२३ मंसिर ,चितवन- पुर्वी चितवन खैरहनी नगरपालिका वडा -४ नव कंकाली टोल नजिक रहेको कयर खोलाको छेउमा आज दिउँसो मानव कंकाल फेला परेको छ ।

उक्त कंकाल स्थानीयले देखेपछि प्रहरीलाई खबर गरेका थिए । मानिसको टाउकोको खप्पर र ८ हड्डीहरु सो स्थानबाट फेला परेको ईलाका प्रहरी कार्यालय खैरहनीले जानकारी दिएको छ।

प्रारम्भिक अनुसन्धानबाट मानिसको पहिचान खुल्न नसकेको र घटनाको सम्बन्धमा थप अनुसन्धान अगाडि बढाइएको प्रहरीले जनाएको छ । ( तस्वीर: रामेश्वर रिजाल )

रत्ननगर, मंसिर २३ । रत्ननगरको टिकौलीचौरमा यही मंसिर २५ गते सोमबार देखि दोस्रो रत्नप्रिय कप फुटवल प्रतियोगिता हुने भएको छ । वडा नं ९ मा रहेको रत्नप्रिय क्वलको आयोजनामा प्रतियोगिता हुन लागेको हो । आयोजकले शनिबार विहान पत्रकार सम्मेलनको आयोजना गरी प्रतियोगिताको उद्देश्य र तयारीको बारेमा जानकारी दिएको हो ।

प्रतियोगिताको तयारी लगभग पुरा भएको र चितवन सहित मकवानपुर र नवलपरासी गरी तीन जिल्लाका १० वटा टिमको सहभागिता रहने क्लवका अध्यक्ष बसन्त रानाले बताए । राष्ट्रिय स्तरमा प्रतिस्पर्धा गर्न सक्ने युवा खेलाडी उत्पादन गर्ने उद्देश्यले क्लवले हरेक बर्ष प्रतियोगिता आयोजना गर्दै आएको अध्यक्ष रानाले बताए ।

प्रतियोगितामा पहिलो हुने टिमलाई १ लाख ५५ हजार ५५५ र दोस्रो हुने टिमलाई ७७ हजार ७७७ रुपैया पुरस्कार सहित उपाधि प्रदान गरिने खेल संयोजक विवेक अम्गाईले जानकारी दिए । प्रतियोगिता अन्तर्गत विभिन्न पाँच विधामा खेलाडीहरुलाई नगद पाँच हजारका दरले पुरस्कृत गरिने छ ।

उत्कृष्ट खेलाडी,सर्वोत्कृष्ट खेलाडी, हाइस्कोर, उदयमान खेलाडीलाई पुरस्कृत गरिने छ । पत्रकार सम्मेलनका प्रमुख अतिथि वडा नं ९ का वडाध्यक्ष अनन्त अधिकारीले रत्नप्रिय क्लवले फुटबल प्रतियोगितासंगसंगै सामाजिक क्षेत्रमा समेत योगदान गरिरहेकाले स्थानीय सरकारले सहकार्य गरेको बताए ।

स्थानीय सरकारसंग सहकार्य गरेर क्लवले चेतनामुलक,सरससफाई जस्ता कार्यक्रम गरिरहेको भन्दै उनले युवाहरुको कामले आफु उत्साहित भएको उनले बताए ।

वडाध्यक्ष अधिकारीले रत्नप्रिय क्लवको प्रयासले टिकौलीचौर सुन्दर बनेको बताए । कार्यक्रम क्लवका सचिव विजय लामाले सञ्चालन गरेका थिए ।

रत्ननगर, मंसिर २३ । चितवन अन्तरपालिका दोस्रो मेयर कप फुटबल प्रतियोगिताको उपाधि माडी नगरपालिकाले जितेको छ । घरेलु मैदानमा रत्ननगर नगरपालिकालाई १–० गोल अन्तरले पराजित गरी माडीले उपाधि रक्षा गरेको हो ।

माडीलाई उपाधि जिताउन सो नगरपालिकाको खेलाडी रितेश क्षेत्रीले निर्णायक एक गोल गरेका थिए । गतबर्ष भएको प्रथम मेयर कपमा रत्ननगरसंग फाइनलमा पराजित भएको माडीले शनिबार सम्पन्न दोस्रो मेयर कपको उपाधि जित्न सफल भएको हो ।

उपाधि जित्न सफल माडीले १ लाख ५१ हजार १११ सहित शिल्ड र मेडल प्राप्त गरेको छ भने प्रतियोगितामा उपविजेता बनेको आयोजक रत्ननगरले १ लाख १ हजार १११ रूयैया सहित शिल्ड र मेडल प्राप्त गरेको छ ।

फाइनल खेलमा म्यान अफ दी म्याच माडीमा रितेश क्षेत्र भएका छन् भने प्रतियोगिता भरीकै उत्कृष्ट खेलाडी रत्ननगरका तेजेन्द्र चौधरी घोषित भएका छन् ।

प्रतियोगितामा विजेता र उपविजेता टिमलाई रत्ननगरका मेयर प्रलाद सापकोटा, माडी नगरपालिकाकी मेयर ताराकाजी महतो, रत्ननगरका प्रमुख प्रशासकीय अधिकृत छविलाल सुवेदी र खेलकुद विकास समितिका अध्यक्ष कृष्ण चौधरीले पुरस्कार हस्तान्तरण गरेका थिए । सो अबसरमा रत्ननगरका मेयर सापकोटाले अर्कोबर्ष हुने तेस्रो मेयर कप प्रदेश स्तरीय गर्ने घोषणा गरे ।

बागमती प्रदेशका अन्य नगरपालिकाका समेत समावेश गरी प्रदेश स्तरीय प्रतियोगिता गरिने उनको भनाई छ । समापन कार्यक्रममा माडी नगरपालिकाकी मेयर महतोले मेयर कप फुटबल प्रतियोगितामा जिल्लाका पालिकाहरु बीच अन्तर सम्बन्ध स्थापित गरेको बताइन् ।

प्रमुख प्रशासकीय अधिकृत सुवेदीले खेलकुदको माध्यमबाट पालिकाबीचको सम्बन्ध र सहकार्य बढाउन प्रतियोगिता आयोजना गरिएको बताए ।

रत्ननगर नगरपालिकाले टाँडी स्थित नेपाल माविको खेलमैदानमा आयोजना गरेको प्रतियोगितामा चितवनका सात वटै पालिकाले सहभागिता जनाएको खेलकुद विकास समितिका सहसंयोजक सौगात भूजेलले जानकारी दिए ।

समितिका अध्यक्ष चौधरीको अध्यक्षतामा भएको समापन कार्यक्रम शिक्षा अधिकृत राजेन्द्र बरालले सञ्चालन गरेका थिए ।

काठमाडौँ, मङ्सिर २२ गते । बिहीबार राती दुबईबाट त्रिभुवन अन्तर्राष्ट्रिय विमानस्थल काठमाडौँ आएका एक व्यक्ति १४ किलोग्राम सुन सहित प्रहरी र भन्सार कार्यालयका कर्मचारीको टोलीले पक्राउ गरेको छ ।

नेपाल प्रहरीका प्रवक्ता डिआइजी कबेर कडायतका अनुसार गोरखा वारपाकका चन्द्र घले सुन सहित जहाजबाट अवतरण हुने क्रममा पक्राउ परेका हो ।

घले फ्लाइ दुबईको फ्लाइटबाट काठमाडौँ उत्रेका थिए । डिआइजी कडायतका अनुसार सुन सहित पक्राउ परेका व्यक्ति भन्सार विभागलाई थप कारवाहीका लागि बुझाई सकिएको जनाएको छ । शरीरमा लुकाएर ल्याएको अवस्थामा घले पक्राउ परेको थियो ।

काठमाडौं । सामाजिक सञ्जालमार्फत पूर्व प्रेमिकाको चरित्रहत्या गरेको आरोपमा चितवनका एक युवक पक्राउ परेका छन् । साइबर ब्यूरोबाट खटिएको प्रहरी टोलीले बुधवार राति काठमाडौं बबरमलबाट ती युवकलाई पक्राउ गरेको हो । पक्राउ पर्नेमा चितवन, रत्ननगर नगरपालिका – १० स्थायी घर भई हाल काठमाडौं बस्ने ४२ वर्षीय चतुरमान महतो रहेका छन् ।

प्रहरीका अनुसार पीडित महिला र युवकबीच एक वर्षअघि भेट भएको थियो । त्यही क्रममा उनीहरूबीच सामान्य भेटघाट तथा तस्वीर र भिडिओ आदानप्रदान भएको थियो । त्यसको केही समयपछि ती महिलाको बिहे अर्कै पुरुषसँग भयो ।

त्यसपछि महतोले महिलाको फोटो तथा भिडिओ सम्पादन गरेर अश्लील बनाई उनका श्रीमानलाई पठाइदिए । यसरी वैवाहिक जीवनमै आँच आउने र चरित्रहत्या गरेको भन्दै युवतीले उजुरी दिइन् ।

त्यसैको आधारमा प्राविधिक विश्लेषण गर्दै जाँदा महतो संलग्न भएको प्रमाणित भएपछि पक्राउ गरेको ब्यूरोका प्रवक्ता पशुपतिकुमार रायले जानकारी दिए ।

उनीमाथि विद्युतीय कारोबार ऐन, २०६३ अन्तर्गतको कसुरमा जिल्ला अदालत काठमाडौंबाट सात दिनको म्याद थप गरी थप अनुसन्धान तथा कारवाही भइरहेको छ ।

विराटनगर, मंसिर २१- वैदिक परम्परा अनुसार सुनसरीको इटहरीमा सासुले बुहारीको विवाह गरिदिएकी छन् ।

इटहरी उपमहानगरपालिका–२ का पुण्य पौडेल र उनकी आमा जानुकाले बुहारीको विवाह गरिदिएका हुन् । बिहीबार ३४ वर्षीया सूजा पौडेलको कर्मघरबाट वैदिक परम्पराअनुसार कन्यादान गरी विवाह गरिएको हो

२०६९ सालमा पौडेल परिवारले झापाको बैगुन्धुराबाट सूजालाई बुहारी बनाएर भित्र्र्याएको थियो । जानुकाले भनिन्, “मेरी कान्छी बुहारीको रूपमा भित्र्याएकी उनलाई आज छोरीको रूपमा विवाहदान गरेर बिदाइ गरेँ ।”

जानुकाका कान्छा छोरा फडिन्द्र र सूजाबीच मागीविवाह भएको थियो । फडिन्द्रको २०७१ सालमा मृत्यु भएको थियो ।

सुनसरीको डुम्राहाका रमेश रेग्मीले प्रस्ताव गरेपछि आफूहरूले राजीखुसी विवाह गराइदिएको पुण्यले बताए । ‘बुहारीको माइती पक्षसँग पनि यस विषयमा छलफल भयो’, उनले भने, ‘पारिवारिक सहमतिमै विवाह गर्ने निर्णयमा पुगेका हौँ । भनेजस्तो परिवार र उस्तै विगत भएका जोडीले राम्रो गरिखान सक्छन् भन्ने अपेक्षासहित बुहारीको विवाह गरिदिएका हौँ ।’

रेग्मीको पहिलो श्रीमतीको पनि दुई वर्षअघि मृत्यु भएको थियो । उनीतिरका एक छोरा र छोरी छन् । पौडेलकी पनि एक छोरी छिन् । रेग्मी सरकारी कर्मचारी हुन् । सूजा एनआईसी एसिया लघुवित्तमा कार्यरत छिन् ।

सूजाका बुवा कृष्ण खतिवडाले छोरी कर्मघरबाट बेहुली भई बिदा हुन पाउनु समाजका निम्ति उदाहरण भएको बताए । कर्मघरबाट छोरीका रूपमा बेहुली बनेर बिदाइ हुन पाउँदा गर्व लागेको सूजाले बताइन् ।

चितवन, मंसिर २१- चितवनको रत्ननगर नगरपालिका–८ बाघमारामा एक महिलाले आफ्नै शरिरमा आगो लगाई आत्मदाह गर्ने प्रयास गरेकी छन् ।

बाघमाराकी ४१ वर्षीय बिनिमाया कुमालले गएराति १:१५ बजे आत्मदाहको प्रयास गरेको बागमती प्रदेश प्रहरीले जानकारी दिएको छ । कुमालको अवस्था मध्यम रहेको र भरतपुर अस्पतालमा उपचार भइरहेको प्रहरीले जनाएको छ ।

निज महिला प्यारालाईसिस र मानसिक बिरामी रहेको पाइएको प्रहरीले बताएको छ । के कारणले आत्मदाहको प्रयास गरेको हो भन्ने विषयमा अनुसन्धान भइरहेको छ ।