कालोबजारी गर्नेमाथि कडा कारबाही गर

काठमाडौं उपत्यकालगायत देशभरमा कोरोना संक्रमणको त्रास फैलिरहेको मौका छोपेर व्यापारीले दैनिक उपभोग्य वस्तुमा कृत्रिम अभाव सिर्जना गरी कालोबजारी गरिरहेका छन् । कोरोना संक्रमणको त्रास फैलाएर उपभोक्तालाई एकैपटक खाद्यवस्तु किन्न लगाउने र मृल्यवृद्धि गर्ने काम गरिएको छ ।

व्यापारीले यसरी मनपर्दी गर्दा सरकारका सरोकारवाला निकायले कडा कारबाही गर्न सकेका छैनन् । विशेषगरी यस्तो विसम अवस्थामा सरकारका सम्बन्धित निकाय संवेदनशील भएर नागरिकका तमामखाले समस्या समाधान गर्न लाग्नुपर्छ । हिन्दूको महत्वपूर्ण पर्वमध्येको एक होली पर्वको आगमनसँगै उत्साह थपिइरहेको अवस्थामा सर्वसाधारण जनता महँगीको मार खेप्न बाध्य भइरहेका छन् । महँगीका कारण जनतामा त्यति धेरै उत्साह जागृत हुन सकेको छैन । दैनिक उपभोग्य वस्तुको कृत्रिम अभाव सिर्जना गर्नु अमानवीयताको पराकाष्ट हो । कोरोना भाइरसको आतंक सिर्जना भइरहेको अवस्थामा कालोबजारीको अर्को आतंक सिर्जना गरिएको छ । उद्योग वाणिज्य तथा आपूर्तिमन्त्री लेखराज भट्टले कालोबजारी गर्ने माथि कडा कारबाही गर्ने बताए पनि उनले व्यावहारिक रूपमा त्यसरी कारवाही गर्न सकेका छैनन् । यस्तो अवस्थामा मन्त्री भट्ट आफैं बजार अनुगमनमा खट्नुपर्छ र आफ्ना संयन्त्रलाई नियमित रूपमा नै अनुगमनमा खटाउन सक्नुपर्छ । त्यसैगरी जिल्ला प्रशासन कार्यालय र स्थानीय तहका प्रतिनिधिले पनि कालोबजारी रोकथाम गर्न आवश्यक पहल गर्नुपर्छ ।

अहिले काठमाडौं उपत्यकालगायत देशका अन्य सहरी क्षेत्रमा माक्स, सेनीटाइजरलगायतका वस्तुको अभाव हुन थालेको छ । कोरोना भाइरसको संक्रमणको हल्ला यसरी फैलाइएको छ कि यसले सबै क्षेत्रलाई गाँजेको जस्तो भ्रम समेत फैलाइएको छ । वास्तवमा त्यस प्रकारको भ्रम फैलाउनु गलत हो । हामीले कोरोना भाइरसको संक्रमण फैलिन नदिन आवश्यक सर्तकता अपनाउनुपर्छ । त्यसो भन्दैमा कोरोना भाइरसको संक्रमण फैलिएको जसरी नै तर्सनु र चिन्ता मान्नुपर्ने अवस्था भने किमार्थ छैन । सरकारले पनि आवश्यक तयारी र पूर्वसचेतता अपनाउन सबै नागरिकमा अपील गर्दै आइरहेको छ । विभिन्न जिल्लाका प्रशासन कार्यालयले पनि त्यस क्षेत्रका नागरिकले सचेतता अपनाउनुपर्ने आवश्यकता आंैल्याउँदै आएका छन् ।
हामीकहाँ कुनै पनि विषयलाई अतिरञ्जित बनाएर भयानक स्थिति सिर्जना गर्ने र अस्थिर तथा आतंकको वातावरण सिर्जना गरी आफ्नो निहित स्वार्थपूर्ति गर्ने पक्ष पनि निकै शक्तिशाली अवस्थामा छन् ।

हिजो भूकम्पको समयमा होस् वा अहिले कोरोना भाइरसको संक्रमण फैलिन सक्ने अवस्थामा होस् त्यस प्रकारको गलत प्रवृत्ति भएका व्यक्ति तथा समूह हाबी हुने प्रवृत्ति उस्तै अवस्थामा छ । यो सबै दण्डहीनताको संस्कृतिको उपज हो । लोकतन्त्रमा दण्डहीनताको संस्कृति मौलाउँदै गयो भने सिंगो शासकीय पद्धति नै कमजोर हुन सक्ने सम्भावना रहन्छ । त्यसैले बजारमा कृत्रिम अभाव सिर्जना गर्ने तत्वलाई समयमा नै पहिचान गरी कडाभन्दा कडा कानुनी दायरामा ल्याउन सकिएको भए नागरिकले समस्या भोग्नुपर्दैनथ्यो । सरकारी निकायमा रहेका मन्त्री, सचिव , महानिर्देशकले कुनै कार्यक्रममा गएर कालोबजारी गर्नेलाई कारबाही गर्ने चेतावनी दिने होइन उनीहरूले त कालोबजारी गर्नेलाई पक्राउ गरी कारबाही गर्ने हो त्यसो गर्न सकेमा मात्रै सरकारप्रति जनताको विश्वासको वातावरण बढेर जान्छ ।

The post कालोबजारी गर्नेमाथि कडा कारबाही गर appeared first on Rajdhani Daily News.