गण्डकी प्रदेश सरकारले आज प्रदेशभर सार्वजनिक बिदा दिएको छ।

चैत्र शुक्ल अष्टमी (चैते दसैँ) का अवसरमा प्रदेशभरका सबै सरकारी कार्यालय, शैक्षिक संस्था र सार्वजनिक संस्थानमा सार्वजनिक बिदा रहने मुख्यमन्त्री तथा मन्त्रिपरिषद्को कार्यालयले सूचना प्रकाशित गरी जानकारी दिएको हो।

मन्त्रिपरिषद्को गत चैत ९ गतेको बैठकले गण्डकीमा विभिन्न चाडपर्व तथा दिवसमा बिदा दिने निर्णय गरेको थियो।

मन्त्रिपरिषद्ले गरेको बिदाको निर्णय प्रदेश राजपत्रमा समेत प्रकाशित भइसकेको मुख्यमन्त्री तथा मन्त्रिपरिषद्को कार्यालयका उपसचिव प्रविण ढकालले जानकारी दिए। रासस

चितवन-चितवन राष्ट्रिय निकुञ्जमा पर्यटक घुमाउन गएका नेचर गाइडको गैडाको आक्रमणबाट मृत्यु भएको छ ।

शनिवार बिहान ११ः५० बजे चितवन राष्ट्रिय निकुञ्जको हात्ती प्रजनन् केन्द्रदेखि पश्चिम क्षेत्रको मध्यवर्ती वन क्षेत्रमा पर्यटक घुमाउन गएका गोरखा आरुघाट गाउँपालिका ८ पोखरी घर भई हाल रत्ननगर नगरपालिका ६ सौराहा बस्ने ३२ वर्षीय सुवास रेग्मीलाई गैडाले आक्रमण गरेको थियो ।

आक्रमणबाट गम्भिर घाइते रेग्मीको उपचारका क्रममा चितवन मेडिकल कलेजमा मृत्यु भएको जिल्ला प्रहरी कार्यालय चितवनका प्रवक्ता श्रीराम भण्डारीले जानकारी दिए ।

रेग्मी सौराहाको जंगल वर्ल्ड रिसोर्टमा नेचर गाइडको काम गर्दै आएका थिए।

रत्ननगर । चितवनमा भोली बैशाख १ गते देखि २९ औं वन्यजन्तु सप्ताह सुरु हुँदैछ । हरेक बर्ष वन र वन्यजन्तु संरक्षणमा दीर्घकालिन प्रभाव पर्ने प्रकृतिका गतिविधि आयोजना गरी सप्ताह मनाइदै आएको छ ।

निकुञ्ज सहित संरक्षण र पर्यटनसंग सम्बन्धित संघसंस्थाहरुको सहकार्यमा सप्ताह मनाइन्छ । रत्ननगरको बछौलीमा रहेको मृगकुञ्ज मध्यवर्ती उपभोक्ता समितिले शुक्रबार पत्रकार सम्मेलनको आयोजना गरी वन्यजन्तु सप्ताहको उद्देश्य र एक हस्तासम्म गर्ने कार्यक्रमको बारेमा जानकारी दिएको छ ।

वन्यजन्तुको संरक्षण ः पर्यापर्यटन र आयआर्जन भन्ने मुल नाराका साथ मनाउन लागिएको सप्ताहमा संरक्षण र जीविकोपार्जनलाई जोड दिइएको मृगकुञ्जका अध्यक्ष दुर्गाप्रसाद घिमिरेले बताए ।

सप्ताह व्यापी कार्यक्रम अन्तर्गत बैशाख १ गते उद्घाटन, २ गते टिकौली हाइबे वरपर सरसफाई, ३ गते चरा अबलोकन, ४ गते वन्यजन्तु संरक्षण मुलक विद्यालय स्तरीय चित्रकला प्रतियोगिता, सोही दिन वन्यजन्तु र मानिस बीचको सहअस्थित्व सम्बन्धी विद्यालय स्तरीय बक्तृत्वकला प्रतियोगिता, ५ गते डुंगा सयर, ६ गते वन,वन्यजन्तु र बाताबरण संरक्षणमुलक सचेतना रयाली गरिने छ ।

सप्ताहको अन्तिम दिन बैशाख ७ गते वन, वन्यजन्तु तथा जैविक विविधता संरक्षणमा सम्भावना र चुनौती विषयक अन्तक्र्रिया र संरक्षणमा योगदान दिएकाहरुलाई विभिन्न विधामा सम्मान गरिने अध्यक्ष घिमिरेले बताए ।

मृगकुञ्जको अगुवाईमा निकुञ्ज, स्थानीय सरकार, राष्ट्रिय प्रकृति संरक्षण कोष सहित सामुदायिक वन, सौराहाको पर्यटनसंग सम्बन्धित संघसंस्था गरी २६ वटा संघसंस्थाको सहकार्यमा सप्ताह मनाइदै छ ।

मृगकुञ्जकी कार्यसमिति सदस्य विन्दा कार्कीले सञ्चालन गरेको सो कार्यक्रममा बाघमारा मध्यवर्ती सामुदायिक वनका अध्यक्ष जीतु तामाङ, समुदायमा आधारित चोरी शिकार नियन्त्रण युवा जागरण अभियानका अध्यक्ष बसन्त राना, नेचर गाइड एशोसियसनका अध्यक्ष अनिल गुरुङ लगायतको सहभागिता रहेको थियो ।

काठमाण्डौ – एसीसी प्रिमियर कप क्रिकेट प्रतियोगितामा आज नेपालले मलेसियासँग खेल्दैछ । ओमानको अल अमिरातमा आज शुरु हुने प्रतियोगितामा नेपालले पहिलो खेल सवा ४ बजे मलेसियासँग खेल्न लागेको हो । नेपाल गएको वर्षको विजेता हो ।

घरेलु मैदानमा भएको प्रतियोगितामा नेपालले फाइनलमा यूएईलाई ७ विकेटले पराजित गर्दै उपाधि जितेको थियो । मलेसिया भने समूह चरणबाटै बाहिरिएको थियो । समूहको पहिलो खेलमा नेपालले मलेसियालाई ६ विकेटले पराजित गरेको थियो । मलेसियाले कतार र साउदीलाई पराजित गरेको थियो ।

एसीसी प्रिमियर कप क्रिकेटमा आज एकैदिन चार वटा खेल हुँदैछन् । बिहान पौने १२ बजे ओमान र बहराइन तथा यूएई र कुवेतबीच खेल हुनेछ । यस्तै सवा ४ बजे हङकङ र कतार खेल्नेछन् ।

प्रतियोगितामा नेपालले दोस्रो खेलमा भोलि शनिवार कतारसँग, वैशाख ३ गते सोमवार हङकङसँग र वैशाख ४ गते बुधवार समूह चरणको अन्तिम खेलमा साउदी अरेबियासँग खेल्नेछ । आजदेखि शुरु हुने प्रिमियर कप वैशाख ९ गतेसम्म चल्नेछ ।

एसीसी प्रिमियर कपमा नेपाल समूह ‘ए’ मा छ । यो समूहमा नेपालसँगै हङकङ, मलेसिया, कतार र साउदी अरेबिया छन् । यस्तै समूह ‘बी’ मा बहराइन, कम्बोडिया, कुवेत, ओमान र संयुक्त अरब इमिरेट्स (यूएई) छन् । समूहका शीर्ष दुई टोली सेमिफाइनल पुग्नेछन् ।

फाइनल जित्ने टोलीले एसिया कप खेल्न पाउनेछ ।

रत्ननगर, चैत्र २८ । चितवनमा वायु प्रदूषण बढेको छ । केही दिनयता मुलुकभरसँगै चितवन राष्ट्रिय निकुञ्ज र राष्ट्रिय वन क्षेत्रमा लागेको लागेको डढेलोका कारण चितवनको वायु प्रदूषण बढेको हो ।

कतै घाँसे मैदान व्यवस्थापन गर्न र कतिपय प्राकृतिक कारणबाट पनि डढेलो फैलिएको छ । सर्वसाधारणहरुले पनि कृषिजन्य उत्पादनका फोहर र अन्य फोहर जलाउने गरेका कारण वायुमण्डलमा धुँवाको मात्रा अत्याधिक भएको हो ।

सडक लगायतका पूर्वाधार निर्माणका कारण पनि निकै धुलो उडेको छ । सवारी साधन र कलकारखानाबाट धुलो र धुँवा उड्दा यति बेला यहाँको वातावरण अस्वस्थकर बनेको छ ।

वायु प्रदुषणका कारण आँखा पोल्ने, श्वासप्रश्वास बढ्ने, छाला चिलाउने लगायतका समस्या देखिन थालेका छन् । ‘एयर क्वालिटी इन्डेक्स’का अनुसार चितवनको समग्र वायु गुणस्तर सूचकाङ्क (एक्यूआई) कसरा नजिकको सेन्सरले ७०० बढी देखाएको छ। त्यस्तै गरेर मेघौलीको सेन्सरले ५५० बढी , भिमनगरमा ६५० बढी, र भरतपुरमै पनि ३५० बढी छ । एक्यूआई ३०० बढी हुदा स्वास्थ आपतकालीन अवस्था हुने गर्दछ।

चितवन निकुञ्जका संरक्षण अधिकृत गणेशप्रसाद तिवारीले मुलुकभर लागेको डढेलोको असर चितवनलगायतका सहरको वायूमा परेको बताए ।

तिवारीका अनुसार वन डढेलो नियन्त्रण नभएसम्म प्रदूषण पनि बढ्दै जानेछ। जसका कारण यहाँको वातावरण अत्यन्तै हानिकारक तहमा पुगेको छ ।

बाहिर निस्किन नपरे बाहिर नजाने र मास्क लगाउने, आँखा चिसो पानीले पटक पटक धुने गर्न चिकित्सकहरुले सुझाव दिएका छन् ।

रत्ननगर । रत्ननगर वडा नं १५ मा मंगलबार आयोजना गरिएको निःशुल्क स्वास्थ्य परीक्षण शिविरमा ४१२ जनाको स्वास्थ्य परीक्षण गरिएको छ ।

जनतासंग एमाले अभियान अन्तर्गत नेकपा एमाले वडा कमिटी र राष्ट्रिय स्वास्थ्यकर्मी महासंघ नगर कमिटीले सयुक्त रुपमा आयोजना गरको शिविरमा दाँत तर्फ ३१ जना सहित ४१२ जनाको स्वास्थ्य परीक्षण गरी औषधि समेत वितरण गरिएको पार्टीका नेता तथा वडाध्यक्ष आशिक तामाङले जानकारी दिए ।

जनतासंग एमाले अभियान सञ्चालन भइरहेका बेला नागरिकको स्वास्थ्य सुरक्षाप्रति सचेत हुँदै शिविर आयोजना गरिएको उनले बताए ।

शिविरको एमालेकी केन्द्रीय सदस्य शिबकुमारी गोतामेले उद्घाटन गरेकी थिइन् । शिविरमा डा.शशांक सिंह सहितका डाक्टरहरुको टोलीले स्वास्थ्य जाँच गरेका थिए ।

उद्घाटन कार्यक्रममा नेकपा एमाले बागमती प्रदेश कमिटी उपाध्यक्ष तथा पूर्वमन्त्री दावादोर्जे लामा, जिल्ला अध्यक्ष रामप्रसाद न्यौपाने, प्रदेश कमिटी सदस्य तथा संस्थापक मेयर नारायण वन, नगर कमिटी अध्यक्ष इश्वरीप्रसाद अर्याल, नेता तिलचन्द्र भट्टराई, राष्ट्रिय स्वास्थ्यकर्मी महासंघ नगर कमिटी प्रमात्मा रेग्मी लगायतले मन्तव्य राखेका थिए ।

वडा कमिटी अध्यक्ष कृष्ण पन्तको अध्यक्षतामा भएको कार्यक्रममा उपाध्यक्ष भोजराज लामिछानेले स्वागत मन्तव्य राखेका थिए ।

२७ चैत, काठमाडौं । भारतको उत्तराखण्डस्थित नैनीताल जिल्लामा सवारी दुर्घटना हुँदा ७ नेपालीसहित ८ जनाको मृत्यु भएको छ । बेतालघाट नजिक भएको दुर्घटनामा अन्य दुई जना नेपाली घाइते भएका छन् ।

मृतक नेपालीहरु कञ्चनपुरको महेन्द्रनगर निवासी रहेको भारतीय मिडिया टाइम्स अफ इण्डियाले जनाएको छ । उनीहरु घर फर्किंदै गर्दा दुर्घटनामा परेका थिए ।

यसैगरी भारतको हिन्दुस्तान टाइम्सले सोमबार राति भएको दुर्घटनामा सात जना नेपाली र एक जना चालक सहित आठ जनाको मृत्यु भएको जनाएको छ ।

भारतको बेतालघाटको उँचाकोट भन्ने गाउँमा जलजीवन परियोजनाका काम गर्ने कामदारहरु रहेको समाचारमा उल्लेख छ ।

उज्यालो नेपाल- समुदाय, वन्यजन्तु र जलवायुको क्षेत्रमा कामगर्दै आएको गैरसरकारी संस्था सहमतिले जीविकोपार्जन कार्यक्रम अन्तर्गत चितवनका दुई स्थानिय तहहरुमा मौरी वितरण गरेको छ ।

संस्थाले रत्ननगर र कालिकामा रहेका विभिन्न चार वटा सामुदायिक वनमा आवद्ध कृषकहरुलाई सेरेना र मेनिफेरा जातका २८ घार मौरी वितरण गरेको हो ।

कार्यक्रमबाट लाभान्वित हुनेहरुमा रत्ननगरको पन्चकन्या सामुदायिक वन र कालिकाको भिमवली सामुदायिक वन, उदयपुर सामुदायिक वन र अमलाचुली सामुदायिक वनमा आवद्ध किसानहरु छन् ।

संस्थाले यसअघि नवलपुरको गैंडाकोटमा रहेको कार्यालयमा तिनदिने व्यवसायिक मौरीपालन सम्बन्धी तालिम संचालन गरिसकेको छ । सोहि तालिममा सहभागी किसानहरुलाई मौरी वितरण गरिएको हो।

मौरी वितरण कार्यक्रम पछी संक्षिप्त प्रतिक्रिया राख्दै उदयपुर सामुदायिक वनका अध्यक्ष शंकर लामाले यस्ता कार्यक्रमले किसानहरु आर्थिक समृद्धिको बाटो तर्फ लाग्ने उल्लेख गर्दै यसले वनजंगल संरक्षणको कार्यमा टेवा पुग्ने विश्वास व्यक्त गरे ।

सहमतिले डब्लुडब्लुएफ नेपालसँगको सहकार्यमा नवलपरासी र चितवनको विभिन्न क्षेत्रमा समुदाय, वन्यजन्तु र जलवायुको क्षेत्रमा कार्यक्रम संचालन गर्दै आईरहेको छ ।

रत्ननगर। रत्ननगर नगरपालिकाले आधारभूत तह कक्षा ८ को नतिजा आईतबार प्रकाशित गरेको छ । सैद्धान्तिक र प्रयोगात्मक दुुवै गरी समष्टिमा प्रत्येक विषयमा डी प्लस ग्रेड स्तरभन्दा माथिल्लो स्तर कायम गर्ने विद्यार्थीहरू झन्डै ९४ प्रतिशत रहेका छन् ।

उनीहरू कक्षा ९ मा भर्ना हुनयोग्य विद्यार्थी रहेको नगरशिक्षा अधिकारी नारायण प्रसाद वाग्लेले जानकारी दिए । छ प्रतिशत विद्यार्थीको डी प्लस ग्रेडभन्दा तल्लो स्तर कायम भएकाले ग्रेड स्तर वृद्धिका लागि पूरक परीक्षा दिनुपर्ने भएको छ ।

ति छ प्रतिशत मध्ये पनि २ वटा विषयमा मात्र डी प्लस ग्रेडभन्दा तल्लो स्तर कायम भएका विद्यार्थीहरु मात्र पुरक परिक्षामा सहभागी हुन पाउनेछन् ।

परीक्षामा सामुदायिक र संस्थागततर्फका गरि कुल एक हजार ६१८ जना विद्यार्थी सहभागी भएका थिए ।  परीक्षाको  लागी रजिष्ट्रेशन फारम भरेका मध्ये सात जना विद्यार्थी परिक्षामा सामेल नै भएनन् ।

समग्रमा यसपटक रत्ननगरको कक्षा आठको नतिजा गतवर्षको भन्दा सुधारिएको देखिएको छ ।  गतवर्ष यँहाका दुई सामुदायिक विद्यालयहरु द्वारिकादास मावि र कपरफोरी माविको नतिजा शुन्य थियो । तर यसपटक यँहाका सबै विद्यालय शुन्य नतिजा आउन बाट जोगिएका छन् ।

नतिजा हेर्नको लागी यँहा क्लिक गर्नुहोला !

This is a developing story……