विध्वंशमा संलग्नहरुलाई पक्राउ गरेकोमा सुमनाको असन्तुष्टि, प्रहरीले बदला लिन खोजेको आरोप

काठमाडौं । जेनजी आन्दोलनमा आगजनी गर्न उक्साउनेदेखि सुशीला कार्की नेतृत्वको अन्तरिम गठनमा निर्णायक भूमिका खेलेकी रास्वपाकी तत्कालीन सांसद सुमना श्रेष्ठले सरकारको नियतमाथि नै प्रश्न उठाउँदै लामो वक्तव्य दिएकी छन् ।

हाल रास्वपा त्यागेर उज्यालो नेपाल पार्टीको हिमचिममा रहेकी पूर्व मन्त्री श्रेष्ठले प्रहरीले जेनजी आन्दोलनमा संलग्नहरुमाथि बदलाको भावनाले कारवाही अघि बढाएको आरोप समेत लगाएकी छन् ।

प्रहरीले भदौ २४ गते सार्वजनिक तथा निजी सम्पत्ति तोडफोड,लुटपाट तथा आगजनीमा संलग्न र हतियार लुट्नेहरुको खोजी गरेर मुद्दा चलाइरहेकोमा सुमनाले आपत्ति जनाएकी हुन् । प्रधानमन्त्री कार्कीको सपथग्रहण समारोहमा जेनजी आन्दोलनको स्टेकहोल्डरका रुपमा सहभागी सुमना पछिल्लो समय सरकारसँग असन्तुष्ट बनेको उनको वक्तव्यले संकेत गर्छ ।

वक्तव्यमा उनले भनेकी छन्– हामीमध्ये कतिलाई लाग्ला भाद्र २३को बर्बर दमनको कारणले सरकार ढलेको हो तर भ्रम नहरोस्, भाद्र २४को विध्वंश पछि हेलिकप्टरमा भाग्न परेपछि मात्र ओली महाशयले पद छोडेका हुन् । आफ्नै ज्यानमाथि खतरा नहुदो हो त अस्तिको राजावादी आन्दोलन र अलि अघिको मधेश आन्दोलनमा जस्तै पेलेरै लाने नियत स्पष्ट थियो । भाद्र २४मा जनताको आक्रोश मात्र थियो त? पक्कै अन्य स्वार्थ समूहको घुसपैठ पनि थियो, यस्ता तत्वहरू सधै कुनै मौकाको खोजीमा हुन्छन् । राज्यले त्यस्तो मौका दिनु नै हुन्थेन, स्वार्थ समूहलाई बलिलो बन्न नै दिनु हुन्थेन, आमजनताको हितको काम गरेको भए त्यस्ता समूहहरू बलिया हुदा पनि हुदैनथिए ।

हो, राज्यका निकायमाथि वर्दी लगाएकाहरूमाथि पनि हमला भएको हो । तर त्यसको पृष्ठभूमि पनि बुझौ न । दशकौदेखिको कुशासन, भर्खरै कलिला युवकहरूको टाउको र छातिमा ताकेर गोली प्रहार भएको देखेको अनि त्यसमाथि नेताहरूको असामयिक भड्काउ अभिव्यक्ति । घटनाको नैतिक जिम्मेवारी लिन पर्नेहरूलाई केही नगरी, शक्तिहिन नागरिकलाई अहिल्यै खोजी खोजी बदला ल्न्छिु भन्न सुहाउछ?

सुमनाले नागरिकको पीडा बुझेर समभाव राख्नुको साटो राज्यका निकायले आफूमाथि भएको हिंसाको बदला लिन खोजेको आरोप लगाएकी छन् । उनले जेनजी आन्दोलनका क्रममा प्रहरी मारिनु,हतियार लुटिनु र चौकीहरु जलाइनुलाई आक्रोशको अभिव्यक्ति भनेर सामान्यीकरण गरेकी छन् ।