चितवन । चितवनको खैरहनी नगरपालिका–१३ हर्नरीमा धारिलो हतियार प्रहारबाट एक जना घाइते भएका छन्।
गए राति करिब २०:४० बजे जिल्ला कैलाली घर भई हाल खैरहनी–१३ हर्नरीमा मजदुरी गर्दै बस्दै आएका ३१ वर्षीय हरि कुमार चौधरीमाथि सोही स्थानमा मजदुरी गर्दै बस्ने ३३ वर्षीय लालबहादुर चौधरीले चक्कु प्रहार गरेका हुन्।
मादक पदार्थ सेवनपछि सामान्य विवाद हुँदा लालबहादुरले हरि कुमारको ढाडमा धारिलो हतियार (चक्कु) प्रहार गर्दा उनी गम्भीर घाइते भएका प्रहरीले जनाएको छ। घाइते चौधरीलाई उपचारका लागि सरकारी अस्पताल भरतपुर पठाइएको छ।
घटनामा संलग्न लालबहादुर चौधरीलाई इलाका प्रहरी कार्यालय खैरहनीले नियन्त्रणमा लिएको छ भने घटनाबारे थप अनुसन्धान भइरहेको प्रहरीले जनाएको छ।
