चितवन — गाईको निधारको सेतो भागमा उसैको तस्बिरलाई गोलाकार बनाएर टाँसेको ब्याच थियो । शरीरमा सेतो र कालो रंग मिसिएको होलिस्टिन जातको यो गाईमा डेरी प्रदर्शनीमा आउने सबैको नजर पर्थ्यो । जुन गाई रत्ननगर नगरपालिका–१५ का अर्जुन ढकालको कामना कृषि तथा पशुपन्क्षी फार्मको हो ।
अर्जुनले गाईलाई चिटिक्क पारेर बुधबार भरतपुरमा आयोजित गाई प्रदर्शनीमा ल्याएका थिए ।
भरतपुरमा जारी अन्तराष्ट्रिय डेरी प्रदर्शनीको अवसर पारेर प्रतियोगितात्मक गाई प्रदर्शनी भएको थियो । जसमा अर्जुनजस्तैं १७ किसान आ–आफ्ना गोठका राम्रा गाई लिएर आएका थिए । सबैलाई उछिन्दै अर्जुनले ल्याएको गाई विजेता बन्यो । गाईधनी अर्नुनले २० हजार रुपैयाँ नगद पुरस्कार समेत पाए । दोस्रो शिवप्रसाद पौडेलको गाई भयो । तेस्रो पुरस्कार चेतप्रसाद ढकालको गाईले पायो । दोस्रो र तेस्रो हुने गाईधनीले क्रमशः १५ हजार र १० हजार नगद पाए ।
भारतीय नश्लका दुईवटा गीर गाईसहित प्रदर्शनीमा होलिस्टिन र जर्सी गाई सामेल थिए । निर्णायकमा थिए कृषि तथा वन विज्ञान विश्वविद्यालयका सह–प्रध्यापक गोकर्ण गौतम, राष्ट्रिय गाई अनुशन्धान कार्यक्रमका वैज्ञानिक डा. उद्दव पनेरु र राष्ट्रिय किसान आयोगका वरिष्ठ पशु विकास अधिकृत डा. खगेन्द्र सापकोटा । अमेरिकाबाट आएका ड्यानियल ल्यानी पनि निर्णायक मण्डलमा थिए । ‘हामीले गाईको शारीरिक स्वास्थता, दुध दिने क्षमता, शारीरिक सुन्दरता जस्ता विशेषता हेरेर नम्बर दिएका थियौं । सय पुर्णाङ्कलाई आधार मानेर चारजनाले दिएको कुल नम्बर जोडेर विजेता घोषणा गरेका छौं’ निर्णायकमध्येका डा. गौतमले भने ।
गाईको कल्चौंडो र थुनको अवस्थामा सबैभन्दा धेरै ४० नम्बर थियो । अर्जुन ढकालको गाईले कुल ३६२ दशमलब ०५ नम्बर ल्याएर विजेता बन्यो । ३७ वर्षका अर्जुन ढकाल कृषि तथा पशुस्वास्थ्य प्राविधिक हुन् । ‘आफ्नो अनुभवको विषय भएका कारण मैले ६ वटा गाई पालेको छुँ । सबै गाईको राम्रो स्याहार भएको छ । यो गाई अझैं विशेष लाग्छ,’ अर्जुनले भने । उनले गाई पाल्न थालेको पाँच वर्ष भयो ।
विजेता बनेको होलिस्टिन जातको उनको गाई तेस्रोपटक ब्याएको छ । दिनमा ३१ लिटर दुध दिने यो गाई एक लाख ८० हजार रुपैयाँमा किनेको बताए ।
चितवन जिल्ला दुग्ध उत्पादक कृषि सहकारी संस्था लिमिटेड र चितवन उद्योग संघले संयुक्त रुपमा प्रदर्शनी आयोजना गरेका हुन् । माघ २५ मा सुरु भएको प्रदर्शनी बिहीबार सकिँदैछ । ‘राम्रा गाईहरूको प्रदर्शनी गराउँदा अरुलाई पनि प्रेरणा पुगोस् भनेर प्रतियोगितात्मक प्रदर्शनी आयोजना गरेका हौं,’ सहकारी संस्थाका अध्यक्ष किशोर बगालेले भने ।
