चितवनमा फेरी देखियो कोरोना: भारतबाट आएका वृद्ध दम्पतीमा देखियो संक्रमण
९ जेठ, चितवन । भारतबाट आएका तीन जनालाई चितवनमा गरिएको कोरोना परीक्षणमा संक्रमण पुष्टि भएको छ । तीन जनामध्ये दुइ जना चितवनका हुन् भने एक जना नवलपरासीका हुन् । भरतपुर महानगरपालिका वडा नं. ६ केशरवागका दुई वृद्ध दम्पतीलाई कोरोना संक्रमण पुष्टि भएको छ । उनीहरु भारतबाट चितवन आई क्यान्सरको उपचार गराएर फर्किएको जनाइएको छ ।
कोरोना संक्रमण भएका पुरुष ७४ बर्षका छन् भने महिला ७३ बर्षकी छन् । उनीहरुसँगै भारत गएका छोरामा भने कोरोना संक्रमण देखिएको छैन । उनीहरु दुई साता अघि भारतबाट आएको खुलेको छ । उनीहरुलाई भरतपुर कोरोना अस्पतालमा राखिएको छ । उनीहरुको अवस्था उमेर अनुसार सामान्य नै रहेको अस्पतालले जनाएको छ । यस्तैं नबलपरासीको विनय त्रिवेणी गाउँपालिका वडा नं. ६ का एक ४३ बर्षका पुरुषमा पनि कोरोना संक्रमण पुष्टि भएको छ ।
उनको अवस्था पनि सामान्य छ । उनी भारतबाट नेपाल आएका थिए । भरतपुर कोरोना प्रयोगशालामा बिहीबार गरिएको १३१ परीक्षणमध्ये तीन जनालाई कोरोना संक्रमण पुष्टि भएको छ । चितवनमा अहिलेसम्म गरिएका परीक्षणमा ६ जनामा कोरोना संक्रमण देखिएको छ । यी मध्ये चार जना चितवनका हुन् भने दुई जना नवलपरासीका हुन् ।चितवनमा संक्रमित दुई आमा छोरा निको भएर घर फर्किसकेका छन् । सुवास पण्डित/ अनलाईन खबर
