काठमाडौंको दशरथ रंगशालामा सञ्चालन भइरहेको कतार एयरवेज सहिद स्मारक ए डिभिजन लिगअन्तर्गत शुक्रबारकाे खेल ललितपुरमा हुने भएकाे छ।
वर्षाको कारण देखाउँदै अखिल नेपाल फुटबल संघ (एन्फा)ले लिगअन्तर्गत शुक्रबार हुने खेल सातदोबाटोस्थित एन्फा कम्प्लेक्सको मैदानमा सारेको हो।
मछिन्द्र क्लब र हिमालयन शेर्पाको खेल दिउँसो ३ः०० बजे सातदोबाटोमा हुने एन्फाले जानकारी दिएको छ। सातौं चरणको पहिलो खेलमा आज एक खेल मात्र हुनेछ। छैटाैँ चरण सकिँदासम्म मछिन्द्र लिगको शीर्ष स्थानमा छ भने शेर्पाले जितको खाता खोल्न सकेको छैन।
शेर्पाले ४ खेलमा बराबरी र २ मा हार बेहोरेको छ। मछिन्द्रले लिगका ६ खेलमा ४ जित र २ बराबरीसहित १३ अंक जोडेको छ। अघिल्लो सिजन लिगको पुछारबाट दोस्रो स्थानमा रहेका कारण मछिन्द्रको यो सिजन एक अंक घटाइएको छ।
लिगमा मछिन्द्रसँगै त्रिभुवन आर्मी क्लबको १३ अंक छ। मनाङ मस्र्याङ्दी क्लबको १२ र रुस्लान थ्री स्टार क्लबको १० अंक छ।
