पुलिस च्याम्पियन

नेपालगन्ज । विभागीय नेपाल पुलिस क्लब दोस्रोपटक प्रधानमन्त्री कप अन्तर्राष्ट्रिय आमन्त्रण महिला भलिबल प्रतियोगिताको च्याम्पियन बनेको छ । बुधबार विभागीय डर्बी भिडन्तमा घरेलु भलिबलमा एकछत्र राज गरिरहेको साविक विजेता नेपाल एपीएफ क्लबलाई ३–० को सोझो सेटमा स्तब्ध पार्दै पुलिस पधानमन्त्री कपमा दोस्रोपटक च्याम्पियन बन्न सफल भएको हो । यसअघि पुलिस पहिलो संस्करणको च्याम्पियन बनेको थियो ।

यस्तै पुलिसले एपीएफसँगको लगातारको हारको शृंखलालाई तोडेको छ । पछिल्लो एक महिनामा यी दुई टोलीले तीनपटक प्रतिस्पर्धा गर्दा सबैमा एपीएफ विजयी भएको थियो । काठमाडौंमा माघमा सम्पन्न ढोरपाटन महिला डबल लिगको दुवै खेलमा एपीएफ विजयी भएको थियो । यस्तै पर्वतमा यसै साता सम्पन्न दिदी बहिनी कपको फाइनलमा पनि एपीएफ नै विजयी भएको थियो । पुलिसले एपीएफकी मुख्य स्पाइकर सरस्वती चौधरी नहुँदाको फाइदा उठाउन सफल भयो । सरस्वती इन्ज्युरीका कारण टोलीमा छैनन् ।

पुलिसको यो सिजनको दोस्रो उपाधि हो । यसअघि पुलिसले भदौमा पोखरा लामाचौरमा सम्पन्न भएको राष्ट्रिय महिला भलिबलका उपाधि जितेको थियो । पुलिससँग पराजित भएसँगै एपीइएफ उपाधि रक्षा तथा सिजनको आठौं उपाधि जित्नबाट वञ्चित रह्यो । यस्तै एपीएफ एक वर्षपछि उपाधि जित्न असमर्थ बन्यो । गतवर्ष एपीएफ आदिअवादी महिला भलिबल लिगमा उपाधिबाट वञ्चित बनेको थियो । त्यतिबेला एपीएफ अमेरिकी खेलाडी सम्मिलित चितवन टाइग्रेससँग पराजित
भएको थियो ।

नेपालगन्जस्थित कभर्ड हलमा बुधबार एपीएफ र पुलिसबीचको खेल प्रतिस्पर्धात्मक हुने अनुमान गरिए पनि पुलिसले एकपक्षीय खेल पस्कँदै एपीएफलाई हार चखायो । पहिलो सेटमा सुरुवातदेखि नै एपीएफविरुद्ध अग्रता लिएको पुलिस २५–१६ ले विजयी हुन सफल भयो । १९–१६ को अवस्थामा पुलिसले लगातार ७ अंक जोड्दै पहिलो सेट आफ्नो पक्षमा पार्न सफल भएको थियो । दोस्रो सेटमा सुरुवातमा पछि परे पनि पुलिसले उत्कृष्ट प्रदर्शन गर्दै खेललाई २५–१७ ले आफ्नो पक्षमा पा¥यो । बराबरीकै अवस्थामा १८–१६ को अवस्थाबाट लगातार ६ अंक जोड्दै पुलिसले दोस्रो सेट आफ्नो पक्षमा पारेको थियो ।

प्रतिस्पर्धात्मक तेस्रो सेटमा पनि पुलिसले पछि परेको अवस्था उल्ट्याउँदै २५–१८ को जित निकाल्दै एपीएफलाई स्तब्ध पा¥यो । १०–१४ ले पछि परेको पुलिसले उत्कृष्ट कम ब्याक गर्दै लगातार १४ अंक जोड्दै खेललाई २४–१४ को अवस्थामा ल्याएको थियो । त्यसपछि एपीएफले थप ४ अंक जोड्दै खेलमा फर्कने प्रयास गरे पनि हार टार्न सकेन ।

उपाधिसँगै पुलिसले २ लाख रुपैयाँ हात पा¥यो । दोस्रो भएको एपीएफलले १ लाख रुपैयाँमा चित्त बुझायो । बुधबारै त्रिभुवन आर्मी क्लबले होङ्ग्वान्जी न्यु डायमन्ड स्पोर्ट्स क्लबलाई ३–० को सोझो सेटमा पराजित गर्दै तेस्रो स्थान हात पारेको थियो । आर्मीले ५० हजार रुपैयाँ पायो ।

नेपाल पुलिस क्लबकी उषा भण्डारी छैटौं संस्करणको प्रधानमन्त्री कप अन्तर्राष्ट्रिय आमन्त्रण महिला भलिबल प्रतियोगिताको सर्वाेत्कृष्ट खेलाडी घोषित भइन् । सर्वाेत्कृष्ट खेलाडी घोषित भएसँगै उषाले १० हजार रुपैयाँ र ट्रफी हात पारिन् ।

व्यक्तिगत विधातर्फ एपीएफकी निरुता ठगुन्ना उत्कृष्ट स्पाइकर चुनिइन् । पुलिसकी मनीषा चौधरी सर्भर र पुलिसकी कमला पुन उत्कृष्ट सेटर चुनिइन् । आर्मीकी संगम महतो उत्कृष्ट ब्लकर घोषित भइन् । होङवान्जी न्यु डायमन्डकी सलिना श्रेष्ठ उत्कृष्ट लिवेरो चुनिदा पुलिसका रुपेश विष्ट उत्कृष्ट प्रशिक्षक चुनिए । उनीहरूले समान ५–५ हजार रुपैयाँ हात पारे । विजयी खेलाडीलाई राखेपका सदस्य सचिव रमेशकुमार सिलवाल, प्रदेशसभा सदस्य कृष्णा केसी (नमुना), नेपालगन्जका मेयर डाक्टर धवल शमशेर राणालगायतले पुरस्कृत गरे ।

The post पुलिस च्याम्पियन appeared first on Rajdhani Daily News.