फिल्ममा परिवारको साथ नपाएको हमालको गुनासो

0
30

काठमाडौं । अभिनेता राजेश हमालले आफू चलचित्रमा लाग्दा परिवार त्यसको विपक्षमा उभिएको खुलासा गरेका छन् । राजधानीमा जारी तेस्रो संस्करणको नेपाल अन्तर्राष्ट्रिय चलचित्र महोत्सव (निफ)मा आफ्ना जीवनको भोगाइ सुनाउने क्रममा अभिनेता हमालले आइतबार यो कुराको खुसाला गरेका हुन् ।

परिवारको दबाबमा छाडें फिल्म

२०४५ सालमा पहिलो चलचित्र भाग्य रेखामा अनुबन्धित भएका अभिनेता राजेश हमालले पारिवारिक कारणले नै पहिलो फिल्म छाड्नु परेको बताएका छन् ।
उनका मामा दीपक रायमाझीले चलचित्र ‘भाग्यरेखा’मा उनलाई नायकका रूपमा लिएका थिए । सो चलचित्रमा उनको नायिका कृष्टि मैनाली थिइन् । फिल्मको सुटिङ सुरु भएको पाँच दिनमै राजेश हमालले त्यो फिल्म छाडे । यो फिल्ममा राजेशको ठाउँमा त्यसपछि रविन्द्र खड्का नायक भएको थिए । आफ्नो बुबा त्यतिबेला कूटनीतिक नियोगमा भएकाले परिवारको दबाबमा पहिलो फिल्म छाड्नु परेको यी अभिनेताले बताएका छन् ।

त्यतिबेला भारतमा केही समय मोडलिङ गरेर नेपाल आएका अभिनेता हमाललाई फिल्ममा नायक बन्ने ठूलो हुटहुटी थियो । पहिलो फिल्म छाडे पनि नायक बन्ने हुटहुटी उनको सकिएन । त्यसैले, मामा दीपक रायमाझीले नै उनलाई अर्को फिल्म ‘युगदेखि युगसम्म’मा नायक बनाए,‘दोस्रो फिल्म गर्दा पनि मलाई फिल्म खेल्नुहुँदैन भन्ने दबाब परिवारबाट त्यत्तिकै थियो । तर, मैले सबैको दबाबलाई बेवास्ता गरेर एकल निर्णयबाटै चलचित्र युगदेखि युगसम्ममा मुख्य नायकको रूपमा काम गरें ।’ यही फिल्मबाट आफ्नो करिअर नेपाली चलचित्र क्षेत्रमा अघि बढेको अभिनेता राजेश हमालले बताए ।

फिल्मकै कारण बिग्रियो बुबासँग सम्बन्ध बिग्रयो

पहिलो चलचित्रबाटै बुबासँग आफ्नो सम्बन्ध त्यतिबेला चिसिएको अभिनेता हमालले बताएका छन्, ‘बुबा राजदूत हुनुहुन्थ्यो । त्यो समयमा म चलचित्रमा आउनु भनेको बुबाको ओहदाविपरीत जस्तै भए पनि चलचित्र युगदेखि युगसम्मलाई मैले सहजै स्वीकार गरेर फिल्म खेलें ।’ पहिलो फिल्म खेलेपछि बुबासँग सम्बन्ध बिग्रिएको उनले बताए ।
अभिनेता राजेश हमालका लागि बुबा गुमाएको पल सबैभन्दा दुःखद पल थियो । बुबाको जीवनको अन्तिम समयमा फिल्मकै कारण आफूले कुराकानी गर्न नपाएको महसुस राजेश हमाललाई हुँदो रहेछ । उनी एउटा फिल्मको छायांकनमा व्यस्त थिए । त्यसपछि बुबा राजदूत भएर पाकिस्तान गए । त्यति बेलासँग उनले भेट गर्न पाएनन् । बुबा पाकिस्तान गएदेखि नै उनले फोनमा कुरा गर्न पाएका थिएनन् । त्यसको तीन महिनापछि पाकिस्तानमै बुबाको निधनको खबर आयो । त्यतिबेला उनलाई साह्रै पीडा भएको स्मरण यी अभिनेताले सुनाए,‘फिल्मकै व्यस्तताका कारण बुबासँग कुरा गर्न नपाएको पीडा त्यतिबेला मलाई भयो । त्यो पीडाले आज पनि मलाई पोल्ने गरेको छ ।’ केही भावुक हुँदै हमालले बिगत सम्झिए ।

फिल्म धेरै खेल्नु बाध्यता थियो

अभिनेता राजेश हमाललाई एक समय धेरै फिल्म खेलेको आरोप लगाएको थियो । २०५० को दशकमा उनले वर्षमा १२ वटा फिल्ममा काम गरे, ‘मैले एक दशकभन्दा लामो समय दिनमा १८ घण्टासम्म फिल्ममा निरन्तर काम गरें । त्यतिबेला मैले आराम के हो भन्ने महसुस समेत गर्न पाइनँ ।’ अभिनेता हमालले त्यतिबेला धेरै फिल्म खेल्नुको कारण पैसा नभएकाले बाध्यता भएको बताए ।
‘मेरा प्रायः सबैजसो फिल्म चरिरहेका थिए र एकपछि अर्को गर्दै फिल्ममा आएको प्रस्तावलाई मैले अश्विकार गरिनँ । मेरो काँधमा त्यतिबेला फिल्मको जिम्मेवारी भएकाले पनि मैले धेरै फिल्म खेल्नुपरेको थियो र त्यसमा मलाई पछुतो छैन ।’ अभिनेता हमालले त्यतिबेला धेरै फिल्म खेल्नुको कारण यसरी स्पष्ट पारे । यसरी निरन्तर लामो समय व्यस्त सेड्युलमा काम गरेका हमालले निकै समयपछि विदेशमा गएर डेढ महिना बस्दा मात्र आराम गर्ने अवसर पाएको बताए ।

अब फिल्म छानेर काम गर्छु

अभिनेता हमालले बिगत ४ वर्षदेखि एउटा पनि फिल्म खेलेका छैनन् । पछिल्लो चलचित्र बाग्मती रिलिजपछि उनलाई चलचित्रमा प्रस्ताव नआएका हैनन् । अब आफूले संख्या बढाएर नहुने बरु गुणस्तरीय फिल्म दिनुपर्ने महसुस उनलाई हुन थालेको छ । त्यसैले, यो चार वर्षमा फिल्म नखेलेको उनले बताएका छन्,‘अब राम्रो फिल्म खेल्ने पक्षमा छु । त्यसैले, केही समय फिल्म नखेली बसेको हुँ ।’

निर्देशनमा पनि आउँछु

अभिनेता राजेश हमालले आफ्नो कथा सुनाउने क्रममा चलचित्र निर्देशनमा आउने पनि जिकिर गरे । चलचित्र निर्देशनसँगै निर्माणमा पनि आउने उनले बताए । आफूले तीन दशकदेखि नेपाली चलचित्र क्षेत्रमा काम गरेको र दर्शकले आफूबाट धेरै नै अपेक्षा गरेकाले जस्तो पायो त्यस्तै फिल्मको निर्देशन जिम्मा नलिएको उनले बताए । आफूले निर्देशन गर्ने उपयुक्त प्रोजेक्ट पाएपछि चलचित्र निर्देशनमा आउने योजना अभिनेता हमालले सुनाए । त्यसको लागि उनी राम्रो स्कृप्टको खोजीमा छन् । आफू निर्देशनसँगै निर्माणमा पनि आउने अभिनेता हमालले बताएका छन् । अभिनय र निर्देशनसँगै उनलाई फिल्म निर्माण गर्ने चाहना पनि छ । त्यो चाहना चाँडै पूरा हुने उनले बताएका छन् ।

राजनीतिमा तत्काल आउँदिनँ

अभिनेता राजेश हमालले राजनीतिमा तत्काल आउदिनँ भनेका छन् । उनलाई राजनीतिक पार्टीबाट नेता बन्न प्रस्ताव नआउने गरेको हैन । राजनीतिमा खुला रूपमा नआउनुको कारणबारे उनले भने,‘मैले जानेको काम नै कलाकारिता भएकाले नजानेको काममा हात हाल्नुहुन्न भन्ने मेरा मान्यता छ । राजनीति मैले नजानेको काम भएकाले म राजनीतिमा नगएको हुँ । यसको मतलब राजनीतिमा जन्न भनेको हैन, कुनै दिन राजनीतिमा आउन पनि सकिएला ।’ यी अभिनेताले भने ।

विकास बोर्डमा जानेबारे सोचेको छैन

अभिनेता राजेश हमाललाई हालसालै विकाश बोर्डमा जाने प्रस्ताव पनि आएको थियो । यससम्बन्धी समाचार पनि आयो । तर, अहिले आफूले चलचित्र विकास बोर्डमा अध्यक्ष भएर जानेबारे सोचेको छैन भन्ने जवाफ यी अभिनेताले दिएका छन्,‘केशव भट्टराईज्यूको निधनपछि बोर्डको अध्यक्ष खाली छ र उहाँसँग सदस्य भएर काम गरेका र उहाँका योजना बुझेका साथी नै बोर्डमा जानुपर्छ जस्तो मलाई लाग्छ ।’ अभिनेता हमालले भने । अभिनेता हमालले कार्यक्रममा डेढ घण्टाको बसाइँमा आफ्ना जीवनका यस्ता धेरै भोगाइहरू सुनाए ।

The post फिल्ममा परिवारको साथ नपाएको हमालको गुनासो appeared first on Rajdhani Daily News.

मोटरसाइकल दुर्घटनामा दुई जनाको मृत्यु

Previous articleखरिपाटीले भुलायो वुहानको पीडा
Next articleसप्तरीमा आयोजित धार्मिक सम्मेलनमा सहभागी हुन आएका दुई जना भारतीयको मृत्यु