सिनेटबाट ट्रम्पलाई महाअभियोगमा सफाइ, राष्ट्रपति पदबाट हट्नु नपर्ने

0
37

वासिंगटन । अमेरिकी राष्ट्रपति डोनाल्ड ट्रम्पले महाअभियोगमा सफाइ पाएका छन् । उनकै रिपब्लिनक पार्टीको बहुमत रहेको सिनेटले उनलाई सफाइ दिएको हो ।
सिनेटमा भएको मतदानको परिणाम उनको पक्षमा आएपछि राष्ट्रपति पदबाट हट्नु नपर्ने भएको छ ।
ट्रम्पमाथि शक्तिको दुरूपयोग गरेको र कंग्रेसका कामकारबाहीमा बाधा पु¥याएको आरोप लागेको थियो । शक्तिको दुरुपयोग गरेको अभियोगमाथि भएको मतदानमा ट्रम्पको पक्षमा ५२ र विपक्षमा ४८ मत परेको थियो भने अमेरिकी संसद् कंग्रेसलाई अवरुद्ध तुल्याएको अभियोगमा उनको पक्षमा ५३ मत र विपक्षमा ४७ मत परेको थियो ।
विपक्षी डेमोक्रेटहरूले डिसेम्बरमा आफ्ना सम्भावित राष्ट्रपति पदका उम्मेद्वार जोए बाइडेनलाई बदनाम गर्ने उद्देश्यले युक्रेनलाई दबाब दिएको भन्दै ट्रम्पमाथि महाअभियोग लगाएका थिए । सफाइ पाएपछि उनी आगामी ३ नोभेम्बरमा महाभियोग सामना गरेर चुनावमा जाने पहिलो राष्ट्रपति बन्नेछन् । बुधवारको ऐतिहासिक मतदानमा सिनेटले युक्रेनसँगको ट्रम्पको लेनदेन र संवादका बिषयसँग जोडिएका अभियोगबाट छुटकारा दिएको हो ।
डेमोक्रेटहरूको बहुमत रहेको तल्लो सदन हाउस अफ रिप्रेजेन्टेटिभ्सले गत १८ डिसेम्बरमा महाभियोग पारित गरेको थियो । ट्रम्पले भने आफूमाथिको अभियोग अस्वीकार गर्दै आएका छन् ।
‘राष्ट्रपति ट्रम्प पूर्ण रूपबाट दोषमुक्त भएका छन् र यो अब अमेरिकी नागरिकको काममा फर्कने समय हो,’ ट्रम्पको चुनावी अभियानले भनेको छ, ‘केही नगर्ने डेमोक्रेटहरूलाई थाहा छ कि उनीहरूले ट्रम्पलाई उछिन्न सक्दैनन् त्यसैले उनीहरूले महाभियोग लगाएका थिए ।’ ट्रम्पमाथिको महाअभियोग पारित हुन सिनेटमा दुई तिहाई मत आवश्यक थियो ।
संसद्को तल्लो सदनकी डेमोक्रेटिक सभामुख न्यान्सी पेलोसीले ट्रम्प अझै अमेरिकी प्रजातन्त्रको लागि खतरा रहेको भन्दै सिनेटका रिपब्लिकनहरूले कानुनहीनतालाई सामान्यीकरण गरेको प्रतिक्रिया दिएकी छन् ।
सन् २०१२ मा रिपब्लिकन पार्टीबाट राष्ट्रपति पदका उम्मेद्वार भइसकेका मिट रोमनीले मात्रै ट्रम्पमाथि लागेको शक्तिको दुरूपयोग अभियोगमा उनीविरूद्ध मत हालेका थिए ।
डेमोक्रेटहरूले आशा गरे बमोजिम दुईजना मध्यमार्गी रिपब्लिकनहरू सुसन कोलिन्स र लीसा मोर्वास्कीले ट्रम्पविरूद्ध मतदान गर्ने विश्वास गरिएपनि मत हालेनन् ।
कतिपय रिपब्लिकन सांसदहरूले ट्रम्पको व्यवहारको आलोचना गर्ने गरेका छन् । तर उनीहरुले त्यो महाभियोग नै लगाउने तहको नभएको बताउँदै आएका छन् । रिपब्लिकनहरूले आफ्नो पक्षमा उभिने अपेक्षा गरेका तीन डेमोक्रेटिक सांसदहरूले भने ट्रम्पविरूद्ध नै मतदान गरे ।
सिनेटमा डेमोक्रेटतर्फका नेता चक सुमरले रिपब्लिकनहरूले सुनुवाइका क्रममा साक्षी झिकाउन अस्वीकार गरेकोले सिनेटले दिएको सफाइलाई ‘मूल्यविहीन’ भएको टिप्पणी गरेका छन् ।
अमेरिकामा हालसम्म तीन जना राष्ट्रपतिले महाभियोगको सामना गरेका छन् । ट्रम्पभन्दाअघि सन् १८६८ मा राष्ट्रपति एन्ड्रिउ जोनसन र सन् १९९८ मा बिल क्लिन्टनविरुद्ध महाअभियोग लागेपनि सिनेटमा पुगेर असफल भएको थियो ।

The post सिनेटबाट ट्रम्पलाई महाअभियोगमा सफाइ, राष्ट्रपति पदबाट हट्नु नपर्ने appeared first on Rajdhani Daily News.

वीरेन्द्रनगरमा तालमेल गर्ने सत्तारुढ गठबन्धनको निर्णय

Previous articleहलिउडका कलाकार डग्लसको १०३ वर्षको उमेरमा निधन
Next articleअब छोरीले छोराको मुखमा एसीड खन्याउने अवस्था सृजना गर्दैछौं : मुख्यमन्त्री राउत (भिडियाे)