवाजावत गर्नेको संख्या प्रभावित भएको होे। जनवरीमा समेत गत वर्षको तुलनामा कम आवाजावत भएको थियो।
गतवर्ष जनवरीमा ११ हजार ४ सय ३० जना चिनिया नागरिक नेपाल आएका थिए। त्यही महिना नेपालबाट चीन जानेको संख्या ११ हजार ७ सय ७१ थियो।
नेपाल सरकारले सन् २०२० लाई भ्रमण वर्ष घोषणा गरेसँगै जनवरीमा नेपाल आउने चिनियाँ पर्यटकको संख्या बढेको थियो। तर कोरोना फैलनेक्रम बढ्दै गएपछि धेरै चिनियाँ आफ्नै देश फर्किएका छन्।
जनवरीमा १२ हजार १ सय ६९ चिनियाँ नेपाल आएका थिए। तर आउनेको तुलनामा जनवरीमा फर्किनेको संख्या बढेको थियो। सोहि महिनामा नेपालबाट १७ हजार १ सय ५१ जना चिनियाँ स्वदेश फर्किएका छन्।
त्यसअघि सन् २०१९ को नोभेम्बरमा १५ हजार ३ सय ११ जना नेपाल आएकोमा १४ हजार ४ सय ४७ जना चीन फर्किएका थिए।
गएको महिना १ सय ८२ देशबाट ७७ हजार ६४ जना नेपाल आउँदा नेपालबाट बाहिरिने विदेशीको संख्या ६६ हजार २ सय ७४ छ।
फेब्रुअरीमा एक लाख ९ हजार ८ सय ७५ जना नेपाली स्वदेश फर्किएका छन्। यस्तै यी देशमा जाने नेपालीको संख्या १ लाख ११ हजार २ सय ८७ छ।
जनवरीको तुलनामा आवात–जावत गर्ने नेपालीको संख्या कमी हो। जनवरीमा १ लाख १२ हजार ५ सय १४ जना नेपाल फर्किएका छन् भने, १ लाख १६ हजार ६ सय ४२ जना विदेशिएका छन्।
चीनबाट कोरोना भाइरसको संक्रमण फैलिन थालेपछि नेपालले समेत त्यहाँ रहेका नागरिक फर्काएको छ। १७५ जनालाई चीनको संक्रमित क्षेत्रबाट ल्याइएको छ।
विश्व स्वास्थ्य संगठनले समेत नेपाललाई कोरोनाको उच्च जोखिम रहेको मुलुकको सूचिमा राखेपछि अन्य देशबाट नेपाल आउने पर्यटकको संख्यामा समेत कमी आएको छ।
हालसम्म ६५भन्दा बढी देशमा कोराना फैलिसकेको छ भने सोहि भाइरसका कारण ३ हजार ४८ जनाको मृत्यु भइसकेको छ।
गणतन्त्रलाई सबल बनाउन भूमिका खेल्ने शीर्ष नेताको प्रतिबद्धता
