कोरोना भाइरस (कोभिड-१९०) बाट संक्रमित हुनेको संख्या लाख नाघेको छ। चीनमा साढे ५५ हजार संक्रमित भने उपचारपछि स्वस्थ भएका छन्।
अन्तर्राष्ट्रिय सञ्चारमाध्यमका अनुसार शनिबार बिहानसम्म उक्त भाइरसबाट संक्रमित हुनेको संख्या १ लाख २ हजार २ सय २४ पुगेको हो।
चीन (उहान सहर)बाट सुरु भएको यो संक्रमण अहिले संसारका ९७ देशमा फैलिसकेको छ।
यसैगरी कोरोना भाइरसको संक्रमणबाट मृत्यु हुनेको संख्या संख्या ३ हजार ४ सय ९५ पुगेको छ।
तीमध्ये चीनका मात्रै ३ हजार ७० जना रहेको त्यहाँको राष्ट्रिय स्वास्थ्य आयोगले जानकारी दिएको छ।
उसका अनुसार शनिबार बिहानसम्म चीनमा कोरोना संक्रमितको संख्या ८० हजार ६ सय ५१ पुगेको छ।
तीमध्ये ५५ हजार ४ सय ४ जना बिरामी उपचारपछि स्वस्थ भएका छन्। यस्तै ५ हजार ४ सय ८९ बिरामी भने गम्भीर अवस्थामा छन्।
चीनमा पछिल्लो समय कोभिड-१९ को संक्रमण घटिरहेको छ । स्वास्थ्य आयोगले दिएको जानकारीअनुसार शुक्रबार चीनमा थप ९९ जनामा संक्रमण देखिएको छ । त्यस्तै शुक्रबार २८ जनाको मृत्यु भएको छ ।
चीनमा संक्रमणको दर घट्दै गए पनि इटाली, इरान र दक्षिण कोरियामा भने तीव्र रुपमा बढिरहेको छ ।चीनबाहिर सबैभन्दा बढी इटालीमा १९७ जनाको मृत्यु भएको छ।
शनिबार बिहानसम्म इटालीमा ४ हजार ६ सय ३६ जनामा संक्रमण देखिएको छ।
त्यस्तै इरानमा १२४ जनाको मृत्यु र ४ हजार ७ सय ४७ मा संक्रमण देखिएको छ ।
चीनपछि सबैभन्दा बढी व्यक्तिमा संक्रमणचाहिँ दक्षिण कोरियामा देखिएको छ।
शनिबार बिहानसम्म दक्षिण कोरियामा ६ हजार ७ सय ६७ जनामा संक्रमण देखिएको छ भने ४४ जनाको मृत्यु भएको छ ।
अमेरिकामा पनि कोभिड-१९ को संक्रमणबाट मृत्यु हुनेको संख्या १५ पुगेको छ।
त्यसमध्ये १४ जनाको मृत्यु वासिङ्टन र एक जनाको क्यालिफोर्निया राज्यमा भएको हो। अमेरिकामा संक्रमितको संख्या ३ सय २१ पुगेको छ।
त्यस्तै जापानमा १२ जनाको मृत्यु र एक हजार एक सय १६ जनामा संक्रमण देखिएको छ ।
कोभिड–१९ को संक्रमणबाट स्पेनमा ८, इराकमा ४, हङकङ र बेलायतमा २/२ तथा थाइल्यान्ड, ताइवान, नेदरल्यान्ड्स, सान मारिनो, फिलिपिन्स र स्विजरल्यान्डमा एक/एक जनाको मृत्यु भएको छ ।
